Read Chiquitano APOCALIPSIS 10 Bible Online

APOCALIPSIS 10 - Chiquitano bible

APOCALIPSIS 10

¹Auki yasakatɨ ɨmoti kiatax ángel taruku nɨriakaxti, kuatati auki napes eana taman kɨsaɨbox. Ane taman nixhixh onɨ nityanuxti, nisuxti kuara takana sux nityapaxti takana nompakɨoka pes nubakax.

²Ane mekuti taman chimiamantai kichonimiakax korobo aurɨbo, iñatati nepanaunku nipopesti onɨ narubaityu tux, tapɨ nepau nipopesti iñatati iku kɨx.

³Auki kɨpurabo nuxia nityosibixhti, takana nityosibi nuitɨmɨx, naukiche tosibikoti rabotio siete tosibikia takana mapaesoka.

⁴Naukiche tupanityana axɨmanio siete mapaesoka, tɨniyɨkɨxɨpɨ xhakonomo. Auki ñonkoi tosibixh auki napes, nantɨ iñemo: “Aiñaɨbu aemoantai axɨmanu nubura axɨmanio siete mapaesoka, tapɨ aikonomota.”

⁵Auki axti maniki ángel yasakatɨ ɨmoti atɨraiti onɨ narubaityu tux ikuityo kɨx, ikiampetati nepanaunku ne'esti au napes

⁶auki nanti au nɨrixhti Tupax au nɨrixhti naki champɨ nityakɨru nisɨborikixhti, axti naki nisamukuche napes, axɨna kɨx, narubaityu tux nanaiñaintyo axɨba abe ubau. Nanti: “Chauki tɨnityakɨrux,

⁷ta axtɨ iñatai ñana axɨmanu nanenes auche axti maniki kiatax ángel ipunutati nibuxixhti, iñatai tyakɨru axɨmanu nixhantɨmoti Tupax aisamunenti, takana axɨmanu urapoiti tɨkañe ɨmo axɨmanuma baserebioma ɨmo axɨbama urapoimia noñemaxti.”

⁸Axɨmanu tosibixh ñonkoi, kuatɨ auki napes, manityana tatityo iñemo, nantɨ: “Akosi asuriu axɨmanu kichonimiakax aurɨbo ane mekuti maniki ángel anati atɨraiti onɨ narubaityu tux onɨtyo kɨx.”

⁹Yakatɨ esati maniki ángel xhankiyo pɨnanakiti axɨmanu kichonimiakax korobo, auki nanti iñemo: “Asusiu anse. Aikɨ usiña takana nu'ux, axtɨ tɨtane akɨbobikɨ ta pichananene.”

¹⁰Yasutiu axɨmanu kichonimiakax mekukiti maniki ángel, auki ixhate. Ñemanauntu, usiña saiñɨ takana nu'ux, naukiche tɨpiunkunu sobi ñonkisio pichananene sɨbobiñɨ.

¹¹Auki namatɨ iñemo: “Bakɨpukux aemo uraboi axɨba omixhia nixhantɨmoti Tupax aisamunenti ɨmo mayɨriabuka au nanaiña iku axɨna kɨx.”