Read Chiquitano APOCALIPSIS 9 Bible Online

APOCALIPSIS 9 - Chiquitano bible

APOCALIPSIS 9

¹Auki axti maniki kiatax ángel ipunutatityo nibuxixhti, auki yastai taman nostoñes pakio auki napes iku kɨx, toxio ɨmo axɨna uiche aurɨ'ɨ axɨmanu kɨtubixh sɨrotɨ au tomikianene.

²Naukiche axɨmanu nostoñes iyaɨbuta axɨmanu kɨtubixh, kuatɨ tanene nausixh takana auki yarusɨrɨxatoe horno. Ui axɨmanu nausixh auki axɨmanu kɨtubixh tabuxio nikua sux nanaiña makiɨtɨx.

³Eanaki axɨmanu nausixh bupaikɨburu nubasoroka auki omenotɨ iku nanaiña kɨx. Toxio ñome obɨriakabo takana nupataka.

⁴Bakɨpukux ñome tapɨ ane kausane oboi ɨmo naxchopɨro ikuki axɨna kɨx ñome soeka, tari ɨmoma axɨbamantai champɨ nɨrixhti Tupax ikutama.

⁵Champɨ bakɨpukux ñome apatabai ɨmo mañoñɨnka, ta nauki oxonene ɨmoma nobɨrityux oboi ñome cinco panka. Axɨmanu noxoko nobɨrityux oboi isiu takana noxoko nobɨrityux ui nupatax.

⁶Au axɨmanio naneneka ñana mañoñɨnka yapachetioma nikonkoxɨma, ta chɨtabɨkopɨ uimia. Taruku ñana nixhankaxɨma akoma, tapɨ konkox sɨrotɨ iche pɨnanakimia.

⁷Axɨmanio nubasoroka tyoneantoe kabayuka axɨba opipiaka ɨmo baikixh. Kɨtɨpɨ niñutanux ane takana niyutarusɨx uxiante ui oro, axɨna niyusux takana nisuxti ñoñɨnx.

⁸Ane niki niñutanux takana niki nityanu paɨx, nomo'ox takana no'o nuitɨmɨx.

⁹Niyokɨtɨpɨx ane aukibo axɨmanu nubaibixh yerux, axɨna nikɨpura niyupax axtɨ bupasoro, tyoneantoe takana nikɨpura sɨrɨmana karetonka opityononio kabayuka axtɨ omenotɨ ɨmo baikixh.

¹⁰Kutaku nobiyox ane nomeampox takana nomeampo nupataka, yokɨtɨpɨ ane axɨna uiche ane niyupacheux ɨmo mañoñɨnka ñome cinco panka.

¹¹Axti maniki yɨriabux ñome axɨmanio nubasoroka, tyonenti axti maniki ángel auki tomikianene, nɨrixhti auki hebreo Abadón, tapɨ auki griego Apolión, auki axɨmanio tox manityakax yatabayox.

¹²Tɨsɨrotɨ axɨmanu kusɨrɨbo takisɨrɨkɨx. Kuantionki tox.

¹³Axti maniki kiatax ángel ipunutati nibuxixhti, auki ñonkoi taman tosibixh axɨpekuki axɨmanio cuatro tyapakɨka abe iku altar uxiante ui oro axɨna ananka kutakikiboti Tupax.

¹⁴Axɨmanu tosibixh nantɨ ɨmoti maniki kiatax ángel, ane uiti nibuxixhti: “Aiñemekasama axɨmanuma cuatro ángeles aboma tomoenoma abeu axɨmanu narubaityu nusɨrux Éufrates.”

¹⁵Auki emekanama axɨmanuma cuatro ángeles, nauki atabaimia kɨmuintya pɨrɨkɨ nikɨmuintya mañoñɨnka, tyopiki samamekanama uiti Tupax ɨmo axɨmanu horax ɨmo axɨmanu nanenes, axɨmanu panx axɨmanuintyo nasɨkɨbeka.

¹⁶Auki ñonkoi nububikixhimia axɨmanuma masortaboka aboma yuchaku kabayuka: doscientos millones nububikixhimia.

¹⁷Sane yasakio axɨmanio kabayuka, axɨmanuma mañoñɨnka aboma yuchaku axɨmanio kabayuka. Ane aukibo nityusixhimia yerux kɨturiki takana pes, takana nipɨsi karapapes takanaintyo nipɨsi nuxubuxixh. Tapɨ axɨmanio kabayuka niñutanux takana niñutanu nuitɨmɨka, auki nubarux paikɨburu pes aɨbu nausixh chepe azufre.

¹⁸Kɨmuintya pɨrɨkɨ nikɨmuintya mañoñɨnka koiñoma oboi axɨmanio trex noxokoka kuantio auki nubarux axɨmanio kabayuka: pes nausixh chepe azufre.

¹⁹Tyopiki axɨmanu nobɨriakax axɨmanio kabayuka ane au nubarux kɨtɨpɨtyo nobiyox. Tyopiki axɨmanio nobiyox takana noixoboka, ui niñutanux ane niyupacheux ɨmo mañoñɨnka.

²⁰Tapɨ axɨmanuma makiataka, axɨmanuma chɨkoiñopɨma oboi axɨmanio noxokoka, chiñokotapɨma axɨmanu taikiana aisamunema nomɨnantɨ, champɨityo axtɨ iñokotama ñanaunkuxɨma ɨmo machoboreka ɨmomaintyo axɨbama matupaka nisamuku mañoñɨnka ui oro, ui plata, ui bronce, ui kanx uityo soes, axɨmanio chumasarapɨtɨ, chomonaumpɨ champɨityo axtɨ umamenko.

²¹Champɨityo axtɨ iñokotama yatabaikixhimia, nicheserukuxɨma, nityasukuxɨma, nikusɨpɨkɨxɨma.