Read Choapan Zapotec Santiago 5 Bible Online

Santiago 5 - Choapan Zapotec bible

Santiago 5

¹¡Ulezënaga dyëꞌëdi cabëꞌ naca quie benꞌ uñaꞌa! Reyaꞌalaꞌ cuedyiyaꞌyaquëꞌ quie tamala zaꞌ quieyaquëꞌ yedzagalaoyaquëꞌ.

²Ca naca yelaꞌ uñaꞌa quieyaquëꞌ, huabiaguiꞌn gudzon itabon. Lëscanaꞌ nu z̃abajëꞌ dyaꞌa, huatabon gao biazidzo len.

³Lëscanaꞌ oro plata quiejëꞌ, huabiaguiꞌna gaca ditoguen. Uluꞌen ca tamala bëjëꞌ bëlëjëꞌ benꞌ yëchiꞌ. Lenaꞌ huen quiejëꞌ ca quie benꞌ z̃uba laguiꞌ, uzeinan leyaquëꞌ. Baptupajëꞌ yelaꞌ uñaꞌa quiejëꞌ naꞌadza cati baruen bago iyudyi yedu quie yedyi layu.

⁴¡Leꞌe ulezënaga! Rbedyi yaca benꞌ rue dyin quiejëꞌ, porque reziꞌjëꞌ cosecha quieyaquëꞌ, naꞌ racayaquëꞌ ziꞌ, pero birguiz̃uyaquëꞌ leyaquëꞌ. Lenaꞌ raona leyaquëꞌ xquia lao Diuzi. Naꞌra Diuzi rnabëꞌnëꞌ guibá, rnabëꞌnëꞌ lao yedyi layu, banezinëꞌ cabëꞌ rusaca benꞌ uñaꞌa yaca benꞌ rue dyin quieyaquëꞌ.

⁵Ganꞌ ni lao yedyi layu, puro de lujo reꞌenyaquëꞌ. Rzaꞌlaꞌadyiꞌyaquëꞌ tuz ta rnan quie cuerpo quiejëꞌ. Ruejëꞌ baneza cuinziyaquëꞌ. Ruzëniꞌ cuinyaquëꞌ cabëꞌ reꞌeni bëdyihuaga. Baruen bago dza hue Diuzi leyaquëꞌ castigo gatiyaquëꞌ ca rati bëdyihuaga.

⁶Mandado quiejëꞌ aochuguli yaca benꞌ rnabëꞌ ta gutijëꞌ benꞌ bibi tamala bë, benꞌ birzaqueꞌ hue defender cuine. Reyaꞌalaꞌ cuezaro dyëꞌëdi dza yeguida Cristo, hueꞌlëro Diuzi diꞌidzaꞌ

⁷Pero leꞌe bichaꞌ, reyaꞌalaꞌ cuezale dyëꞌëdi dza cati yeguida Cristo lao yedyi layu. Naca quiero ca quie benꞌ rue dyin guixiꞌ. Rbezanëꞌ yelaꞌ nisa yo, naꞌra gazanëꞌ rbezanëꞌ dyëꞌëdi yeziꞌnëꞌ cosecha ca naca ta rdzioguenëꞌ.

⁸Lëscanꞌ leꞌe, reyaꞌalaꞌ cuezale dyëꞌëdi huele tuzi pensari, porque baruen bago dza yeguida Jesucristo lao yedyi layu.

⁹Bichaꞌ, biinële contra laguedyile, porque huachugubëꞌ Diuzi leꞌe chi inële contra laguedyile. Naca Diuzi benꞌ ichugubëꞌ quiero yuguluro. Ilëꞌëtiꞌzi nerdziogue idyin dza huenëꞌ juicio lao yedyi layu.

¹⁰Bichaꞌ, cabëꞌ bë benꞌ profeta, benꞌ ulio Diuzi, benꞌ udixogueꞌ xtiꞌidzëꞌ dza naꞌte, bezueyaquëꞌ bedzagalaoyaquëꞌ, canaꞌ reyaꞌalaꞌ huele leꞌe.

¹¹Pues neziro huelaꞌiya Diuzi nu benꞌ rzue redzagalao, benꞌ biusan xneza Cristo. Babele cabëꞌ bë Job, benꞌ unitaꞌ tiempote. Dyëꞌëdi uzuenëꞌ bedzagalaonëꞌ. Lëscanꞌ nezile cabëꞌ gucalë Diuzi lëbëꞌ, bro quienëꞌ huen. Lenaꞌ ruluꞌen reyëchiꞌlaꞌadyiꞌ Diuzi benëꞌ, reꞌennëꞌ gacalënëꞌ raꞌo.

¹²Nacan belao cabëꞌ rniaꞌ leꞌe ni, bichaꞌ. Biugunle ta dyia guibá, biugunle ta de lao yedyi layu. Biugunle Diuzi con ganzi. Bisiꞌle benëꞌ yëꞌ. Dulaꞌadyiꞌle inale: “Huazaqueꞌ”, dulaꞌadyiꞌle inale: “Bisaqueꞌ”. Naꞌra bihue Diuzi xquia quiele.

¹³Chi nu leꞌe redzagalaole, reyaꞌalaꞌ ulidzale Diuzi hueꞌlënëꞌ diꞌidzaꞌ. Chi nu leꞌe sule contento, reyaꞌalaꞌ gulale alabanza.

¹⁴Chi nu leꞌe raca z̃hueꞌle, reyaꞌalaꞌ guëz̃ile guida benꞌ napa dyin quie benꞌ nao xneza Cristo ta ulidzajëꞌ Diuzi ga dele ilëpiyaquëꞌ leꞌe aceite rzëtoyaquëꞌ lao Jesucristo.

¹⁵Naꞌra cati ulidzayaquëꞌ Diuzi hueꞌlëyaquëꞌ lëbëꞌ diꞌidzaꞌ du guicho du laꞌadyiꞌyaquëꞌ, caora naꞌ iyacale yeyue Diuzi leꞌe. Chi bële xquia, hueziꞌz̃e Diuzi dulaꞌ xquia quiele.

¹⁶Quie lenaꞌ reyaꞌalaꞌ ixubalëpile lao laguedyile, benꞌ nao xneza Cristo, chi bële xquia. Lëscanꞌ reyaꞌalaꞌ ulidzale Diuzi inabalenëꞌ gacalënëꞌ laguedyile, benꞌ nao xneza Cristo, cuenda sule huen. Huacalëcazi Diuzi nu benꞌ huen, benꞌ hueꞌlë lëbëꞌ diꞌidzaꞌ du guicho du laꞌadyiꞌ.

¹⁷Bigalaꞌadyiꞌle ca guca quie benꞌ profeta Elías. Guquëꞌ benëꞌ ca raꞌo. Pero caora unabanëꞌ Diuzi du guicho du laꞌadyiꞌnëꞌ ta bihuen nisayo, naꞌra tzona iza yu gatzo biben nisayo.

¹⁸Ude naꞌ benabanëꞌ lao Diuzi ta huen nisayo, naꞌra belaꞌ nisayo, beziꞌyaquëꞌ cosecha quieyaquëꞌ.

¹⁹Naꞌra rniaꞌ leꞌe bichaꞌ. Chi nu laguedyile, benꞌ nao xneza Cristo, bapsanlaꞌadyiꞌnëꞌ xneza Cristo, reyaꞌalaꞌ gacalëlenëꞌ ta yenaohuëꞌ xneza Cristo tatula.

²⁰Reyaꞌalaꞌ inezile chi gacalële benꞌ psanlaꞌadyiꞌ xneza Cristo ta yenaohuëꞌ xneza Cristo tatula, babële tahuen ta bicuiaguiꞌnëꞌ bira inaohuëꞌ neza tula, neza zio gabila. Lëscanꞌ nun quie gucalëlenëꞌ, huaziꞌz̃e Diuzi dulaꞌ xquia quie benꞌ naꞌ, laꞌacazi napëꞌ xquia z̃e. Amén.