Read Choapan Zapotec 2 Corintios 6 Bible Online

2 Corintios 6 - Choapan Zapotec bible

2 Corintios 6

¹Quie lenaꞌ, como nacandoꞌ compañero quiele, benꞌ rue dyin quie Diuzi, rnabayëchiꞌndoꞌ laole bichuꞌunle tzalaꞌ la ca naca tahuen reꞌen Diuzi huenëꞌ quiele.

²Lëꞌë guichi laꞌiya quie Diuzi rguixogueꞌn ca una Diuzi cani:Huadyin dza gaca huen gula quiele, nacan dza cati yedaꞌ ulidzale nëꞌëdiꞌ.Huadyin dza ute uselaꞌ leꞌe, nacan dza gacaliaꞌ leꞌe. Canaꞌ una Diuzi. Naꞌra uzëcara nagale porque abdyin dza gaca huen quiele, abdyin dza ute usela Diuzi leꞌe.

³Birguilondoꞌ zëdi len ja benëꞌ, bireꞌenndoꞌ inajëꞌ condre dyin quie Diuzi ruendoꞌ.

⁴Pero yugulu ca ruendoꞌ reꞌenndoꞌ ilëꞌë ja benëꞌ nëtoꞌ benꞌ rue dyin quie Diuzi. Reꞌenndoꞌ ilëꞌëjëꞌ nëtoꞌ canaꞌ nun quie rzuendoꞌ dyëꞌëdi cati raca tazëdi quiendoꞌ, lëscanꞌ cati redzagalaondoꞌ rdzioguendoꞌ bi cosa.

⁵Pues guca quiendoꞌ benjëꞌ nëtoꞌ ziꞌ, bdzeꞌjëꞌ nëtoꞌ dyiguiba, bebiojëꞌ nëtoꞌ yedyi, bëndoꞌ dyin ziꞌi gula, bigusindoꞌ, uduendoꞌ.

⁶Babluꞌendoꞌ nacandoꞌ benꞌ quie Diuzi como danꞌ ni tu tamala biruendoꞌ. Banezindoꞌ con cabëꞌ rna diꞌidzaꞌ laꞌiya quie Diuzi. Nacaro benꞌ z̃elaꞌadyiꞌ, benꞌ huen, yuꞌundoꞌ Bichi Be quie Diuzi, nedyëꞌëndoꞌ benëꞌ du guicho du laꞌadyiꞌndoꞌ,

⁷rguixogueꞌndoꞌ benëꞌ diꞌidzaꞌ laꞌiya quienëꞌ, ruendoꞌ yelaꞌ huaca quienëꞌ. Danꞌ ruelëndoꞌ benëꞌ puro tadyaꞌa, lenaꞌ rdandoꞌ laojëꞌ birdzebindoꞌ quixogueꞌndoꞌjëꞌ xtiꞌidzaꞌ Diuzi, birdzebindoꞌ ruendoꞌ defender cuinndoꞌ laojëꞌ.

⁸Bayuꞌu rapalaꞌn benëꞌ nëtoꞌ, bayuꞌu birapalaꞌnjëꞌ nëtoꞌ. Bayuꞌu rnajëꞌ quiendoꞌ ruendoꞌ tahuen, bayuꞌu rnajëꞌ quiendoꞌ biruendoꞌ tahuen. Bayuꞌu rlëꞌëjëꞌ nëtoꞌ ca benꞌ rguixogueꞌ tali, bayuꞌu rlëꞌëjëꞌ nëtoꞌ ca benꞌ birguixogueꞌ tali.

⁹Bayuꞌu birzënagajëꞌ quiendoꞌ, bayuꞌu rzënagajëꞌ quiendoꞌ. Bayuꞌu ruen z̃udyi gatindoꞌ, pero bigatindoꞌ. Bayuꞌu rusaca ja benëꞌ nëtoꞌ bizinaquezi, pero bisuejëꞌ gutijëꞌ nëtoꞌ.

¹⁰Baꞌalaꞌcazi raca bayëchiꞌ quiendoꞌ, pero zucazindoꞌ gusto. Baꞌalaꞌcazi nacandoꞌ benꞌ yëchiꞌ, pero gacalëndoꞌ benꞌzë. Baꞌalaꞌcazi zundoꞌ abide quiendoꞌ, pero naca quiendoꞌ yugulu ta de.

¹¹Bichaꞌ, leꞌe benꞌ ciudad Corinto, dyëꞌëdi gula bëꞌlëndoꞌ leꞌe diꞌidzaꞌ. Du guicho du laꞌadyiꞌndoꞌ nedyëꞌëndoꞌ leꞌe.

¹²Cala nëtoꞌ bizundoꞌ gusto conlë leꞌe, dechanꞌ leꞌe bizule gusto conlë nëtoꞌ.

¹³Rnabayëchaꞌ leꞌe cabëꞌ rue tu xuzi xcuidiꞌ lënëꞌ z̃iꞌinëꞌ ta idyëꞌële nëꞌëdiꞌ du guicho du laꞌadyiꞌle cabëꞌ nedyëꞌëdaꞌ leꞌe du guicho du laꞌadyaꞌ. Nacaro ca quie tu idaoꞌ rnabëꞌra quie Diuzi

¹⁴Bihuelële tuz̃e len ja benꞌ binao xneza Cristo. Rnabaꞌ leꞌe tu pregunta: ¿Ga huen dyin chi huelë ja benꞌ rue ta yuꞌu niꞌa xnezi tuz̃e len ja benꞌ birue ta yuꞌu niꞌa xnezi? ¿Biz̃i huero gaca guiꞌ lëbi len tachula?

¹⁵¿Biz̃i gaca hue Cristo tuz̃e conlë xanꞌ taxiꞌibiꞌ Satanás? ¿Biz̃i gaca hue tu benꞌ nao xneza Cristo conlë benꞌ binao xneza Cristo?

¹⁶¿Binezile binacan lëbi idaoꞌ rnabëꞌra reꞌ ciudad Jerusalén len ja ídolo? Pero lëscanꞌ leꞌe nacale ca quie idaoꞌ rnabëꞌra quie Diuzi, benꞌ neban tuzioli. Canaꞌ una cuin Diuzi caora unëꞌ cani:Nëꞌëdiꞌ suaꞌ taliaꞌ leꞌe.Nëꞌëdiꞌ nacaꞌ Diuzi quiele, nacale benꞌ tzionlaꞌadyiꞌ nëꞌëdiꞌ.

¹⁷Lëscanꞌ unarë Diuzi caniga:Bihuelële tuz̃e conlë benꞌ birue quie diꞌidzaꞌ quiaꞌ.Bihuele cabëꞌ ta naca z̃udyi ruejëꞌ.Naꞌra nëꞌëdiꞌ huayezilaꞌadyaꞌ cabëꞌ ruele.

¹⁸Canaꞌ gacaꞌ Xuzile, canaꞌ gacale z̃iꞌinaꞌ.Lenaꞌ una Diuzi, tuzi lëbëꞌ de yelaꞌ huaca quie.