Read Chokri Naga Matthew 10 Bible Online

Matthew 10 - Chokri Naga bible

Matthew 10

¹Süsa Jisu Pu müthaküyi kürikünako ci püh Puce süyi die, puko po müsakümo rüpüko huyi küve, küthi künyi mo küsü kümüza kükrekre ti mütü thi küsührhoyi küve küku püh puko prü sü.

²Süze kütsüh küsü kürikünako za hikohi; Kürao Simon lie ciyo küti-o mo pu sazüh-o Andrew, Zebedee nu James mo pu sazüh-o John;

³Philip mo Bartholomew; Thomas mo Matthew khazhonu kükhrüo, Alphaeus nu James, mo Thaddaeus,

⁴Canaanmi Simon, mo Jisu tü küsüo Iscariot Judas sa.

⁵Jisu-e mi kürikünako kütsüh die pukoce; Neko mülükümomi sholü vohi; mo Samaritanmi rüna pühlü ri lü hite;

⁶Eli tasü Israelmi müdi küva koko celü vote,

⁷Mo neko vo küyice; tüyo küde münoto taho; zi küti posüte;

⁸Küthimi thi küsührho süyi, leprami thi küsührho süyi, küsami phu mürhüh sü, küsü rüpüko hu vayi; neko müthu ngoyi mo müthu püh mi prü süte.

⁹Ne presa bühlü suna, mori rüka mo presathi pühri pü tahi;

¹⁰Mori ne rüvüh lakho, ne bola küna, ne pheku mori ne thü ri püh tahite, kükrenamoli, mhaküthimi-e uva ngoti züzo kütina.

¹¹Süze ne rüna nadelü lüri mori natsühlü lüri, sopüh celü vo zü shi küti kütso die voyi, mo lata kümothe ce sülü bazoyite.

¹²Süze no ce sülü lüküyice galiphi püh ce sülü süte;

¹³Mo ce süo putü lize ne liphi po ce sülü ba küyio thiyi, süri ce süo pütü mo lize ne liphi po ne yo la vori kütao thiyite.

¹⁴Mo thüma kühopühri ne zühyi muta lize, mori ne zhopo rünyi mu ta lize, ne ce süo lü mori rüna süo lüno ta pari küzüce, ne pheyo nyophu kükhu vate.

¹⁵I neko ce potü süto, zünyo küti küto tüsonha Sodom mo Gomarrah nyi kümüjoe rüna süo kümüjo ceri yheyi rüyi ku zoto.

¹⁶Yhie, Tüko-e sace dolü küvo bi I neko kütsüh sü to zü ho; nekoe tünyhi do küve bi zoyite, mo mükhro zho küve biyite.

¹⁷Eli nekoe thüma yo münuyite, kükrenamoli süko neko tüpüh mülhiko kühulü süto, mo puko synagogueko lüno neko vüto tina.

¹⁸Mo mi aza na neko züh küzhoko mo küdeko mhuzülü voto, kükrenamoli süko ri mo mülükümoko mhüzülü ri zhopo püh thisü kütona.

¹⁹Eli mi neko tü küsüce, neko dipüh bi die mha po to sheli küti lü ne lü künyi thi hite; kükrenamoli putü vori küyice nepo dipüh po toshi küti khasü to tina.

²⁰Sücesü nethono moli neko Poo Rüpüo nelü kübao tho mha posü küto na.

²¹Sülize u sazüh-o tho u züra-o tüsü mi po dokhritoü po-e u nuneko tü sü to; mo u nunekoe u krüneko mütsu süri die puko tüpüh mipo dokhri to.

²²Mo aza na mi mütü po neko mütsü to. Süri yhie zoba pu küla tso küyio külayi to.

²³Süri mi rüna hi-olü ne müthi kütace ta rüna kükrelü vo tayi; kükrenamoli I neko ce po süto; Thümanuo küvori mhüzü neko Israel rünakolü vo tsoyi külho na.

²⁴Müthaküyioe pu kümütha-o ceri zhoku mo, mori ceta-oe pu nyepoo ceri zhoku mo.

²⁵Müthaküyioe pu bi mo ceta-oe pu nyepoo bi küyi sasü tsüh zo, Mi celü nyepoo thori yisü Beelzebub litaze, pu celümiko yisü dithili-e cita?

²⁶Süna süko müprüh ta hite; kükrenamoli mhapühri sühpra mi mhüngo thi modie whü püh ma küta di, mori mipo se mo küto na küva püh ma küta di zo.

²⁷I küzühlü nekoce po küsüko nekoe püh küvelü posü te; mo neko nyilü mükhrüh po küsüko pühpra cetu-o se süte.

²⁸Sülize ne mo hio dokhri va zori ne rüpüo dokhri vayi külhoko müprüh ta hite; eli mezalüno ne rüpüri mo ne mo ri müka vayi kütoo müprühyite.

²⁹Tsükhra küna püh presa püh khriyo mome? Süri neko Poo müdo tazo kümosa süko pühri rütu cejü prü tayo mo.

³⁰Eli ne piyo ne pithapriko mütü ri phi tsoyite.

³¹Süna neko müprüh ta hite, ne tsükhra kükro ceri ne ma neku tina.

³²Süna thüma kühopühri thüma mhüzülü aza phra yo lize I ri tüyo küba a Po mhuzülü pu za phrato.

³³Süri thüma kühopühri thüma mhuzülü aza phra mu tayo lize, I ri tüyo küba a Poo mhuzülü pu za phra mu tato.

³⁴I küzüküve kha cejü sü küto na kü vori lüta hite, I küzühküve moli zesho khasü to küvo ri zo.

³⁵I-e mipo külükre die unu po upo mütsu, unupü po uzu mütsu, umhüpü po unapü mütsu zi kütona küvori zo.

³⁶Sidie thüma püh ngomu-e putho pu cekrolü süri to.

³⁷Kühopüh ri aceri pu po pu zu khrüku yo kütimi sümi a thüma thi sümo, mori pu aceri punu mori pu nupü khrüku yo lize pu a thüma thi sümo.

³⁸Süze thüma kühopühri putho pu cross püh mo die asa müdzi timi, a thüma thi sümo.

³⁹Thüma kühopühri pu kürhühro mükrü püh pu züthiyi künyimi pu süo müdi vato; süri thüma kühopühri aza na pu pho müka müdi va lize, pusüo ngo layi to.

⁴⁰Kühopühri neko zühyi yo kütimi a zühyi yo, mo a zühyiyo kütimi a kütsüh küsüo ri zühyi yo.

⁴¹Sadzühküsemi za lü sadzühküsemi zühyi yo kütimi sadzühküseo zhokhro ngoto.

⁴²Süze thüma kühopühri müthaküyimi zalü zükohe pühri püh küzhoshüh hiko mipühri da sü lize, I nekoce po süto, Pu mhapüh ceri pu zhokhromüdi va lho.