Read Chiquitano 1 SAN JUAN 2 Bible Online

1 SAN JUAN 2 - Chiquitano bible

1 SAN JUAN 2

¹Aukuasɨrɨka iñemo takana axɨbama isaɨtaiki. Xhakonomoka aume axɨna kichonimiakax tapɨ apisamute nomɨnantɨ. Axtɨ anati naki isamutenti nomɨnantɨ, anati esati Uyaɨ naki okɨmanabo utaku, axti Jesucristo, naki uxia ñapanaunkuxti.

²Uiti Tupax moximiakana nomɨnantɨ osoi axɨbaityo nomɨnantɨ ikuki axɨna kɨx tyopiki axti Cristo ityoximianatiyɨ auki noñemaxtiatoe nauki akonti utaku.

³Axtɨ uikokota bakɨpukux uiti Tupax, ñemanauntu usuputakati.

⁴Tapɨ axtɨ anati naki nanti: “Axɨñɨ isuputakati Tupax”, tapɨ yakɨpukuxti chikokotatipɨ, taruku ñapantuxti, chɨnantipɨ axɨna ñemanauntu.

⁵Tapɨti naki ikokotati yakɨpukuxti Tupax, tyonenti naki makumananaunxti takana ñakumananaunkuxti Tupax tyonenti naki ñemanauntu isuputarati Tupax.

⁶Axti naki nanti anati chepeti Tupax, tari aisamunenti nisɨborikixhti takana nisɨborikixhti Jesucristo.

⁷Masarukityaiki, axɨna bakɨpukux xhakonomoka aume chɨtɨpɨ aɨbo: tyone axɨmanu tɨkañe apasutiu aukiapae maɨbo. Axɨna bakɨpukux nanankax tyone axɨna tɨtusiu aume.

⁸Tapɨ axɨna xhakonomoka aume tyone axɨna aɨbo bakɨpukux, ñemanauntu tusiu aume takanaintyo ɨmoti Cristo, tyopiki axɨna tomikianene sɨrotɨ nensokox tapɨ nanentax ityusiankanɨ axɨna ñemanauntu basarux.

⁹Axti naki nanti anati au nanentax, ta chuxiampɨ uiti ɨmoti yarukityoxti, anatiki au tomikianene.

¹⁰Axti naki kuasɨrɨti kiatax ɨmoti anati au nanentax, champɨ isane uiche atapeneti.

¹¹Tapɨti naki chuxiampɨ uiti ɨmoti yarukityoxti anati au tomikianene, chɨtusiupɨ ɨmoti kauta niyɨkɨxti, tyopiki supusuti ui axɨmanu tomikianene.

¹²Masaɨtaiki, xhakonomoka aume tyopiki axti Tupax moximiakana uiti nomɨnantɨ aboi yotopiki axɨba isamutenti Jesucristo.

¹³Axaño mayarusɨrɨka, xhakonomoka aume tyopiki tausuputakati naki anankatiatai auki ñemonkox. Mayaɨka, xhakonomokaityo aume tyopiki chautapenekapɨ uiti chobores.

¹⁴Xhakonomoka aume, axɨbama isaɨtaiki, tyopiki ausuputakati naki Uyaɨ. Xhakonomoka aume, mayarusɨrɨka, tyopiki ausuputakati axti naki anankatiatai aukiapae ñemonkox. Xhakonomokaityo aume mayaɨka, tyopiki aruku nuxia aume apasutiutyo nuraxti Tupax au nabausasɨ, tyopiki chautapenekapɨ uiti chobores.

¹⁵Tapɨ auxianka apisamune takana axɨbama isamutema nomɨnantɨ iku axɨna kɨx, tapɨ apisamutentyo axɨna isamutema. Axɨbama isamutema sane, chɨkuasɨrɨtipɨ Tupax ɨmoma naki Uyaɨ.

¹⁶Tyopiki axɨba ityoximiatama axɨbama ikuki axɨna kɨx chɨkuantiompɨ esakiti Uyaɨ, ta ikuki axɨnantai kɨx. Tyoneio axɨba xhanxɨma aityoximiama oemo: axɨba chomixhampɨ nuxiantɨmoma mañoñɨnka, axɨna nuxianka oñenaxine nanaiña axɨna bastai, axɨnaintyo nupukɨnunku aɨbu taruk noñenaxi.

¹⁷Axɨna kɨx tɨniyɨkɨx atakɨru, aɨbu nanaiña axɨba chomixhampɨ nixhantɨmo. Tapɨti naki isamutenti nixhantɨmoti Tupax champɨ nityakɨru nisɨborikixhti.

¹⁸Masaɨtaiki, tyone axɨna tyakɨrux naneneka, axɨna kɨx konto ñana takɨrusu. Axaño tɨtusiu aume axtɨ tɨsaimia axɨmanu nityakɨrux kuatati ñana axti naki chuxiampɨ uiti ɨmoti Jesucristo. Sane naukiche ixhanka suraboi ausukarɨ, tɨtaboma sɨrɨmanama axɨbama chuxiampɨ uimia ɨmoti Cristo, uixh atusi oemo ta tɨsaimia axɨmanio tyakɨrux naneneka.

¹⁹Axɨmanuma chuxiampɨ uimia ɨmoti Cristo taikiana aiyoberabaramakɨ ochepe, ñemanauntu chɨtɨpɨ usarukimia. Tyopiki axtɨ ñemanauntupɨ tyonempɨma usarukityaiki sɨsiopɨma ochepe. Uxiante sane nauki atusi nuxia ta chɨnamanaiñampɨ tyonema axɨbama usarukityaiki.

²⁰Axti Cristo, naki champɨ nomɨnantɨ kɨtɨpɨti, iñanati pese año pɨnanakimia axɨbama ikuki axɨna kɨx, uiti toxioti Espíritu Santo aume, namanaiña axaño ausuputakai axɨna ñemanauntu.

²¹Sane naukiche xhakonomoka aume, tyopiki tusiu iñemo axaño ausuputakai axɨna ñemanauntu tusiuityo aume axti naki isuputakaiti chɨmapañantipɨ.

²²¿Ñakuti naki ñapanx? Tyonentiapae naki nanti axti Cristo chityonentipɨ Mesías.

²³Axti naki chikokorotipɨ Jesús, champɨityo axtɨ ikokoroti Tupax, tapɨti naki ikokoroti Jesús, ta ikokorotityo Yaɨtoti.

²⁴Sane naukiche apiñaɨbu au nabausasɨ axɨmanu manityakax amonkoi auki maɨbo apikokoroti Jesús. Axtɨ axɨna amonkoi auki maɨbo sɨsio au nabausasɨ, axaño abaka chepeti Aɨtoxti chepetityo Yaɨtoti.

²⁵Tyoneampae axɨna ensɨmunu tɨkañe uiti Jesucristo oemo: axɨmanu osɨborikibo champɨ nityakɨrux.

²⁶Xhakonomoka aume kɨtɨpɨ axɨbama xhanxɨma atachemakama aume.

²⁷Axaño anati Espíritu Santo aukɨtɨpɨ axɨna uiche aukurusɨka uiti Jesucristo, sane champɨ nɨmocheti kiatax nauki anunekati aume, tyopiki axti Espíritu naki toxioti aume uiti aiñununekanati año nanaiña, axɨmanio ñanunekasaxti tyoneio ñemanauntu chɨtɨpɨ mapankax. Tapɨ apiñakaño pese pɨnanakiti Cristo, sane takana manunekanati Cristo aume.

²⁸Sane kaɨma masaɨtaiki, abasikia chepeti Cristo, sane axtɨ kuatati tato oñonkatɨ ɨmoti tapɨ ane uiche okɨso ñɨnanati.

²⁹Axaño tusiu aume, axti Jesucristo isamutenti nanaiña axɨna uxia ɨmoti Tupax, tari atusityo aume ta namanaiña axɨbama isamutema axɨna uxia ɨmoti Tupax tyonema axɨbama aɨtoxti.