Read Chiquitano APOCALIPSIS 7 Bible Online

APOCALIPSIS 7 - Chiquitano bible

APOCALIPSIS 7

¹Auki, yasakatɨ ɨmo axɨmanuma cuatro ángeles atɨraimia au cuatro nityoripiakɨka, iyaxitama axɨmanio cuatro makiɨtɨka, tapɨ bausukɨro iku kɨx ɨmo narubaityu tux ñomentyo soeka.

²Yasakatityo kɨmenuti kiatax ángel kuatati auki tansɨrɨ, ane uiti axɨmanu uiche akonomoti Tupax axti naki sɨborikoti. Axti maniki ángel rabotɨ nuxia nityosibixhti ɨmo axɨmanuma cuatro ángeles axɨmanuma toxio ɨmoma ɨriakaboma nauki aiñamesokoma kɨx chepe narubaityu tux:

³“¡Tapɨ ane kausane aboi ɨmo kɨx ɨmo narubaityu tux ñomentyo soeka, chepe axtɨ tɨkorobo osoi ikutama nɨrixhimia axɨbama aɨtoxti Tupax!”

⁴Auki ñonkoi nububikixhimia axɨmanuma korobo nɨrixhimia: ciento cuarenta y cuatro mil nububikixhimia axɨpekuki namanaiña axɨmanuma aɨtoxti Israel.

⁵Koroma doce mil axɨpekukimia axɨmanuma aɨtoxti Judá, doce mil axɨpekukimia axɨmanuma aɨtoxti Rubén, doce mil axɨpekukimia axɨmanuma aɨtoxti Gad,

⁶doce mil axɨpekukimia axɨmanuma aɨtoxti Aser, doce mil axɨpekukimia axɨmanuma aɨtoxti Neftalí, doce mil axɨpekukimia axɨmanuma aɨtoxti Manasés,

⁷doce mil axɨpekukimia axɨmanuma aɨtoxti Simeón, doce mil axɨpekukimia axɨmanuma aɨtoxti Leví, doce mil axɨpekukimia axɨmanuma aɨtoxti Isacar,

⁸doce mil axɨpekukimia axɨmanuma aɨtoxti Zabulón, doce mil axɨpekukimia axɨmanuma aɨtoxti Kiosen, doce mil axɨpekukimia axɨmanuma aɨtoxti Benjamín.

⁹Pɨrɨkɨ axɨna sane, auki yastai taruku nububikixhimia ikuki nanaiña kɨx, aruki nanaiñantai manityakaka. Amonkoma atɨraimia esa nityɨmoxti yɨriabux esaityo axɨmanu Nobixhax, tarukapae nububikixhimia champɨti tusiu ɨmoti mantukubuma. Amonkoma aɨbu purusubi naibixhimia. Anentyo nasu mutakɨx mekuma.

¹⁰Namanaiña kɨpurabo nuxia nityosibixhimia: “¡Axɨna maximiakatax oemo uiti Tupax axti naki tɨmonsoti au nityɨmoxti, uityo axɨmanu Nobixhax!”

¹¹Namanaiña axɨmanuma ángeles atɨraimia tyupeku axɨmanu nityɨmoxti yɨriabux axɨmanumaintyo mayɨriabuka axɨmanumaintyo cuatro sɨborikoma. Manaunuma ɨmo axɨmanu nityɨmoxti Yɨriabux iñatai akɨ nisuxɨma, auki manaunuma ɨmoti Tupax

¹²namatɨ: “¡Amén! Masonikixh, nɨriakax, mapanaunkux, machampienkakax, manaunkux, nɨriakax kusɨukux tari autoxi ɨmoti naki Tupax oemo ñome nanaiña naskɨbeka. ¡Amén!”

¹³Auki tamanti axɨpekukimia axɨmanuma mayɨriabuka ñankitioti xhopɨnanakiñɨ: “¿Ñakusanema axɨbama purusubi naibixhimia, aukiche ayematɨ?”

¹⁴“Tusiu aemo axɨkɨ yɨriabux”, iñumuta nuraxti. Auki nanti iñemo: “Tyonema axɨbama chɨkoiñopɨma ui axɨmanu tɨkañe taruku nityakisɨrɨkɨxɨma iku kɨx, axɨbama ipunusumiankatama naibixhimia ui noto axɨmanu Nobixhax.

¹⁵“Sane naukiche aboma esa nityɨmoxti Tupax, sapes tobixh baserebioma au nipoxti. Axti maniki tɨmonsoti au nityɨmoxti asaratitɨ tyakuma tyopiki anati chepema.

¹⁶Chanantopɨ atakisɨrɨma ui nikɨrɨpɨxɨma uityo nityosɨxɨma, chɨtakisɨrɨpɨmaintyo ui sux, chɨtakisɨrɨpɨmaintyo ui nipekixh.

¹⁷Tyopiki axɨmanu Nobixhax, ane kɨmuintya nityɨmoxti Yɨriabux, tyone ñana asaratɨ tyakuma sɨrotɨ ñana aɨbuma esa nantaityux kauta ane tux axɨna uiche asɨborimia, uiti Tupax ñana aisɨbuti nisukɨxɨma.”