Read Chokri Naga Matthew 2 Bible Online

Matthew 2 - Chokri Naga bible

Matthew 2

¹Süze Herod küde-o tüce Judea cejü lü Bethlehem rüna lü Jisu münu küyice, Yhie! Nathoco mhaküsemi kropüh Jerusalem lü vori die sü;

²Münu züh küba Jewmi küde-o sü dice ba? Kükrenamori, ha nathoco Pu thünyio ngo die pu rüsu to vori küzüna zidie kütsota.

³Herod küde-o mha hiko se küsüce; pu mo Jerusalem thüma mütüri pu züh die ulü krokrühyi mota.

⁴Sidie pu pethiküzhoko mo lüsiküseko mütü ci künguyi die pukoce; Khristao sü dipühce münu tozu ta ra ha? Zi kütso.

⁵Puko sü, puce, Judea cejü lü Bethlehem li küti lü to, Kükrenamori, sadzühküseo po hibi die thopüh müta tina;

⁶Mo no Judea cejü lü Bethlehem, no, Judea cejü lü küzhoko dolü künyithoo motazo. Kükrenamori, n yono Küdenumi püh parito, mo süo tho a thüma Isrealko kükhü thi zoto küti na zita.

⁷Süsa Herod mükhrüh mhaküseko cizüh vori die pukoce, dipühküthice u thünyio pari ta shi küti pu tütso thizo die kütsoyi.

⁸Sidie pu süko kütsüh püh Bethlehem lü sü die püko yisü, neko vo die neko tütso thi die unu-o phute. Sidie pu ngoyi lize la vori die ace po süte, a pori Pu rüsu küto na, zisü.

⁹Süze puko küde-o zü rünyiyi die ta zo vota, mo puko nathoco küngo thünyio puko mhuzü ra vo die unu-o khapüh kümüzü thüthi-o pitü lü bata.

¹⁰Puko thünyio ngoküyice puko nü shühta.

¹¹Sidie puko ce-olü lü küyice, unu-o Pu zu Mary züh ba die ngoyi, süna puko nürhüh prü Pu rüsuta. Sidie puko mhadzühko phrühyi die suna, dhunatsa mo mha rüh küthünyiko püh Pu prü sü.

¹²Süsa puko mholüno Jihova puko po Herod ce sala vo hino küta na; puko sho kükre züh sü puko tho puko rünana lü vota.

¹³Süze puko ta küta sa, Yhie, Nyepoo shoyi-o Joseph mholü puce vori die sü; no süyite, sidie unu-omo Pu zu unyi züh Egypt lü vo tate, mo I nce po sü kümothe sülü batate, kükrenamoli Herod-e nu tsüo müka va tozu phu zoto kütina, zita.

¹⁴Süsa pu süri die unu-o mo Pu zu unyi zühyi die tüzühzüh ta Egypt lü prüta. Sidie Herod sata kümothe sülü bata.

¹⁵Süosü Nyepoo sadzühküse-oe po die; “I Egypt lüno a nuo cipüh pariyi;” zipüh kümüta züo thi tsühyi kütona.

¹⁶Sücesü Herod-e mhaküse süko pu shüh küva seyi die pu nümo shüh ta, sidie mi kütsüh püh mhaküseko celüno putü-o setü küyi bi die Bethlehem mo sushi sümhü küba thüpunumi tse küna mo sükhroko mütü dokhri tsova.

¹⁷Süosü Jeremiah sadzühküse-oe po püh kümüta;

¹⁸Rama lü mhakhü püh se, kra mo thükri thi shüh; Rachel po pu nuneko kri krakra, sidie di kütako na pupo pulü luyi mota; süzi küsüo po tsühyi küto na.

¹⁹Süsa Herod sata mütha, Yhie, Nyepoo shoyimi püh Egypt lüno Joseph mholü puce vori die pu yisü;

²⁰Sürite, die unu-o mo Pu zu unyi züh ta Israelmi cejülü lavo tate, kükrenamoli unu-o kürhühro phu kübako sü sata kütina.

²¹Süsa pu süri die unu-o mo Pu zu unyi züh ta Isrealmi cejü lü la vori ta.

²²Eli, pu Archelaus pupo sühlü Judea cejülü küde thi küba seyi die sülüvo müprüh ta. Süri pu mholü Nyepoo celü zü seyi die ta sü Galilee co vota.

²³Sidie pu vo Nazareth li küti rüna pühlü lhü bata süosü Pu yisü Nazarethmi li die cito; zidie sadzühküsemiko po püh kümüta züo tsühyi küto na.