Read Choapan Zapotec Hebreos 1 Bible Online

Hebreos 1 - Choapan Zapotec bible

Hebreos 1

¹Tazë lasa, tazë modo, useꞌelaꞌ Diuzi tiempote benꞌ naca profeta ta quixogueꞌjëꞌ xuzixtaꞌoro quie pensari quienëꞌ.

²Pero dza naꞌa, dza reyudyi quie tiempo gula, useꞌelëꞌ z̃iꞌinëꞌ ta quixogueꞌnëꞌ raꞌo quie pensari quienëꞌ. Conlë z̃iꞌinëꞌ bzalonëꞌ duz̃e yedyi layu, apcaꞌnnëꞌ yugulu ta de lao naꞌa z̃iꞌinëꞌ.

³Cabëꞌ naca Diuzi benꞌ z̃e, benꞌ laꞌiya, cabëꞌ naꞌ nacarë z̃iꞌinëꞌ benꞌ z̃e, benꞌ laꞌiya. Tuzi ca naca Diuzi lënëꞌ z̃iꞌinëꞌ. Lëz̃iꞌinëꞌ naꞌ rnabëꞌnëꞌ lao yugulu ta dyia guibá len yugulu ta de lao dyilayu conlë fuerza valor quie diꞌidzaꞌ quienëꞌ. Bëꞌ beyudyi udubanëꞌ dulaꞌ xquia quiero, canaꞌ bedyinnëꞌ yereꞌnëꞌ rnabëꞌnëꞌ zacaꞌ yebë ga zu Diuzi guibá. Nacara z̃iꞌi Diuzi benꞌ rnabëꞌra ca yaca ángel

⁴Quie lenaꞌ nacara z̃iꞌi Diuzi benꞌ rnabëꞌra ca yaca ángel. Pcaꞌn Diuzi lëbëꞌ reꞌnëꞌ ga nacatera belao ca yaca ángel.

⁵Porque ni tu lasa bigudyi Diuzi tu ángel ca unëꞌ gudyinëꞌ Cristo cani:Luëꞌ nacoꞌ z̃iꞌinaꞌ.Abdyin dza uluꞌenaꞌ yaca benꞌ nitaꞌ lao yedyi layu luëꞌ z̃iꞌinaꞌ. Lëscanꞌ ni tu yaca ángel bigudyi Diuzi lëbëꞌ ca unëꞌ quie Cristo cani:Nëꞌëdiꞌ nacaꞌ Xuzinëꞌ.Lëbëꞌ naquëꞌ z̃iꞌinaꞌ.

⁶Pero cati useꞌelëꞌ z̃iꞌinëꞌ bidanëꞌ lao yedyi layu, naquëꞌ benꞌ bazucazi cati binecueꞌ yedyi layu, canaꞌ unëꞌ cani:Reꞌendaꞌ yugulu yaca ángel gapajëꞌ lëbëꞌ balaꞌana.

⁷Quie yaca ángel una Diuzi cani:Rseꞌelaꞌ ja ángel quiaꞌ cabëꞌ rseꞌelaꞌbe.Ruaꞌ mandado ja benꞌ rue dyin quiaꞌ cabëꞌ ruaꞌ mandado guiꞌ ta z̃enan.

⁸Pero quie z̃iꞌinëꞌ una Diuzi cani:Luëꞌ, Diuzi, inabëꞌloꞌ tuzioli.Puro ta yuꞌu niꞌa xnezi rueloꞌ inabëꞌloꞌ.

⁹Puro ta naca tali raxeloꞌ hueloꞌ.Rudieloꞌ ta binaca tali.Quie lenaꞌ nëꞌëdiꞌ, Diuzi quioꞌ, biaꞌ tuzoꞌ luëꞌ benꞌ rnabëꞌra ca benꞌ tula.

¹⁰Lëscanꞌ una Diuzi rëbinëꞌ z̃iꞌinëꞌ cani:Luëꞌ, Señor, bzaloloꞌ udixuloꞌ yedyi layu dza naꞌte.Dyin bëloꞌ len niꞌa naꞌaloꞌ bëloꞌ guibá.

¹¹Ca naca yedyi layu len guibá, hueyudyi huedu quien, huagulan ca quie laꞌariꞌ.Pero luëꞌ, biyeyudyi yedu quioꞌ.

¹²Cabëꞌ ruzapa benëꞌ gaban quiejëꞌ, canaꞌ uzapaloꞌ yedyi layu len guibá dza zazaꞌra.Cabëꞌ rutzaꞌ benëꞌ z̃abajëꞌ, canaꞌ utzaꞌloꞌ yedyi layu len guibá dza zazaꞌra.Pero luëꞌ, tuzicazi ca nacoꞌ tuzioli, biyeyudyi yedu yelaꞌ neban quioꞌ. Canaꞌ una Diuzi.

¹³Lëscanꞌ ni tu lasa bigudyi Diuzi tu ángel ca unëꞌ gudyinëꞌ Cristo cani:Ureꞌ cuëtaꞌ zaquëꞌ yebë niga, hasta idyin dza cuëchaꞌ xniꞌaloꞌ yaca benꞌ rudie luëꞌ. Canaꞌ una Diuzi.

¹⁴Naꞌra naca yaca ángel bichi bezi, benꞌ rue ca mandado rue Diuzi. Rseꞌelaꞌ Diuzi lëjëꞌ ta gacalëjëꞌ benꞌ de yelaꞌ neban quie tuzioli.