Read Chokri Naga Matthew 14 Bible Online

Matthew 14 - Chokri Naga bible

Matthew 14

¹Sücesü Herod küdeo Jisu za müle pari küta se die pü cetako yisü,

²Hiohi John zülu khaküsüo tazo, pü küsalüno rhühla süri tazo, süna umalhü mhatho künye hikohi Püyo thi pari bata zo, zita.

³Herod süosü hizü pü sazüo Philip cemi Herodias na John tüyi die pü khapüh küdücelü süva.

⁴Kükrenamoli, John süo yisü, no thüno süpü yi küti thüzho mo, zi küsü na.

⁵Mo pü süo dokhri küva rhü küsüce makroo müprüh ta, kükrenamoli süko John yisü sadzüdküsemi püh thiyo tina.

⁶Süri Herod kümünu tüso vori küyice, Herodias nupü nasü püh püko mhüzülü sü die Herod nü thiyita.

⁷Süna thüno süpü püce mha kühopüh sho zoshi pu küshoo püh pu prü toli zi die pu zü khasü va.

⁸Süsa süpü sü müzümüra puzu puce popüh kümüzü bi die sü, No John mi zülu khaküsüo pi püh mükhu pühlü süh vori a prüte, zita.

⁹Mo küdeo ri pülü kümüzhe ta; süzori pü zü khasü küva na mo thüma pü züh ba die hi kübako na süo püh vo thünopü prü no die pu zü khasü va.

¹⁰Sidie pu mi po vo küdücelü John pi veyita.

¹¹Süsa mi pu pi sü püh mükhu pühlü süpü vori die püh rüli süpü prüva, mo süpü süo püh die püzu ce vori ta.

¹²Süsa pü sadziko pu rüngu püh vo khrüh va; sidie vori Jisuce posü.

¹³Süsa Jisu zü süo se küyice Pu püzu pühlüno ta pü tsühkre vota; Süri thümako sü sesü die rüna lilü u phe tasü pü sa müdzi vorita.

¹⁴Sücesü pü thüma. Kroo ngo küsüce Pu süko phimüzhe die süko küthi künyiko thi küsührho sü.

¹⁵Süsa thüva vori küyice, pü müthaküyiko Püce vori die sü, thinyi hio thüralü te mo tüsozho ri vote, süna thüma kroo kütsüh püh rünalü sü die püko po vo utho u lüva khritiyi tate, zita.

¹⁶Eli Jisu pükoce po die; püko po tata mori vezo, neko mhayi püko po tite; zita.

¹⁷Eli süko püce, hako hicehi tsükhrüda pühngu mo khu küna püh küta zo; zisü.

¹⁸pü sü, süko püh ace vorite; zisü.

¹⁹Sidie Pü thüma kroo po ki nhayo bayi no sü, mo pü tsükhrüda pühnguko mü khu küna pühyi die tüyo pe die galiphi sü die brüphre püh müthaküyiko belü sü, mo püko süko küza püh makroo prüsü.

²⁰Süsa püko mütü ri süko ti die püko küchü thiyi; mo püko tishoko shi küngu püh khopühne küriküna chu layi.

²¹Süze püko mhati küyiko thüno thünu mo natsimi sa kümo mi nye pühngu müsüh lisi.

²²Süsa Jisue müthaküyiko po pü makroo kütsüh küba doce ta püzu lü lü die tasü pü mhüzü lishico ku ta nosü.

²³Sidie pü makroo kütsüh küva sa, pü sho tozu die takre cejüthu pühyo khota; mo thüva ta zori pü lübi sülü bata.

²⁴Eli tükhrae püzuo mütsu die khra vori küta na süo hü küye püvo zü mütsulü tata.

²⁵Sücesü tüzühyo rikhu küvale dao tülü Jisue züyono ta pükoce vorizü.

²⁶Eli müthaküyikoe Pü züyono ta vori küzü ngo die müprüh shüh die sü, Rüpü püh tazo sidie u müprüh pü se zota.

²⁷Süri Jisu rükri pükoce po die sü, neko lü ne nüyite, I zo müprüh ta hite, zita.

²⁸Süsa Peter Püce po die, Nyepoo no zo lize apori züyono ta nce pheriyite; zita.

²⁹Mo pü sü pherite zisü, sücesü Peter püzuyono ta kiri die Jisuce phe tozü die dzüyono ta süta.

³⁰Eli pü khrade kürüh ngo südie müprüh shüh ta, mo rülüprü ta tozü ta. Süna pu sü, Nyepoo no a küla süte, zita.

³¹Süzisü mütha Jisu püpo sho püh pari pü ceyita, sidie pü yisü, Yhei n kümülü kütsao, dipühna no külüdo ta ha? zita.

³²Süsa unyi püzulü lüri küyi sa tükhra lazüh ta.

³³Süsa püzulü kütako vori die pü rüsüta, sidie püko sü, No Jihova nuo küthozo; zita.

³⁴Süsa püko süolü prüh prayitice, tasü küsolü, süosü Genezaretlü prata.

³⁵Sücesü thüma sülü külhüko pü se küyice püko thüma kütsüh püh rüna süshi sümhü mütü sü die küthi künyimiko züh püce vori.

³⁶Sidie süko. Püce, püko po pü khüphre zori nyisü no die shota; mo süo zori nyi küyi khüko sührhoyita.