Read Choapan Zapotec 1 Timoteo 2 Bible Online

1 Timoteo 2 - Choapan Zapotec bible

1 Timoteo 2

¹Ta nacaran belao rniaꞌ luëꞌ, reyaꞌalaꞌ hueꞌlële Diuzi diꞌidzaꞌ por yugulu benëꞌ. Reyaꞌalaꞌ inaboꞌ Diuzi gunnëꞌ ta rdziogueloꞌ. Reyaꞌalaꞌ inaboꞌ Diuzi chi bigacalënëꞌ yaca benꞌ raca zëdi quie. Reyaꞌalaꞌ yëboꞌnëꞌ diuxcaleloꞌ.

²Hueꞌlële Diuzi diꞌidzaꞌ por yaca benꞌ naca gobierno, lente yugulu benꞌ napa dyin tacuenda gaca huen quiero suro chizi, bibi zëdi gataꞌ quiero. Canaꞌ initaꞌro dyaꞌa tzionlaꞌadyiꞌro Diuzi, gapalaꞌn benëꞌ raꞌo.

³Tahuen naꞌ huero canaꞌ. Lenaꞌ huetzaxe Diuzi, benꞌ run benëꞌ yelaꞌ neban tuzioli.

⁴Reꞌen Diuzi gataꞌ yelaꞌ neban tuzioli quie yugulu benëꞌ. Lëzi reꞌen Diuzi inezi yugu benëꞌ diꞌidzaꞌ laꞌiya quienëꞌ.

⁵Tuzi Diuzi naca, ganura diuzi zu. Lëzi tuzi Jesucristo naquëꞌ benꞌ nuelë raꞌo tuz̃e conlë Diuzi, ganura benꞌ tula zu.

⁶Lëbëꞌ psedyinnëꞌ cuinnëꞌ lao naꞌa yaca benëꞌ bëti lëbëꞌ. Canaꞌ guca guti Jesucristo lao laza yugulu benëꞌ, udiz̃uguëꞌ quie dulaꞌ xquia quieyaquëꞌ ta gataꞌ yelaꞌ neban tuzioli quie yaca benëꞌ conforme con ca una Diuzi tiempote.

⁷Lenaꞌ ulio Diuzi nëꞌëdiꞌ nacaꞌ apóstol useꞌelaꞌ Diuzi nëꞌëdiꞌ ta quixoguiꞌa benꞌ binaca benꞌ Israel xtiꞌidzaꞌnëꞌ, lëscanꞌ ta usëdiaꞌyaquëꞌ inaoyaquëꞌ xneza Jesús, naꞌ hue quieyaquëꞌ diꞌidzaꞌ li quie Diuzi. Tali rniaꞌ, cala yëꞌ rziꞌa.

⁸Canaꞌ reꞌendaꞌ, reꞌendaꞌ hueꞌlë yaca benëꞌ Diuzi diꞌidzaꞌ, benꞌ baneyëri laxtaꞌohue con gatezi zuyaquëꞌ. Bireyaꞌalaꞌ idzaꞌjëꞌ tilalëyaquëꞌ laguedyijëꞌ.

⁹Lëscanꞌ reꞌendaꞌ gaco yaca nigula laꞌariꞌ sencilla ta binaca beya bezaꞌ adorno. Tahuen naꞌ uzutzaꞌoyaquëꞌ cuinyaquëꞌ, pero cala conlë laꞌariꞌ tzaoꞌ, ni oro, ni yo tzaoꞌ, nica upaꞌayaquëꞌ guichoyaquëꞌ taz̃e.

¹⁰Reyaꞌalaꞌ hueyaquëꞌ tadyaꞌa como ca rue yaca nigula naca laꞌiya, yaca nigula nao xneza Jesús.

¹¹Reyaꞌalaꞌ cueꞌ yaca nigula chizi uzënagayaquëꞌ dyëꞌëdi caora rusëdi benëꞌ leyaquëꞌ.

¹²Bihuaꞌ lato usëdi yaca nigula benëꞌ ga redupa yaca benꞌ nao xneza Jesús. Lëscanꞌ bihuaꞌ lato inabëꞌ nigula yaca beꞌmbyu. Reyaꞌalaꞌ initaꞌ yaca nigula chizi,

¹³porque bzalo Diuzi Adán primero, naꞌtera bzaloguëꞌ Eva.

¹⁴Quele Adán uz̃iꞌ xanꞌ taxiꞌibiꞌ yëꞌ, denꞌ nigula quielanëꞌ uz̃iꞌ xanꞌ taxiꞌibiꞌ yëꞌ bënëꞌ dulaꞌ xquia.

¹⁵Huelaꞌiya Diuzi yaca nigula chi usegulayaquëꞌ z̃iꞌiyaquëꞌ dyëꞌëdi. Lëscanꞌ huelaꞌiya Diuzi leyaquëꞌ, chi yuꞌuyaquëꞌ pensari huen, chi biusanyaquëꞌ inaoyaquëꞌ xneza Jesús, chi idyëꞌëyaquëꞌ laguedyiyaquëꞌ, chi nayëri laxtaꞌoyaquëꞌ lao Diuzi.