Read Chiquitano APOCALIPSIS 19 Bible Online

APOCALIPSIS 19 - Chiquitano bible

APOCALIPSIS 19

¹Yopɨrɨkɨ axɨba sane, ñonkoi nityosibixhimia axɨbama sɨrɨmanama au napes namatɨ sane: “¡Aleluya! Axɨna maximikatax, nanentakax axɨnaintyo nɨriakax tyoneio nanaiña ɨmoti Tupax.

²Tyopiki axti besɨro ñapanaunkuxti isiuki axɨna ñemanauntu nuraxti. Tyopiki takisɨrɨ uiti axɨmanu yarusɨrɨx Babilonia ui axɨna chuxiampɨ nisɨborikixh mameso nisɨborikixhimia mañoñɨnka ikuki axɨna kɨx. Takisɨrɨ uiti Tupax tyopiki koiñoma uixh axɨbama baserebioma ɨmoti.”

³Auki namatɨ tatityo: “¡Aupukɨnu! Nausi axɨmanu pes uiche omo Babilonia champɨ ñana nityakɨru niyɨkɨx ape.”

⁴Auki axɨmanuma veinticuatro mayɨriabuka chepe axɨmanuma cuatro sɨborikoma manaunuma ɨmoti Tupax maniki anati tɨmonsoti au nityɨmoxti. Auki namatɨ: “¡Amén! ¡Tari namanaiña anauma ɨmoti Tupax!”

⁵Auki nityɨmoxti Yɨriabux rabotɨ taman tosibixh, nantɨ sane: “¡Apanau ɨmoti naki Tupax oemo namanaiña axaño mayɨriabuka chepe masiomanka, namanaiña axɨbama apaserebikia ɨmoti axɨbama apanaunka ɨmoti!”

⁶Auki ñonkoityo axɨmanu takana nityosibixhimia axɨbama sɨrɨmanama, takanaintyo nosɨkɨ yotobɨratax takana mapaesox. Namatɨ: “¡Aleluya! Tyopiki tɨyɨriabuxti naki taruku Nɨriakaxti, axti naki Tupax oemo.

⁷Upukɨnuna, yarusɨrɨx nupukɨnunku yarusɨrɨxtyo nɨrixhti osoi, tyopiki iñatai axɨna nanenes ɨmo nityɨbɨbɨ axɨmanu Nobixhax. Axɨmanu nikɨpostoti tɨkoñokono:

⁸chebo ɨmo uiti Tupax aiña kɨtɨpɨ axɨna koñoxtai naibixh, purusubi kuaratai, tyopiki axɨmanu naibixh tyone axɨna besɨro nisɨborikixhimia axɨbama champɨ nomɨnantɨ uimia.”

⁹Axti maniki ángel nanti iñemo: “Aikonomo axɨna sane: ‘Taruku nipukɨnunkuxɨma ñana axɨbama ane batasukux ɨmoma ɨmo nityɨbɨbɨ axɨmanu Nobixhax. Nantityo iñemo.’ ” Nantityo: “Tyoneio axɨba ñemanauntu nuraxti Tupax.”

¹⁰Auki yachesoikia yobesa nipopesti maniki ángel, nauki xhanau ɨmoti, tapɨti nanti iñemo: “Tapɨ sane obi, tyopiki axɨñɨ yaserebikiaityo ɨmoti Tupax, takana axɨkɨ chepe axɨbama makiataka arukityaiki, axɨbama aruku nuxia ɨmoma uraboimia nuraxti Jesús. Anau ɨmoti Tupax.” Tyopiki axɨmanu manunekakax kɨtɨpɨti Jesús, tyone axɨna uiche manityanama axɨbama profetas.

¹¹Auki yasakatɨ ɨmo napes aurɨbo. Yasakatɨ ɨmo taman kabayux purusubi, axti maniki anati chaku, nɨrixhti Ñemanaunkuxatoe Aruku ɨmoti, tyopiki besɨro nɨriakaxti axtɨ sɨrotitɨ ɨmo baikixh.

¹²Nisɨtoxti bukuara takana pes, abe ityati sɨrɨmana nityarusɨxti, ane korobo nɨrixhti kɨtɨpɨti axtiatai tusiu ɨmoti.

¹³Ane naibixhti ununu au notox, nɨrixhti tyone: Nuraxti Tupax.

¹⁴Nesaxti apóstoles axɨbama sɨrɨmana ángeles auki napes, purusubi nuxia naibixhimia, aboma yuchaku kabayuka bupurusubi.

¹⁵Kuatɨ aikiti taman kɨses otoro nuxia, uiche obɨri uiti ɨmo mañoñɨnka ikuki axɨna kɨx. Bakɨpuruti ñana ɨmoma aɨbu yerux mekuti. Uixhtiatoe ñana aityaichometi axɨmanu uva nauki aikiaɨbuti axɨmanu vino tyone axɨna takana tarukapae nityɨborixhti Tupax naki taruku nɨriakaxti.

¹⁶Iku nikɨbuxixhti kɨtɨpɨtyo nityapaxti ane korobo axɨna sane: “Yɨriabux ɨmo mayɨriabuka.”

¹⁷Auki yasakatɨ ɨmoti taman ángel, atɨraiti iku sux, rabotɨ nuxia nityosibixhti ñome nanaiña paxupakikia axɨba bupasoro iku napes: “¡Ausiapata apiyoberabasaño ɨmo niyasapataxti Tupax,

¹⁸nauki aubaka nañetu axɨbama mayɨriabuka, masortaboka mañoñɨnka axɨbama arukapae ɨmoma ɨmo baikixh, numañetu kabayuka nañetuxɨmaintyo axɨbama amonkoma yuchaku, nañetu namanaiña: axɨbama kumanakaka axɨbamaintyo chɨtɨpɨ makumanakaka, nañetu masiomanka chepe mayɨriabuka!”

¹⁹Yasakatɨ ɨmo axɨmanu numukianx chepema axɨmanuma mayɨriabuka ikuki axɨna kɨx aɨbu nesaxɨma ejército, iyoberabaramakɨ nauki aimia aɨbuti maniki anati chaku kabayux aɨbumaintyo axɨmanuma aboma chepeti.

²⁰Axɨmanu numukianx amanapo, chepeti maniki manityanati chɨtɨpɨ ui noñemaxti Tupax maniki masamunuti axɨba champɨ tubastai sukarɨti. Axti maniki chɨtɨpɨ profeta matachemakanati ɨmoma axɨbama chebo uimia aɨro kɨtɨpɨma nikoro nɨri axɨmanu numukianx manaunumaintyo ɨmo nausɨpɨx. Auki axɨmanu numukianx chepeti maniki manityanati chɨtɨpɨ ui noñemaxti Tupax penekoma auki nisɨborikixhimia au axɨmanu narubaityu pes kauta omo axɨmanu azufre.

²¹Tapɨ axɨmanuma makiataka koiñoma ui axɨmanu kɨses kuatɨ aikiti maniki anati chaku kabayux purusubí, nanaiña axɨmanio paxupakikia ubabeko nuxia ui nañetuxɨma.