Read Chiquitano APOCALIPSIS 8 Bible Online

APOCALIPSIS 8 - Chiquitano bible

APOCALIPSIS 8

¹Naukiche axɨmanu Nobixhax ikiompɨnata axɨmanu kiatax nityomoentox axɨmanu kichonimiakax kiñoeno, champɨ rabotɨ au napes ɨmo kɨmuintya horax.

²Auki yasakatɨ ɨmoma axɨmanuma siete ángeles amonkoma atɨraimia esati Tupax, botoxio ɨmoma siete buxikia.

³Auki kuatati kiatax ángel, aɨbu axɨmanu auche omo incienso uxiante ui oro, sɨsioti atɨraiti esa axɨmanu altar auki toxio ɨmoti chama nuxia incienso, nauki akumanati uixh iku axɨmanu altar uxiante ui oro axɨmanu ananka kɨmenu nityɨmoxti Tupax chepe axɨba neankaxɨma masantuka.

⁴Nausixh axɨmanu incienso sɨrotɨ ape mekukiti axti maniki ángel esati Tupax, yochepe axɨmanio neankaxɨma axɨmanuma champɨ nomɨnantɨ uimia.

⁵Auki axti maniki ángel aikianti axɨmanu nausɨx axɨmanu nausixh iñatamakatati ui sɨkɨbox aɨbu pes ikuki axɨmanu altar, aruraɨbuti iku kɨx. Auki rabotɨ nisɨux, tosibixh masɨnaka paichokonono kɨx.

⁶Axɨmanuma siete ángeles abe uimia axɨmanio siete buxikia tɨkoño uimia apunuma.

⁷Axti maniki kusɨrɨboti ángel ipunutati nibuxixhti, auki bupakio auki napes noñoka aɨbu pes korauru aɨbu notox. Omo kɨmuintya pɨrɨkɨ nikɨmuintya kɨx, chepetyo kɨmuintya pɨrɨkɨ nikɨmuintya soeka nanaiñaintyo naxchopɨro.

⁸Axti maniki kiatax ángel ipunutati nibuxixhti, auki pakio au narubaityu tux takana yirityux omo ui pes. Auki axɨmanu kɨmuintya pɨrɨkɨ nikɨmuintya narubaityu tux isamunɨ notox.

⁹Kɨmuintya pɨrɨkɨ nikɨmuintya axɨmanio bosɨboriko au narubaityu tux mokoiño, kɨmuintya pɨrɨkɨ nikɨmuintya axɨmanio canoa omiñaxio.

¹⁰Axti maniki kiatax ángel ipunutati nibuxixhti, taman yarusɨrɨx nostoñes, omo takana taman basarux, pakio auki napes omonɨ kɨmuintya pɨrɨkɨ nikɨmuintya nusɨruka chepe nantaityuka.

¹¹Axɨmanu nostoñes nɨrixh pichananekixh. Auki kɨmuintya pɨrɨkɨ nikɨmuintya axɨba tuka mopichananene, oboi axɨmanio tuka mopichananene sɨrɨmanama koiñoma.

¹²Axti maniki kiatax ángel ipunutati nibuxixhti, auki mameso kɨmuintya pɨrɨkɨ nikɨmuintya sux, kɨmuintya pɨrɨkɨ nikɨmuintya panx kɨmuintya pɨrɨkɨ nikɨmuintya nostoñeka. Sane naukiche kɨmuintya pɨrɨkɨ niñokɨmuintyax sɨsio tomikianene, chɨbukuarapɨ kɨmuintya pɨrɨkɨ nikɨmuintya sapes chepe tobixh.

¹³Auki yasakatɨ, ñonkoi basoro taman nutamonxixh kɨmuintya napes nantɨ auki nityosibixh sane: “¡Takisɨrɨmantai, takisɨrɨmantai, takisɨrɨmantai axɨbama sɨborikoma iku axɨna kɨx, axtɨ tɨbupuru axɨmanio pikiataka buxikia nibuxixhimia axɨmanuma makiataka trex ángeles!”