Read Choapan Zapotec Apocalipsis 12 Bible Online

Apocalipsis 12 - Choapan Zapotec bible

Apocalipsis 12

¹Naꞌra guca tu seña guibá. Blaꞌ tu nigula nedubinëꞌ xniꞌ ubidza. Naconëꞌn nacan ca quie z̃abanëꞌ. Lëscanꞌ xniꞌanëꞌ zu biuꞌ. Lëscanꞌ zu tu coron guichonëꞌ ga dyia chipchopa bélo.

²Nuꞌanëꞌ bdaoꞌ rbedyiyaꞌnëꞌ bedzagalaonëꞌ len bdaoꞌ. Ruen z̃hueꞌnëꞌ ta su bdaoꞌ quienëꞌ.

³Naꞌra guca itu seña guibá. Blaꞌ tu bia guixiꞌ snia gula nacabaꞌ ca bëla, nacabaꞌ culuri z̃na. Naca gadyi guichobaꞌ. Dyia chi luzubaꞌ. Lëscanꞌ zu tu huio coron lao gadyi guichobaꞌ.

⁴Conlë z̃bambaꞌ pquinobaꞌ tu cueꞌ quie lao tzona cueꞌ bélo lao yedyi layu. Caora naꞌ uzëbaꞌ lao nigula, benꞌ su bdaoꞌ quie, cuenda gaobaꞌ bdaoꞌ quienëꞌ bëꞌ subiꞌ.

⁵Caora naꞌ uzu tu bdaoꞌ byu quie nigula naꞌ. Lëbdaoꞌ naꞌ, cati banacabiꞌ benꞌ huaca, huanabëꞌnëꞌ lao yedyi layu ta yuꞌu niꞌa xnezi. Naꞌra labeziꞌte Diuzi bdaoꞌ naꞌ, zeyuꞌanëꞌbiꞌ yesannëꞌbiꞌ ga reꞌnëꞌ lao xlatoguëꞌ.

⁶Lëscanꞌ bz̃uno nigula naꞌ, zionëꞌ lao lato ga bidyia yuꞌu. Lëlato naꞌ nacan ga pcueza Diuzi ta gao nigula naꞌ lao tu mila chopa gayuhua tzona galo dza.

⁷Cati ude beyudyi naꞌ, guca tu dila guibá. Naꞌra ángel Miguel len ja ángel quienëꞌ, udilalëjëꞌ lëbia guixiꞌ snia gula len ángel quiebaꞌ.

⁸Pero biuz̃aqueꞌbaꞌ huelëbaꞌ ángel quiebaꞌ gan. Canaꞌ abeyudyi tiempo quiebaꞌ len ángel quiebaꞌ. Bira saqueꞌ sulëbaꞌ ángel quiebaꞌ guibá.

⁹Canaꞌ guca uliojëꞌ lëbaꞌ guibá. Naꞌra lëbia guixiꞌ snia gula laobaꞌ xanꞌ taxiꞌihuiꞌ. Lëscanꞌ laobaꞌ Satanás. Lëbaꞌ rziꞌbaꞌ yëꞌ ja benꞌ nitaꞌ lao yedyi layu. Canaꞌ guca uruꞌunjëꞌbaꞌ lao yedyi layu len ja ángel quiebaꞌ.

¹⁰Naꞌra bedaꞌ tu rchiꞌ benëꞌ unënëꞌ zidzo guibá unanëꞌ cani: ―Babdyin dza ute usela Diuzi yaca benꞌ quienëꞌ. Barnabëꞌ Diuzi quiero len benꞌ naca Cristo quienëꞌ lao yedyi layu. Baoruꞌunjëꞌ benꞌ udao xquia yaca benꞌ nao xneza Jesús. Du dza, du yela, udao Satanás lëjëꞌ xquia lao Diuzi.

¹¹Bëjëꞌ gan lao taxiꞌibiꞌ nun quie guti Cristo, benꞌ naca ca quie becoꞌ z̃iꞌilaꞌ, bia naca gun quie Diuzi. Bëjëꞌ gan nun quie bibdzebijëꞌ udixogueꞌjëꞌ xtiꞌidzaꞌ Diuzi. Bibdzebijëꞌ chi guti ja benëꞌ lëjëꞌ, naꞌ uzujëꞌ dispuesto gatijëꞌ.

¹²Pues yedaohuele leꞌe, benꞌ zu guibá. Pero bayëchiꞌ gula nacan quiele leꞌe, benꞌ nitaꞌ lao yedyi layu, laꞌacazi zule yu bidyi, laꞌacazi zule lao nisadaoꞌ. Naca bayëchiꞌ gula quiele como danꞌ baoyëzi xanꞌ taxiꞌibiꞌ yedyi layu ga nitaꞌle. Lega bdzaꞌnëꞌ nun quie danꞌ nezinëꞌ baruen bago dza yeyudyi yedu quienëꞌ. ―Canaꞌ una benꞌ naꞌ.

¹³Naꞌra cati blëꞌë lëbia guixiꞌ snia gula cabëꞌ bëjëꞌ quiebaꞌ, uliojëꞌbaꞌ guibá, pquinojëꞌbaꞌ lao yedyi layu, caora naꞌ uzaꞌbaꞌ ziobaꞌ unaobaꞌ nigula, benꞌ baozu bdaoꞌ quie.

¹⁴Pero bëꞌ Diuzi nigula naꞌ chopa xila yela ca xila psia cuenda sënëꞌ ladza tzionëꞌ lao lato ga bidyia yuꞌu, ga nacan zituꞌ. Lënigula naꞌ bëꞌjëꞌ ta udaonëꞌ lao tzona iza yugatzo.

¹⁵Naꞌra bro nisa luꞌu ruꞌa bia guixiꞌ snia gula naꞌ, udixobaꞌ tu yao z̃e cuenda idyinnan ga zu nigula gatinëꞌ luꞌu nisa.

¹⁶Pero gucalë layu nigula naꞌ, uxaꞌanaꞌ ruꞌan hueꞌenan nisa bro ruꞌa bia guixiꞌ snia gula.

¹⁷Quie lenaꞌ lega bdzaꞌbaꞌ nigula naꞌ ziobaꞌ tzetilalëbaꞌ yaca z̃iꞌisuba nigula naꞌ, yaca benꞌ ruzu rue cabëꞌ mandado rue Diuzi, yaca benꞌ rnao con cabëꞌ rna xtiꞌidzaꞌ Jesucristo du guicho du laꞌadyiꞌ.