Read Chiquitano APOCALIPSIS 11 Bible Online

APOCALIPSIS 11 - Chiquitano bible

APOCALIPSIS 11

¹Toxio uimia iñemo taman soema uiche xhameninaka takana bapax, auki namatɨ iñemo: “Atɨsai akosi aimeninaka nipoxti Tupax axɨmanuintyo altar, aipiakɨmunkusuma axɨmanuma manaunuma akamanu.

²Tapɨ aimeninakata axɨmanu nikorerox kɨmenu auki tyɨrɨpo, tyopiki tɨtoxio ɨmoma axɨbama chikokoropɨmañɨ, axɨbama ikɨmotema ñana onɨ Jerusalén ñome cuarenta y tox panka.

³Xhakɨpuka ñana ɨmoma axɨbama toxɨma uiche uraboimia ausukarɨ axɨna nixhantɨmo isamune aɨbu naibixhimia axɨna axipiarasa, ñome trex naskɨbeka aɨbu taman nikɨmuintyax pɨrɨkɨ.”

⁴Axɨmanuma toxɨma urapoimia noñemaxti Tupax ta tyoneio axɨmanio tox soeka olivo chepe axɨmanio tox kantreruka abe esati Tupax, axti naki yɨriabux iku axɨna kɨx.

⁵Axtɨ anati naki xhanxti ane kausane uiti ɨmoma, axɨma emekana ñana uimia pes aikimia uixh omo nikɨtɨpɨxɨma axɨmanuma chuxiampɨ uimia ɨmoma chepe nikonkoxɨma uimia.

⁶Axɨma ane nɨriakaxɨma nauki tapɨ xobeoka axɨmanio naneneka auche aboma urapoimia axɨna nixhantɨmo ausukarɨ, anentyo nɨriakaxɨma nauki somoso uimia tux ɨmo notox nauki atakisɨrɨma uimia nanaiña axɨna ane iku kɨx ui chɨtamampatai noxokoka, isiu nixhankaxɨma.

⁷Axtɨ tiñatai tyakɨru aɨbu axɨmanu nixhakɨpuku ɨmoma uraboimia, axɨmanu yarusɨrɨx numukianx kuatɨ auki axɨmanu kɨtubixh tomikianene baiyo aɨbuma, auki koiñoma uixh.

⁸Nikɨtɨpɨxɨma sɨsio akɨ yusiu kutubiuka axɨpeku axɨmanio poka kauta aityabairomati Yɨriabux tɨkañe naukiche ityakubaxiromati kɨtɨpɨ kurusɨx. Mañoñɨnka ichepekatama nobɨrixh axɨmanio poka aɨbu Sodoma chepe Egipto.

⁹Trex naneneka kɨmuintya pɨrɨkɨ, axɨbama mañoñɨnka auki kiatax narɨkɨkixh, kiatax ñanityakaxɨma astaimia nikuntuxɨma chichebopɨ uimia nauki aiñama kɨtu.

¹⁰Axɨbama po'osoma iku axɨna kɨx pukɨnuñama ñana ui nikonkoxɨma. Ui nipukɨnunkuxɨma makumananama ɨmomantoe, tyopiki axɨmanuma toxɨma urapoimia noñemaxti Tupax, au ñakionkoxɨma taruku nityakisɨrɨkɨxɨma uimia.

¹¹Ta yopɨrɨkɨ trex naneneka kɨmuintya pɨrɨkɨ, axti Tupax sɨborikoma tatityo uiti auki atɨraimia tatityo, namanaiña axɨbama asarama taruku nixhukuxɨma.

¹²Auki axɨmanuma toxɨma urapoimia noñemaxti Tupax onkoimia tosibixh auki napes, nantɨ sane ɨmoma: “¡Ausiapata tauna!” Auki sɨromatɨ au napes iku taman kɨsaɨbox, sukarɨma namanaiña axɨmanuma chuxiampɨ uimia ɨmoma.

¹³Isiukai kaɨma paichokonono kɨx, ui axɨmanu nipiaichokonoko kɨx butaɨbɨko mɨmanantai aruki axɨmanio poka, auki koiñoma siete mil mañoñɨnka. Axɨmanuma sɨborikomainki, aɨbu nixhukuxɨma yarusɨrɨx nɨrixhti Tupax uimia, naki anati au napes.

¹⁴Sɨrotɨ axɨmanu kiatax takisɨrɨkɨx, tapɨ axɨmanu kiatax kuatɨ saimia.

¹⁵Axti maniki kiatax ángel ipunutati nibuxixhti, auki rabotio tosibikia au napes, monantɨ sane: “Nɨriakax ikuki axɨna kɨx tyone nesaxti Tupax chepeti Aɨtoxti axti Mesías, yɨriabuxɨma ñana ñome nanaiña naskɨbeka.”

¹⁶Auki axɨmanuma veinticuatro mayɨriabuka amonkoma tɨmonsoma au nityɨmoxɨma esati Tupax, bachesoiyoma iñatai nisuxɨma akɨ sane manaunuma ɨmoti Tupax,

¹⁷namatɨ: “Supachampienkaka aemo, Yɨriabux, Tupax, taruku nakusɨu, anankɨatai tɨkañe sɨsiokɨtyo ñana, tyopiki asutiu yarusɨrɨx nɨriaka yɨriabuxɨkɨ kaɨma.

¹⁸Namanaiña axɨbama chikokoropɨmakɨ tɨborikoma aemo. Ta chauki tiñatai axɨna nanenes ɨmo natɨbori. auche ñana astai nisɨborikixhimia axɨbama tɨkoiñoma. ane ñana toxiobo obi ɨmoma axɨbama urapoimia nanityaka axɨbama champɨ nipɨnatema axɨbamaintyo manaunuma aemo, mayɨriabuka chepe masiomanka. Koiñoma obi axɨbama iñamesokotama axɨna kɨx.”

¹⁹Auki aurɨbo axɨmanu nipoxti Tupax ane au napes, akamanupo ananka axɨmanu uiche atusi ta anati ochepe. Auki masɨnaka, taruku nikɨpurax, tosibikia auki paichokonono kɨx bupakio sɨrɨmana noñoka.