Read Chokri Naga Matthew 18 Bible Online

Matthew 18 - Chokri Naga bible

Matthew 18

¹Sümüsühcesü, müthaküyiko Jisu ce vori die sü, Tüyo küdelü somi yisü küzhotho thita; zi die kütso sü.

²Jisu natsimi püh cipüh Püce vori die süo püh puko dolü mütha sü;

³Sidie po küti, I nekoce potü süto, neko lü küdepüh natsimine hihi biyi kümosa, neko tüyo küdelü lüyi lhozo, zita.

⁴Süze thüma kühopühri pütho pu thi kürünupüh natsimine hihi biyi lize süosü tüyo küdelü küzhotho tazo, zita.

⁵Mo thüma kühopühri a zalüno natsimine hihi bi küti pühri zühyiyo kütimi a zühyiyo.

⁶Süri thüma kühopühri a mülüyo küti natsimi künyitho hikohi pühri thi müsüyo lize mha kügütsü püh pü volü khüyi die kügü püh dzü küzholü mülhükhri küvae veku; zita.

⁷Mha thikümüsüko na cejü hioe tsee thiyite, Kükrenamoli mhathikümüsü vorimo Iho zo kütina, süri pü na mha thikümüsü püh küvorioe Tsee thiyite!

⁸Süna n be mori n phe nthi müsü lize süo n yono da püh kügü vate, lalhe die küshothe kürhühlü lü kütae n be künanyi mori n phe künanyi ba die n külhü püh melü sü küva ceri veku.

⁹Mo n mhü nthi müsü lize, n yono süo kürüla vate, n mhü püh libi die kürhühlü vo kütae n mhü künanyi ba die n kügü püh mezalü sü küva ceri veku.

¹⁰Künyitho hiko mipühri müshuh va mo küto na ne münuyi te: Kükrenamoli, I nekoce po süto, Tüyono puko ceco kütha shoyimikoe tüyo küba a Po lhü ngo süh bayo kütina.

¹¹Kükrenamoli, thümanuoe müdi küvako külayi kütona küvori zo.

¹²Nekoe dipüh bi die lüyo la ha? Mhaceno mipüh puko krapüh ba die süko dolü püh ta ruta lize; pue hiethücimothüciko kha püh ma die ta cejüthukoyo vo die ru küta koo sü phu zo moto me?

¹³Sidie Pu süo ngoyi lize, I nekoce po süto, pue puko ru takümo hiethücimothüciko ceri süo na punüku ta zoto.

¹⁴Süsübi tüyo küba nieko Poe künyitho hiko mipüh pori ka küta Pu müdo mozo.

¹⁵Sülize n sazüh-o n yo küjo thiva lize, no vo die nenyi tho nenyi lübi kübalü pü küjo po püh pu kate, pu n khü rünyiyi ta lize no pu ngoyi te.

¹⁶Pu n zü rünyi mü ta lize, no mipüh mori mi küna züh nsa vote, sidie zhopo mi küna küsüh talüno zü kühopühri thi kümüziyi to.

¹⁷Mo pu süko züri rünyi mu talize, püh kühüce po süte; süri pu kühuo khü ri rünyi mu ta lize, pupo n mhüzülü mülükümomi mo thüsoküyimi bi tate.

¹⁸I nekoce potü süto, neko cejülü mha kühopühri khava lize tüyo ri khava zoto, mo neko cejülü mha kühopühri khri sü lize tüyo ri khri sü zoto.

¹⁹Süsari I nekoce po süto, neko cejülü mi küna zori külürhüh die mha kühopühri sho lize, tüyo küba Apo tho mha süo thisü sümi prüto.

²⁰Kükrenamoli, mi küna küsüh likhu zori aza sün kühu küngu kübara I süko dolü ba zoto tina.

²¹Süsa Peter Puce vori die sü, Nyepoo a sazüh-o ayo küjo küthi va didü kütso ta lize, apo pü küjo va pü prü ta? Va thüna kütso me? zita.

²²Jisu sü pu yisü, va thüna kütso no die I nce po mo, süri va hiethüna thi thüna kütso ri to, zita.

²³Süna tüyo küdee küdemi püh pu cetako po puko mhatho dzüh kha kümüse sü no küta bizo.

²⁴Sidie müse küsüce mipüh ne-e pupo thoküprü nye küri pü küba püh züh püce vori.

²⁵Süri pu pupo thi tsoyi lho kütana pu nyepooe süo po pu cemi, pu nuneko mo pü mha kübako mütü zhüh pü vo püpo susü nota.

²⁶Süce ceta süo tüprü pu rüsu die; Nyepoo a khü zasü te, süze I npo mütü thi sü vato, zi sü.

²⁷Süsa ceta süo ne nyepoo pu phimüzhe die pu khasü va, mo pu poko ri va pu prü va.

²⁸Süri ceta süo ta pra tice, pu besüh ceta kükremi püh pupo duli krapüh pü küzümi püh ngoyi rü pu süo tüyi die pu vo küneyi die sü, no a popu kütako su süte, zita.

²⁹Sücesü ceta pu besüh süo tüprü pu phelü züyi die puce sho die sü, a phimüzhe die tsühilute, I ri npo thi nprü tole zisü.

³⁰Süri pu mu die pupo susü kümothe pu züh vo küdecelü süva.

³¹Sücesü ceta besüh kükrekoe ceta hio dipüh thi ta sheli ti ngo sü die puko lü su shüh ta, süna puko tavo puko nyepoo ce dipüh bi ta sheli küti mütü püh po sü.

³²Süsa pu nyepoo pu ci püh vori die puce, Yhie, No ceta n roküneo no n müzhemülo küta na I n popühko mütü va püh n prü süe.

³³I n phimüzhe küsübi die nori ceta n besühko phimüzhe ti müsüh mo me?

³⁴Sidie pü nepoo pulü rüda shuh die ceta hio pu popühko mütü susü kümothe pu tü püh mi müthimünyiyo küti küdece kükhüko belü süva.

³⁵Süsü bi ne kühopühri ne mülü lüno ne sazümi küjoko va püh prü kütho thiva molize tüyo küba a Po ri neko yo süsü bi ta zoto.