Read Chokri Naga Matthew 15 Bible Online

Matthew 15 - Chokri Naga bible

Matthew 15

¹Süsa Jerusalem lü küvori lüsiküseko mo Phariseekoe Jisu kitso die;

²Dipühna n sadzikoe thazü pethimi zhoko varhüyo la? Kükrenamoli, puko mhaküti mhüzü u be miltüyo mo tina; zita.

³Eli Pu süko zü küla die sü; neko ri dipüh nai netho ne zhoko na Jihova zü khaküsüko varhü yola? zita.

⁴Kükrenamoli, Jihova thazü, npo nzu rhoyite, mo thüma kühopühri pupo puzu rüshuhyo lize süo posata te, süzi püh müzü zo.

⁵Eli nekoe po die, thüma kühopühri püpo püzu yisü, No ayono dipüh kümve ngoyi küto müsüh sheli süko mütü müthu kha püh Jihova prüve; süzi küsümi püpo püzu rho mo zori pü kükha bayomo.

⁶Sidie nekoe netho ne zhoko na Jihova zü khaküsüko püh kümüthu thi ve.

⁷Neko küthürakütiko, Isaiah sadzüküseoe neko na mhapo mve shüh püh kümüta hibi:

⁸Thüma hiko uta püh a müno voriyo, mo püko ta püh a rhoyo; eli püko lüno a züh kümücuh shüh tayo.

⁹Eli pükoe thümae zü khaküsü kümütha züko süh mütha die püko rüsu thüdo thi tate; zita.

¹⁰Sidie pü makroo ci Püce süyi die püko yisü, nekorünyi die seyi te, zita.

¹¹Thüma talü külüko thüma thi mürho vayo mo; süri thüma lünoküpariko thüma va mürho vayo.

¹²Süsa müthaküyiko vori Püce po die sü; Phariseekoe zü hiko se küyi sa püko nümo ba küta noriseba tatho? zisü.

¹³Jisu püko khü, küla die sü, Tüyo küba Apoe lüsükümo süh mütüko pava zoto.

¹⁴Püko po tsüzi balute! Pükoe u mhüküce shotha mo kümüthako zo; sülize mhücemi po mhücemi shotha lize unyi künanyi rütu tükhülü lü tayo.

¹⁵Sücesü Peter Pu yisü, züve hio co küla münü püh hako ka süte, zita.

¹⁶Süri Jisu sü, nekori tsüri mhase kükreyi mozo me? zita.

¹⁷Mhakühopühri utalü külü khü u vadelü ki die khapüh covüthilü kügü vayo küti neko se mo zo me?

¹⁸Süri utalü no küpari khü ulüno pariyo, mo süko thüma thi müsu vayo.

¹⁹Kükrenamoli ulüno küparikoe, lüdo küsü, küdokhri, perüüküthi, Kürüzü kürügo, kücezü zhopo, mikütha hikohi pariyo küti na.

²⁰Mha hikohi tho mi thi müsu vayo, eli ube mütü mo die mha küti na mi thi müsü vayo mo; zita.

²¹Süsa Jisu sülüno ta rüde sü Tyre mo Sidon nyi rünaco vota.

²²Sücesü Yhie! Canaanmipü püh rüna sülüno vori die se zo die sü A phimüzhe zote, Nyepoo no David nuo; anupü küsü rüpü po kübü müsü shüh ta tale; zisü.

²³Eli pü züpühri popüh süpü khü küla mota, Süsa müthaküyiko Püce vori die pü yisü; pü po tatate, kükrenamoli pü u sa müdzi die se tazote; zita.

²⁴Eli pü la sü, a kütsüh püh müdi küva Israelmi kokroko ce küsü zo; zita.

²⁵Süsari thüno hipü vori pü rüsü die, Nyepoo a khrühi sü zote, zi bata.

²⁶Eli pü la sü, natsimi lüva kügü püh tüshikoce sü küti pütü mo, zi lata.

²⁷Süri thünopü lasü, kütho zo Nyepoo, süri tüshiko zori u nyepomi mhacoba yono rüra kükiriko pati yozo, zita.

²⁸Süna Jisu pü yisü, n kümülü zhozo ho, n külüo thipüh n küprüo thiyite, zisü. Süsa pü nüpü sütütülü sü sührhoyi ta.

²⁹Süsa Jisu thinyi sülüno ta sü Galilee dzüküzho mürhe vorita. Sidie pü cejüthuyo kho die süyo baba ta.

³⁰Sücesü thüma kro künye püh Püce vori, mo sükoe pheyhomi, mhücemi, zü po küthomi, lülemi, mo küthikünyi kükrekre kütiko züh die vori, mo Jisu süko mütü thi küsührho sü.

³¹Süsa makrooe züpoküthomi züpo küta, lülekütami sührho küta, pheyhomi shotayi küta, mo mhücemi mha ngoyi küta, hiko ngo die u malhü thi die Israel Jihova shühta.

³²Süsa Jisu müthaküyiko ci püh Püce süyi die püko yisü, I thüma kroo phimüzhete, kükrenamoli, püko tha zho süh azüh bate, mo püko mhapühri ti küto bamo, mo I püko po thükhü thi die kütsüh sülho, püko sholü phesari tayi ve tina; zita.

³³Sücesü müthaküyiko sü, uko nhatsa hilühino dipüh bi die thüma hidühi na kütico ngo püh püko külhuthiyi ve ta? zita.

³⁴Jisu pükoce, neko tsükhrüda didü püta la? Zi die kütso; püko sü, thüna mo khu künyi hu ba, zisü.

³⁵Süsa pü thüma kroo po ki cejü bayi no die pü zü khasü,

³⁶Sidie pü tsükhrüda thünako mo khuko khi pühyi die galiphi sü die cephre püh müthaküyiko belü sü, mo püko süko püh makroo zasü.

³⁷Sidie püko mütü süko tiyi die u küchu kühi thiyi; süsari ti kümüshoko shi küngu püh khopühne thüna chu layi.

³⁸Mo sünha mhati küyiko thünothünu mo natsimi sa kümo mi nyeda.

³⁹Süsa pü thüma kroo kütsüh sü va die, püzu pühlü lü die ta sü Magadan rüna taralü vori ta.