Read Chiquitano APOCALIPSIS 5 Bible Online

APOCALIPSIS 5 - Chiquitano bible

APOCALIPSIS 5

¹Au nepanaunku ne'esti axti maniki tɨmonsoti au nityɨmoxti yasakatɨ ɨmo taman kichonimiakax korobo iku tyɨrɨpo aukipoityo ananka kiñoeno, abe siete nityomoentox.

²Auki yasakatityo ɨmoti taman ángel taruku nɨriakaxti ñankitioti ui rabotɨ nuxia nityosibixhti: “¿Ñakuti naki koñotɨ ɨmoti aiyaɨbuti axɨmanu kichonimiakax kiñoeno aikiompɨnatityo axɨmanio nityomoentox?”

³Champɨti au napes iku kɨx kiana kɨx axti naki uiche aiyaɨbuti nauki asaraiti axɨmanu kichonimiakax kiñoeno.

⁴Tapɨ axɨñɨ tarukapae nisareo, tyopiki champɨti tabɨko naki koñotɨ ɨmoti nauki aiyaɨbuti axɨmanu kichonimiakax kiñoeno.

⁵Tamanti axɨpekukimia axɨmanuma mayɨriabuka nanti iñemo: “Tapɨ areoka, tyopiki axɨmanu Nokɨtɨrɨkiox axɨpekukimia axɨbama aɨtoxti Judá, nityakɨbaɨtuxti David chɨtapenekotipɨ uiti kaɨma aurɨbo axɨmanu kiñoeno kichonimiakax uitityo aikiompɨnati axɨmanio siete nityomoentox.”

⁶Auki kɨmuintya axɨmanu nityɨmoxti Yɨriabux axɨmanumaintyo cuatro sɨborikoma, kɨmuintya axɨmanuma mayɨriabuka, yastai taman nobixhax. Ananka atɨrai, tusiu kɨtɨpɨ ta tɨkoiño tɨkañe. Abe siete nityapakɨx sietetyo nisɨtox, tyoneio axɨmanio siete nausɨpɨxti Tupax bakɨpukux ñome amenotɨ iku nanaiña kɨx.

⁷Axɨmanu Nobixhax sɨrotɨ aikia axɨmanu kichonimiakax kiñoeno auki nepanaunku ne'esti maniki tɨmonsoti au nityɨmoxti.

⁸Aɨbapae aiñenti axɨmanu kichonimiakax kiñoeno, axɨmanuma cuatro sɨborikoma chepe axɨmanuma veinticuatro mayɨriabuka bachesoiyoma esa axɨmanu nobixhax. Namanaiña ane nityaboxioxɨma, abetyo mekuma nichapoxɨma omixhante ui oro ubataso ui incienso, tyone axɨna neankaxɨma axɨbama champɨ nipɨnatema.

⁹Masoniomaintyo axɨna sonixh aɨbo: “Axɨkɨ koñotɨ aemo asarai axɨmanu kichonimiakax kiñoeno aikiompɨnaintyo axɨmanio nityomoentox, tyopiki axɨkɨ akonka ɨmo makumanatax. Ui noto nakɨtɨpɨ kuamatɨ tato obi esati Tupax namanaiña mañoñɨnka ikuki axɨna kɨx.

¹⁰Yarusɨrɨx nɨriakaxɨma obi, sacerdotexɨma obi ɨmoti Tupax, ane ñana nɨriakaxɨma iku axɨna kɨx.”

¹¹Auki yasakatɨ, ñonkoi ñanityakaxɨma sɨrɨmanama ángeles aboma tyupeku axɨmanu nityɨmoxti Yɨriabux, axɨmanuma sɨborikoma axɨmanumaintyo mayɨriabuka. Taruku nububikixhimia,

¹²namatɨ aɨbu nityosibixhimia: “¡Axɨmanu Nobixhax koiño ɨmo makumanatax koñotɨ ɨmo asuriu nɨriakax axɨnaintyo enaxibo, ñapanaunkubu takanaintyo axɨna ikusɨubu, manaunkux nanentakax axɨnaintyo masonikixh!”

¹³Ñonkoityo ta nanaiña axɨba omixhante uiti Tupax au napes, iku kɨx, kiana kɨx, takanaintyo au narubaityu tux, munantɨ: “¡Ɨmoti naki tɨmonsoti iku nityɨmoxti ɨmointyo axɨmanu Nobixhax, nanaiña masonikixh, manaunkux, nanentakax chepe nɨriakax ñome nanaiña naskɨbeka!”

¹⁴Axɨmanuma cuatro sɨborikoma iñumutama: “¡Amén!” Axɨmanuma veinticuatro mayɨriabuka bachesoiyoma auki manaunuma.