Read Chokri Naga Matthew 16 Bible Online

Matthew 16 - Chokri Naga bible

Matthew 16

¹Sücesü Phariseeko mo Sadduceeko vori die pü po tüyono zasi püh thipüh püko ka no die pü müdephi ta.

²Pü süko zü küla die sü, thüva küyice nekoe sü, tü müre bate, tsüsa tü ve tato; ziyo.

³Süsa küshüo lize, tü sü tato, kükrenamoli, tü müre mo kümhü sü zaza ba terü, ziyo.

⁴Gwine mo kürüzü shühye hio zasiko libi phu tayo küti zo, Eli Jonah sadzühküseo yono thi küsü zasio zo kümosa zasi kükre pühri khala süyi Ihote; zita. Sidie pü süko kha va die tata.

⁵Süsa müthaküyiko tasü kükreco vota, eli püko tsükhrüda khiyi rükra mota.

⁶Sücesü Jisu püko yisü, neko Phariseeko mo Sadduceeko khre yono münuyite, zisü.

⁷Eli püko thoümko dolü küpo die, süsü kükrenamoli ukoe tsükhrüda khiyi rükra mo küta na mütsete; zi bata.

⁸Jisu süo seyita die püko yisü, neko, kümülü kütsako, dipüh na neko tho neko dolü küpo die, sü kükrenamoli uko tsükhrüda khiyi rükra mo küta na te, süzi yo la?

⁹Neko tsüri lü kükreyi mozolu me? Mori tsükhrüda pühnguko mo mi nye pühnguko mo didü püh shi küngu layi shi kütiko rükra mo la te me?

¹⁰Mori tsükhrüda thünako mo nyedako, mo khopühne ditsu shi layi shi kütiko.

¹¹Neko dipüh bi die I tsükhrüda rüle po ba kümo, mori neko po Phariseeko mo Sadduceeko khre yono münuyi no küsü ri se kükreyi mota laha?

¹²Süsa pü püko po tsükhrüda lü khreyo münuyi no bamo die, Phariseeko mo Sadduceeko kümütha zü yo münuyi no küsüco seyi.

¹³Süsa Jisu tasü Caesarea Philippico vo die Pu müthaküyiko kütso die sü, Thümakoe thümanuo hi yisü sopüh lizü lü bata ha? zisü.

¹⁴Pukoe sü, humi n yisü John mi zülu khaküsüoli, humi Elijah li; mo kükrekoe Jeremiah mori sadzühküsemi püh lizi die poyo le; zisü.

¹⁵Pu süko yisü, süze nekoe a yisü sopüh lizi die lü yo la? zisü.

¹⁶Simon Peter sü, Noe rhühküba Jihova nuo Khristao zo, zisü.

¹⁷Jisu lasü puce po die, No Simon Bar Jonah nuo no yhevetho zo, kükrenamoli, uthi mo uza lüno mo, eli tüyo küba a Po tho hihi po püh n müse müngoküsü zo tina.

¹⁸I nce potü süto, Noe Peter (Püco kütsü) mo kütsü hio yono a kühuce thito; mo meza kharüko pümünyi vayi lho.

¹⁹I tüyo küde cabiko yipüh n prüto; mo no cejülü dipüh kha sheli tüyori khato; mo no cejülü dipüh khri sü sheli tüyo ri khri süto; zita.

²⁰Süsa Pü müthaküyiko po Pü Jisu Khristao li küti püh mipüh ceri pohi no die püko ce pota.

²¹Süyogwino Jisue müthaküyikoce Pu dipühbi die Jerusalemlü kho mosü shi, mo dibi die mülhiko mo pethiküzhoko mo lüsiküseko belü kümüzhe die sa teshi küti mo Pü zhosüh nha rhühlasü ta küto dzühko püh sükoce po shühdü süta.

²²Süsa Peter Püzüh kre vodie Pü likhu die sü, Nyepoo npo süzi ta süzo, mhapühceri mha hiko po n yo thita kündi zo, zita.

²³Eli pü rürüh vo Peter yisü; Satan, no ta asaco vo tayi, no a shokha pühzo, no Jihova müdolü moli thüma rüle mo thüma zholü ba küti na; zita.

²⁴Süsa Jisu müthaküyiko yisü, thüma kühopühri asa müdzi künyimi putho pu kükhakürühyi die pu cross püh die asa müdziyite.

²⁵Kükrenamoli thüma kühopühri pupho mükrü püh pu zü thiyi künyimi pu süo müdi vato; mo thüma kühopühri ana pu pho müka müdi küvami pu süo ngolayi zoto tina.

²⁶Süze mipüh cejü mütü prapüh puzü thiyi zori pu kürhühro müka va lizepu dipüh küpra ngoyi ta? Mori mipühe dipüh püh pu kürhühro züh küleyi veta?

²⁷Kükrenamoli thümanuo Pu po zapozale süh die Pu shoyimi züh kirito, mo Pu mipühpüh mhatho khüce züh die püko zhokhro thi püh prüto.

²⁸I nekoce potü süto, hice kütha humi Thümanuo Pu küdelü küvori ngo kümothe küsa ngo Ihozo küti kropüh tha zo; zita.