Read Chokri Naga Matthew 13 Bible Online

Matthew 13 - Chokri Naga bible

Matthew 13

¹Sünhasü Jisu celüno pari de dzüküzho shico bata.

²Süsa thüma kro küzho püh vori die Püce künguyi ta, süna Pu püzu pühlü lü die bayi, mo thüma krooe dzüküzho Poo bata.

³Süsa Pü züvelü mha kükro pükoce po die sü: Yhei, Tsaküvami püh tsava tozu die prü:

⁴Mo pu tsava sü tice; tsa hu rütu shoshi prüta, sidie mürako vori die süko patiyita.

⁵Mo hu rütu sü uzü ve kümo kütsütsürolü prü ta, mo cejü zü müsüh kümo na süko tsü mha süri ta.

⁶Süri süko u me tsü kümüsühlü lü kümo na tüna süri phrü khriva.

⁷Süsari hu rütu tsahu dolü prüta, sidie tsahuko masüri die süko gükhriva.

⁸Süri hu rütu cejü zü küvelü prüyi die u se hu se krapüh, hu se heshorüh mo hu se sühmüri jiyi.

⁹Thüma kühopühri unyi ne die rünyiyi küvemi po rünyiyi te.

¹⁰Süsa müthaküyiko vori uco kütso die; No dipühna kükremice züve poyo la? zita.

¹¹Pu süko zü küla die po küti; Kükrenamoli neko po tüyo zü kümüsühko seyi küve khasü eli püko ce khasü mo, zisü.

¹²Kükrenamoli thüma kühopühri mha püce kübao kha pü prü sasü to; mo pü ne küthi sayi to, süri thüma kühopühri mha püce ba kümoo kha pü prü sa küsüo mori püce kübao ri khi süh tato.

¹³Süsü na I pukoce züve lüno mha po süyo, kükrenamoli puko pe yori ngoyi yo mo, rünyiyo ri seyi yomo; mori lü kükre riyi yomo zo tina.

¹⁴Mo süko dzüh thazü Isayae: Nekoe kürünyie rünyi to, eli seyi lho zoto, Mo neko küpe pe zoto, eli ngoyi lho zoto,

¹⁵Süze thüma hiko u mülü rüdü te, uni ri künito te, mo puko mhü ri kamate; Kükrenamoli, püko mhü püh ngoyi, Mo puko ni püh rünyiyi, Mo puko mülü püh lüyi, sidie thülü küdeyi die apo püko thi küsührho küva kümüprüh na, zi die po püh kümütao thitsühyi küto na.

¹⁶Eli neko mhü didüri thü pü kekrenamoli süo mha ngo tina mu neni dithedü thüjo pü sü süo mhakhü se tina.

¹⁷I nekoce potü süto, sadzühküsemi kükro ri mo kümathomi kükro ri neko küngoko hi ngo nyi shüh vori, eli süko ngoyi mote, mo puko neko rünyi kütiko rünyi nyi vori eli puko süko rünyiyi mote.

¹⁸Süna neko tsaküvao züve rünyi sü phite.

¹⁹Thüma kühopühri küde züo rünyiyi, eli pü süo lü kükreyi mo küva lü küsüo vori die tsa pü mülü lü prüh küsüo khi püh tatayo. Hiohi tsa shoshico prü kütao zo.

²⁰Mo mi tsava püh kütsütsürolü sü küvao zoe; zü süo seyi mütha pu nü die züh mhayi yo.

²¹Süri pulü pü me kra mve kümo na dopüh libi bayi yo, sidie züo na kümüzhe küti mo kümüthi kümünyi vori küyice pu rülele die pu nümo la tayo.

²²Süsari tsa rütu tsahu dolü lü kütao ri pu züo seyi zori tsüdo cejü hilü rüleko, mo mi müsü kümüsü ceneko külüko tho züo whu müdi la vayo, sidie use rüthiyi mo tayo.

²³Mo mi tsava püh cejü zü küvelü sü küyio zoe züo rünyiyi die püco seyi yo, mo pü se rüthiyi die hu se krapüh, hu se hieshorüh mo hu se sühmüri jiyi yo, zita.

²⁴Pu züve kükre püh po puko ka die sü, Tüyo küde mipühno tsaküve püh pu yilü prüh küsü bizo.

²⁵Eli pu vo züh küta sa pu ngomümi zotshü tsa püh atalha dolü prüh sü va die tata.

²⁶Sidie süko tsü süri die use ri rüthi pari küyice zotshü se ri ngo pari ta.

²⁷Sücesü yi nyepoo ne cetamiko vori die pu yisü, Küzhoo, no tsa küve mpa püh n yilü prüh sü mo me? Sülize dibi die zotshüko ri tsü süri ta?

²⁸Püsükoce po die, ngomümi püh tho hizi küva zo zisü, süce pü cetako pu yisü Süze no hako po vo süko pa küngu va küto n müdo me? zisü.

²⁹Eli pu süko yisü, süzi su, kükrenamoli neko zotshüko pa küvoce atalhako ri pa küva kümüprüh na.

³⁰Yi kürüh tü vori kümothe püko po Ihü ba zoyi te, yikürüh tü vori lize I yikürühko ce, neko zotshüko pa künguyi müra die süko pha küngu püh vo melü müto vate, eli atalhakoe küngu püh vo alha celü süyite, zisüto, zita.

³¹Pu züve kükrepüh püh pukoce po la die sü, Tüyo küde gakresi püh bi zo, mi püh ne süo khipüh vo pü yilü prüh sü;

³²Tsa hihi kükreko dolü pusi künyitho püh zo, eli pü tsü süri tice tizhe ga dolü kürükrütho püh thi die süri sühbo bi tayo, sidie tüyo rako vori pü co koyo u rüsühthi thi tayo.

³³Pu züve kükre püh pukoce po lasü; Tüyo küde khre bi zo, thünopümi püh süo süh vo thü kümüde rha küchu süh jü sü die thü süo pu pari tsoyi kümothe küva püh müzü ti bizo.

³⁴Jisue mha hiko mütülü küzüve po püh thüma kroo kasü; Pue küzüve mo die mhapühri po püh pukoce sü shemo.

³⁵Süosü kükrenamoli thazü sadzühküseo po; I ata taga püh züve poto; I cejü thiyi prühlüno küva püh kümüta kümükhrühko po süto; zipüh küma züko thitsühyi küto na.

³⁶Süsa Jisu thüma kroo khava die celü lüta süce Pü müthaküyiko Püce lüri di sü; yilü zotshü coo po münu püh hako ka süte; zita.

³⁷Pu süko zü küla die sü; Tsa küve prüh küsü mao sü thümanuo zo.

³⁸Yi süo cejüo zo; tsa küveko sü küdenuko zo, mo zotshü tsa kosü küsüo nüneko zo.

³⁹Tsa süo prüh küsüo sü küsüo zo: Yikürüh sü cejü hio küla zo, mo yikürühmiko sü tüyoshoyimiko zo.

⁴⁰Süze zotshüko rhüh küngu püh vo melü müto küva bi, cejü hio küla ri sü bi zito.

⁴¹Thümanüo Pü shoyimi kütsüh sü die süko po vo Pu küde balü mha thi kümüsüko mo küsüküthiko mütü phu künguyi to.

⁴²Sidie süko khapüh melü kügü vato, sülü kra mo uhu thüzhepü bato.

⁴³Süsa kümathokoe u Poo küde balü vepüh tünace bi ba tato. Kühopühri uni küne mi sümi po rünyi yite.

⁴⁴Tüyo küdee yipro pühlü cene küva püh kümüzü bizo; mipüh ne vo sü ngoyi die küvapüh ma die pü künüpü celü vori die pü mha küneküdi zhüh püh vori süo khri küyi bizo.

⁴⁵Süsa ri tüyo küde lhethomi püh ti ma kürühpü phu tayo küti bizo;

⁴⁶Pü vo ti ma kürüh süo ngo küyice pü celü vori die pu mha mütü zhüh pü vo süo khriyi ta.

⁴⁷Süsari tüyo küdee khuma püh kügü pühdzüküzholü sü die khu kükrekre küti bo küngu küyi bizo.

⁴⁸Süo chu küyice, puko süo süsa püvo dzüküzho poyo bayi die ucoko küda püh mhabühlü süyi mo uco kümoko püh kügü vayo.

⁴⁹Vo thüma lhü külaco ri sübi zoto, tüyo shoyimi vori die kümathoko dolüno kürüzüko küda kre züh tata to.

⁵⁰Sidie süko kügü püh me kümüre küthilü sü vato, sidie sülüno kra mo uhü thüzhe pü bata to.

⁵¹Neko zü hiko co mütü seyi ba me? zita. Mo püko Pu yisü, izo, zita.

⁵²Mo Pü süko yisü, Süna lüsiküseko kühopühri tüyo küdenumi thi küto na cipüh müthayi kütami püh mipüh ne pü celü mhabühlü mha küsa mo kügwü lha püh küpari bizo, zita.

⁵³Süsa Jisu züve hiko potsüh küva sa thüthi sülüno tata.

⁵⁴Süze Pu Pu tho Pü rünalü vori küyice, Pü süko synagogue lü mi mütha. Sücesü mi ungo thi die sü; thüma hiohi dipühceo no mhase hiko mo u malhü mhatho küku hiko ngoyi ta la ha?

⁵⁵Hihi süh mhatho küthio nu zo mo me? Püzu ri Mary zo mo me? Süze pü sazühneko James mo Joseph mo Simon mo Judah hiko mo me?

⁵⁶Süze pü lipüneko ri u züh bazo mo me? Sülize Pu dipühceno mha hiko ngoyi ta?

⁵⁷Sidie püko pü yo u nümota, eli Jisu püko yisü, sadzühküsemi pü tho pü rünalü mo pü tho pü cekrolü zo kümosa kükrera mi pü rho kümo di; zita.

⁵⁸Sidie püko mülü kümu na pü sülü küku mhatho kükro thisü mu ta.