Read Chiquitano APOCALIPSIS 4 Bible Online

APOCALIPSIS 4 - Chiquitano bible

APOCALIPSIS 4

¹Auki kaɨma, yasakatɨ ɨmo taman tyurux aurɨbo au napes. Axɨmanu tosibixh kusɨrɨbo ñonkoi, takana nipuku buxixh, nantɨ iñemo: “Ariaku tauna ape ityusiankata kaɨma asukarɨkɨ axɨba omixhantenki yopɨrɨkɨ axɨba pikiataka.”

²Isiukai sɨro sɨtɨpɨñɨ noñemaxti Espíritu Santo, yastai taman nityɨmoxti Yɨriabux au napes, anati maniki tɨmonsoti iku axɨmanu tɨmox.

³Axti maniki tɨmonsoti iku axɨmanu tɨmox nanaiña nikɨtɨpɨxti kuara, takana axone koñoxtai kanx. Tyupeku axɨmanu tɨmox ane taman nixhixh kuara takana axɨna koñoxtai kanx.

⁴Abetyo pikiataka veinticuatro nityɨmo mayɨriabuka, kauta amonkoma tɨmonsoma veinticuatro mayɨriabuka: purusubi naibixhimia ane nityarusɨxɨma ityama uxiante ui oro.

⁵Auki axɨmanu nityɨmoxti Yɨriabux chaiyatai masɨnaka, tosibikia mapaesoka. Esa axɨmanu nityɨmoxti Yɨriabux omomo siete basaruka, tyoneio axɨmanio siete nausɨpɨxti Tupax

⁶esa axɨmanu nityɨmoxti Yɨriabux anentyo axɨmanu takana narubaityu tux, anentaxtai pɨrɨkɨ. Akamanu kɨmuintya kauta ananka axɨmanu nityɨmoxti Yɨriabux, akamanuintyo tyupeku, aboma cuatro axɨbama sɨborikoma, ataso nikɨtɨpɨxɨma oboi nisɨtoxɨma, kɨmenuma takanaintyo chakuma.

⁷Axti maniki kusɨrɨboti axɨpekukimia takana taman nuitɨmɨx, axti maniki kiatax takana naka torox, tapɨti kiatax takana nakaxti ñoñɨnx, axti maniki tyakɨrux takana nutamonxixh basoro.

⁸Namanaiña axɨmanuma sɨborikoma abe seixh nipiaxɨma takana nutaumanka. Abetyo niyosɨtox omonɨ, aunaintyo ñokiana. Chɨmatochenkopɨma au sapes au tobixh namatɨ sane: “¡Santuxti, santuxti, santuxti maniki Yɨriabux, Tupaxti taruku nɨriakaxti, tyonenti tɨkañe ta tyonenti axti naki kuabotɨ!”

⁹Axtɨ machampienkanama masonioma axɨmanuma cuatro ɨmoti maniki tɨmonsoti au nityɨmoxti, naki sɨborikoti ñome nanaiña naskɨbeka.

¹⁰Axɨmanuma veinticuatro mayɨriabuka bachesoiyoma esati manaunuma ɨmoti, auki yarɨtaɨbutama nityarusɨxɨma esa axɨmanu nityɨmoxti, namatɨ:

¹¹“Axɨkɨ Yɨriabuxɨkɨ Tupaxɨkɨtyo suiñemo, koñotɨ aemo asuriu nanentakax, manaunkux chepe nɨriakax, tyopiki nasamuku nanaiña axɨba abe. Ui noñema omixhante uixhtyo abe.”