Read Chiquitano APOCALIPSIS 20 Bible Online

APOCALIPSIS 20 - Chiquitano bible

APOCALIPSIS 20

¹Auki yasakatɨ kɨmenuti maniki taman ángel kuati auki napes ane uiti axɨmanu uiche aurɨbo axɨmanu yarusɨrɨx kɨtubixh tomikianene anentyo mekuti taman yarusɨrɨx karenax.

²Axti maniki ángel eno uiti axɨmanu noixhobox, axɨmanu chaɨbopɨ nakax ta tyonenti chobores, auki tomoeno uiti ñome mil naskɨbeka.

³Yarutaɨbutati au axɨmanu yarusɨrɨx kɨtubixh tomikianene, akamanu amanapo uiti, tomoeno uiti tyurux tapɨ sɨrotɨ atachemaka ɨmo mañoñɨnka iku kɨx chepe axtɨ tomenotɨ axɨmanio mil naskɨbeka, axtɨ tomenotɨ ñana emekana ñome mantukubatai naneneka.

⁴Auki yasakatɨ ñome nityɨmo mayɨriabuka, akamanu amonkoma tɨmonsoma axɨmanuma toxio ɨriakaboma nauki asaraimia nisɨboriki makiataka. Yastaityo nausɨpɨxɨma axɨmanuma tɨsɨro nityanuxɨma tɨkañe tyopiki aruku nuxia ɨmoma uraboimia nɨrixhti Jesús axɨmanuintyo nuraxti Tupax. Axɨma chɨmanaunuma ɨmo axɨmanu numukianx ɨmointyo axɨmanu nausɨpɨtux, chichebopɨtyo uimia aɨro nikoro nɨrixh ikutama kɨtɨpɨtyo ne'esɨma. Auki yastai ta sɨborikoma tato auki yɨriabuxɨma chepeti Cristo ñome mil naskɨbeka.

⁵Tapɨ axɨmanuma makiataka makoiñoka chɨsɨborikopɨma tato yopɨrɨkɨ axɨmanio mil naskɨbeka. Tyone axɨna kusɨrɨbo sɨborikixh tato.

⁶¡Tari taruku nipukɨnunkuxɨma axɨbama kusɨrɨboma asɨborimia tato, tyopiki tyonema axɨbama champɨ nomɨnantɨ uimia! Axɨmanu kiatax konkox champɨ nɨriakax ɨmoma, tyopiki tyonema ñana sacerdotes ɨmoti Tupax ɨmotityo Cristo, yɨriabuxɨma chepeti ñome mil naskɨbeka.

⁷Axtɨ tomenotɨ axɨmanio mil naskɨbeka, emekanati tato chobores,

⁸sɨrotitɨ kaɨma atachemakati iku nanaiña kɨx ɨmoti Gog chepeti Magog, tarukapae nububikixhimia takana kɨosox abeuki narubaityu tux, oberabarama ñana uiti ɨmo baikixh.

⁹Sɨromatɨ ñana iku nanaiña kɨx, pesuarama ñana tyupekuma axɨbama ikokoromati Tupax, chepe axɨmanio poka taruku nikuasɨrɨkɨx ɨmoti, kuatɨ ñana pes auki napes ɨroma namanaiña uixh.

¹⁰Tapɨti maniki chobores, uiche atapenema, penekoti au axɨmanu narubaityu pes aɨbu azufre, axɨmanu kauta peneko axɨmanu numukianx ichepeti maniki chɨtɨpɨ profeta. Akamanu ñana champɨ nityakɨru nityakisɨrɨkɨxɨma au sapes takanaintyo au tobixh.

¹¹Auki yastai taman yarusɨrɨx nityɨmoxti Yɨriabux purusubi, axtityo maniki tɨmonsoti iku. Sukarɨti kaɨma omensoro kɨx chepe napes, chanantopɨ anati astaiti tato.

¹²Auki yasakama axɨbama tɨkoiñoma, mayɨriabuka takanaintyo masiomanka, atɨraimia esa axɨmanu nityɨmoxti Yɨriabux. Auki ubaurɨbo axɨmanio kichonimiakaka, aurɨboityo axɨmanu kiatax kichonimiakax, tyone axɨmanu uiche ane sɨborikixh. Axɨmanuma tɨkoiñoma astaiti Tupax nisɨborikixhimia isiuki axɨna isamutema tɨkañe isiukityo axɨmanio ane korobo yuku axɨmanio kichonimiakaka.

¹³Axɨmanuma koiñoma au narubaityu tux sɨromatɨ esati Tupax nauki asaraiti nisɨborikixhimia, saneityo ui axɨmanuma amonkoma esati chobores. Namanaiña axɨbama tɨkoiñoma astaiti Tupax nisɨborikixhimia isiuki axɨna isamutema tɨkañe.

¹⁴Auki axti chobores penekoti au narubaityu pes. Axɨna narubaityu pes tyone axɨmanu kiatax konkox,

¹⁵akamanuintyo penekoma namanaiña axɨbama champɨ nɨrixhimia iku axɨmanu kichonimiakax ɨmo sɨborikixh.