Read Chokri Naga Matthew 22 Bible Online

Matthew 22 - Chokri Naga bible

Matthew 22

¹Süsa Jisu küzüve die püko khü küla la die sü.

²Tüyo küdee küdemi püh-e punu nolülhü küsüh küsü bi zo.

³Sidie Pu pu shoyiko kütsüh püh müzümüra müse püh kümako ci, eli süko vori muta.

⁴Süsari pu shoyi kükreko kütsüh sü die; Vo die cipüh kümakoce po zo süte, Yhie! I thüvalhüo küsühyi te, atho müdoko mo ace ari u pho küveko dokhri yi die mha mütü küsüh püh mate, nolülhüo lü vori no die ci süte, zisü.

⁵Süri puko süo lü kürübro die utho u sholulü vota, mipü putho pu yilü prüta, kükremi püh pu lhetho sholü vota.

⁶Mo kükrekoe pu shoyiko tüyi die süko brü kümünga mo dokhri va.

⁷Eli küdeo mha sükose küyice pu lü rüda ta sidie pa riwhümi kütsüh sü die küdokhri süko müka va mo puko rüna ri müto va,

⁸Süsa pu pu cetako yisü, nolülhüo küsühyite, eli müzümüra cipüh kümakoe tülhü hiolü voriyi sümo te,

⁹Süna neko shopükolü vo die thüma küngo khü po nolülhüo lü voriyi no ci süte, zisü.

¹⁰Süna ceta süko pra die shopükolüno thüma küngo küve küsü mütü ci künguyi, sidie rüsomiko vori tülhü ceo chuyi ta.

¹¹Sücesü küdeo puphremiko pe tozu die celü lüri tice mipüh nolü kühi khüne süh mo die ba küti ngoyi

¹²Süna Pu süoce podie, A züh-o, no dibi die nolü lhülü kühi khüne süh mo die vori ba ta la? Zi die kütso ta. Sücesü pu mha pühri poyi mota.

¹³Sücesü küdeo pu cetako yisü, neko, vo pu phe pube phayi die püh vo shozu küzühlü kügü vate; sidie sülüno kra mo uhu thüzhe pu bata to, zita.

¹⁴Kükrenamoli kükro ciyi, eli küda küyi-e tsazo, zita.

¹⁵Sücesü Phariseeko vo kürüthi die dibi die Pu züpolü Pu tüyi toshi küti kürüthi.

¹⁶Sidie pukoe puko sadziko po, Herodiamiko sa die kütsüh püh Püce sü die sü, Kümüthao, no zütho zo, mo kütho tülüno Jihova zhoko tha püh mi kayo küti, mo no mipühri müprüh tayo kümo ha se bazo, kükrenamoli no mipühri rho mükre tayo kümo na.

¹⁷Süna no dipüh lüyo sheli hace po süte, Caesar khrü khrü küti hi thüzho me moa? zisü.

¹⁸Jisu püko külü seiyi die sü, Neko küthürakütiko, neko dipüh na a müdephi yo la?

¹⁹Khazhonu dulio püh a müka sü ka zisü, Süce puko ri dulio püh pu ka sü.

²⁰Süsa Pu süko yisü, Marheo hi sopüh marhea? Mo hio sopüh züa? Zidie kütso sü.

²¹Puko sü Pu yisü, Caesar zo, zita. Süsa pu süko yisü, süze Caesar züko püh Caesar prüvate, mo Jihova züko püh Jihova prü vate; zita

²²Puko zü hiko se küsüce puko malhü thita. Sidie Pu khava die utho u sholülü vota.

²³Sünhasü küsami rhühlasü lho lie poyo küti Sadduceeko vori Pu kütso die sü,

²⁴Kümüthao, Moses po küti, mi püh punu di die sata lize, pu sazüh-o po pu cemi yi die pu zürao shühye mülhü süte; zi die popüh ma.

²⁵Süze hizü ha dolü sazühzüra mi thüna ne. Süce kürathoo ceyo küyice pu küthi ne ta die sata, mo punu pühri di; süsa pu cemi va püh pu sazüh-o prüva.

²⁶Mi künao ri, süh-o ri süzi vo thünao kütso ta.

²⁷Künuthoco thüno süpü ri sata.

²⁸Süzi lize rhühlaküsü nha thüno süpü sü puko mi thünako dipüh-o cemi thi tata? Kükrenamoli, puko mütü süpü püh u cemi thi va tina, zita.

²⁹Jisu puko khü küla die sü, neko kütho lüsi ri semo, mo Jihova küku ri semo die kükri tayo zo.

³⁰Kükrenamoli, rhühlaküsü nha puko thüno ri yilho mori mhi ri lho, sidie tüyo shoyimi bi ta zoto tina.

³¹Küsami rhühlaküsü nha rüle na Jihovae po küsü.

³²Abraham Jihova, Isaac Jihova, mo James Jihova; zipüh kümüta nekoe phi mo zo me? Jihovae küsako Jihova mo kürhühko Jihova ri zo, zita.

³³Sücesü thüma kroko süko se küsüce Pu kümütha züko na puko malhü thi ta.

³⁴Süri Phariseekoe Jisue Sadduceeko zü va müdi küva se sü die vo künguyi.

³⁵Mo puko dolü thüzhoküsemi püh Pu küdo tozu die sü;

³⁶Kümüthao, thüzholü zü dipüh-o küzhothoa? zita.

³⁷Jisu pucepo die, no n mülü mütü süh mo n kürhühro mütü süh mo n külü mütü süh n Nyepoo Jihova khrü mo rhoyi te;

³⁸Hihi zü thürao mo zü kha küsü küzho thoo zo.

³⁹Süsa künao lize hihi, No n sühzanumi khrü püh ntho n kükhrü biyite.

⁴⁰Thüzho mütü mo sadzühküsemi zü mütü ri thüzho hinyi püh u zübo thi ta zo, zita. Khrista dzüh kütso küta

⁴¹Süsa Phariseeko vo Küngu küyice, Jisu püko kütso die sü,

⁴²Neko Khristao yisü sopüh lizi die lüyo la? Pu sopüh nu la? Zisü.

⁴³Puko Pu yisü David nuo zo, zisü. Pu süko yisü, sülize, David dibi die thazü Rüpüo züh die Pu yisü;

⁴⁴Nyepooe a Nyepoo ce; N ngomuko khapüh n phekhro süva kümothe No a zaco bazo yite; zita?

⁴⁵David süce Pu yisü Nyepoo li ta ze; süo dibi die pu nu ta?

⁴⁶Süsa mipühri Püce mhapühri poyi kündita; süzomori sünha yogwino mi pühri Püce mha kütso sa müprühta.