Read Choapan Zapotec 2 Corintios 3 Bible Online

2 Corintios 3 - Choapan Zapotec bible

2 Corintios 3

¹Cati rnandoꞌcanaꞌ ¿ca bi pensari ruele? ¿Ruele pensari ruendoꞌ cuinndoꞌ benꞌ z̃e? ¿O chi reꞌenle uluꞌendoꞌ leꞌe tu guichi ga rnën nacandoꞌ benꞌ huen? ¿O chi reꞌenle inabandoꞌ leꞌe tu guichi canaꞌ cabëꞌ rue bala ja benëꞌ?

²Bihuendoꞌ canaꞌ, como danꞌ leꞌe cuinle nacale ca quie tu guichi ga rnën nacandoꞌ benꞌ huen. Con tuzi leꞌe, naꞌra gabira guichi rdziogue. Nacale ca quie tu guichi ta bë Diuzi bzunëꞌn lëꞌë guicho laxtaꞌondoꞌ cuenda ulaba yugulu benëꞌ len inezijëꞌ bi reꞌen inan.

³Lëscanꞌ nacale ca quie tu guichi ta bë cuin Cristo bënnëꞌ nëtoꞌ ta usedyinndoꞌn. Binacale ca quie diꞌidzaꞌ ta bzu benëꞌ conlë tinta. Nacale ca quie diꞌidzaꞌ ta bzu Diuzi neban lao naꞌa Bichi Be quienëꞌ. Binacale ca quie diꞌidzaꞌ ta bzu Diuzi lëꞌë tu yo naca tabla dza naꞌ. Nacale ca quie diꞌidzaꞌ ta bzu Diuzi lëꞌë guicho laxtaꞌondoꞌ.

⁴Nacan dulaꞌadyiꞌndoꞌ cabëꞌ rnandoꞌ como danꞌ lao naꞌa Cristo sudyiꞌilëndoꞌ Diuzi.

⁵Quele fuerza valor quiendoꞌ cuinzindoꞌ ruendoꞌ ca mandado hue Diuzi nëtoꞌ, dechanꞌ lëbëꞌ gunnëꞌ fuerza valor quienëꞌ ta huendoꞌ yugulu ca ta inanëꞌ huendoꞌ.

⁶Ulio Diuzi nëto ꞌ ta huendoꞌ dyin quienëꞌ nun quie danꞌ begaꞌntzaꞌolënëꞌ raꞌo tacubi. Cala lao naꞌa ley bzu Diuzi lëꞌë yo dza naꞌ begaꞌntzaꞌolënëꞌ raꞌo tacubi, dechanꞌ lao naꞌa Bichi Be quienëꞌ, benꞌ yuꞌu luꞌu guicho laxtaꞌoro. Ca naca ley bzu Diuzi lëꞌë yo, lëley rchugulina quiero gatiro. Pero ca naca Bichi Be quie Diuzi, lëbëꞌ gunnëꞌ yelaꞌ neban quiero tuzioli.

⁷Bzu Diuzi ley quienëꞌ lëꞌë yo pcaꞌnnëꞌn lao naꞌa Moisés. Cati pcaꞌnnëꞌn lao naꞌa Moisés, caora naꞌ guca titiꞌtzegue laohuëꞌ. Tanto guca titiꞌtzegue laohuëꞌ, biuz̃aqueꞌ inaꞌ yaca benꞌ Israel laohuëꞌ. Pero laꞌacazi guca titiꞌtzeguena, beyulacazin. Tanto nacan belao lëley naꞌ, conlë xniꞌ quie Diuzi bdyinnan, laꞌacazi rchugulina quiero gatiro,

⁸pero mazara belaotzegue naca diꞌidzaꞌ pcaꞌn Bichi Be quie Diuzi para raꞌo.

⁹Quie lenaꞌ inaro: Chi guca ley naꞌ belao dza naꞌ, lëley naꞌ rchugulina quiero gatiro, naꞌra nacara belaotzeguera lëdiꞌidzaꞌ rguixogueꞌn raꞌo ca rue Diuzi zunëꞌ dispuesto ta ilëꞌënëꞌ raꞌo benꞌ laxtaꞌo yëri.

¹⁰Lëley naꞌ gucan belao dza naꞌte, pero biutila ley naꞌ conlë lëdiꞌidzaꞌ rguixogueꞌn raꞌo zuëꞌ dispuesto ta ilëꞌënëꞌ raꞌo benꞌ laxtaꞌo yëri. Lenaꞌ nacaran belaotzegue quele ca ley naꞌ.

¹¹Pues chi lëley naꞌ gucan belao dza naꞌte, laꞌacazi tu chiꞌzi unabëꞌna, naꞌra belaotzeguera naca ta inabëꞌ tuzioli.

¹²Nun quie danꞌ nezindoꞌ nacan tali cabëꞌ nandoꞌ, quie lenaꞌ birdzebindoꞌ rguixogueꞌndoꞌ xtiꞌidzaꞌ Diuzi zacaꞌlao lao ja benëꞌ.

¹³Biruendoꞌ nëtoꞌ cabëꞌ bë Moisés. Ptaconëꞌ tu laꞌariꞌ laonëꞌ ta biilëꞌë ja benꞌ Israel laohuëꞌ cati beyulan bira guca titiꞌn, porque decazide yeyulacazin.

¹⁴Pero biuyoñeꞌe benꞌ Israel, benꞌ unitaꞌ dza naꞌ. Lëscanꞌ naꞌa birioñeꞌe ja benꞌ Israel cati rulabajëꞌ lëꞌë guichi ga rguixogueꞌn quie dza begaꞌntzaꞌolë Diuzi xuzixtaꞌojëꞌ tiempote. Birioñeꞌejëꞌ nun quie nechula guichojëꞌ. Bineduba guichojëꞌ tachula, como danꞌ ruen zi inaoro xneza Cristo, naꞌ yeduban.

¹⁵Hasta lente naꞌa, cati rulaba benꞌ Israel diꞌidzaꞌ bzu Moisés lëꞌë guichi, nenechula guichojëꞌ netzaꞌla rioñeꞌejëꞌn.

¹⁶Pero cati inaoro xneza Cristo, naꞌ yeduba tachula guichoro.

¹⁷Cristo naquëꞌ Bichi Be quie Diuzi. Nu benꞌ yuꞌu Bichi Be quie Diuzi naquëꞌ libre.

¹⁸Quie lenaꞌ raꞌo yuguluro, como abeduba tachula guichoro, nacaro ca quie tu yaohuan rseniꞌn guiꞌ, pero guiꞌ quie yelaꞌ balaꞌana quie Cristo rseniꞌro. Canaꞌ naca quiero yedyinro gacaro mazara ca naca Cristo, porque yugu dza raca quiero runnëꞌ raꞌo yelaꞌ balaꞌana quienëꞌ. Canaꞌ rue Cristo, benꞌ naca Bichi Be quie Diuzi.