Read Chokri Naga Matthew 24 Bible Online

Matthew 24 - Chokri Naga bible

Matthew 24

¹Süsa Jisu kürüsuce lüno ta pra die ta tazü tice, Pu müthaküyikoe mha püh Kürüsuce thi kümako tha Pu ka tozu die Puce vori.

²Sücesü Jisu puko yisü, Neko mha hikohi ngo ba zotho? I nekoce po süto; Mha hikohi mütü phu kütu va mo die kütsü püh pori küpiba pü bayi lho; zita.

³Süsa Pu Olive cejüthuyo ba küyice, müthaküyiko mükhrüh Puce vori die sü; Mha hikohi dipüh küthi ce tata? Mo hio vorita küto zasi, mocejüo thüla küta zasiko püh hakoce po süte, zita.

⁴Sücesü Jisu puko zü küla die sü, mipo neko Shuh va mo küto na lala bayite;

⁵Mhakükrenamoli, thüma kükro aza süh vori die, I Khristao zo; zidie thüma kükro shüh züh tata to tina.

⁶Süzomoli, neko thüriküthi mo thürithi küto dzüh küpo shuh küti se to; sücesü neko lü müyhu müzhe ta mo küto lü zoyite. Kükrenamoli, mha hikohi vori moyi lho zo tina; süri süo thülao mo.

⁷Sücesü shühye püh-e shühye kükre püh phimu, küde püh-e küde kükre püh phimu sürito, süsari thükre, thüpühsüh, ceyice sü küti, cejü büh kükrekre kütiko lü süri to.

⁸Süri mha hikohi mütü kümüzhe küto thürako zo.

⁹Sücesü mi neko tüpüh kümüzhe kütikolü sü die neko dokhri to. Sidie aza na shühye mütü po neko mütsü to.

¹⁰Sidie thüma kükro ri a yo jota to Mo huhu tüpüh mi belü süto, mo mi püh mipüh mütsu tato.

¹¹Süze kücezü sadzühküse kükro süri die thüma kükro shuh kütse züh tata to.

¹²Mo mha küsü krothori kütana thüma kükro kükhrü müko tato.

¹³Süri hie zo tha pütüti küyi mi külayi zoto.

¹⁴Sülize shühye mütü mhüzülü zhopo püh thisü küto na cejü mütülü küde züyi küve hio po püh mi mütha tso sü zoto; sü züh thülao vori to.

¹⁵Süna thazü Daniel sadzühküseo po popüh kümüta; mhava kümürho shuh süküto mo üzü küzüh thizo küto vori die kümüsathiolü tha küyi ngo küyice; zü süo phiyo kütimi po seyite.

¹⁶Sücesü Judea lü kübami po ta sü cejüthuyo vo tate.

¹⁷Mo cejüthuyo kübami po mhapühri khiyi tozü die la kiri hite.

¹⁸Mori yilü kütamiko po u khü khiyi tozu die la vori hite.

¹⁹Eli sücesü phosimo kütako mo u nune no kübakoe thiyite!

²⁰Süri neko ta küto tü süo po tüsühce mori kürülü tü nha mo küto na sho ba yite.

²¹Kükrenamoli, sücesü thüma po kümüzhe püh kümüre thi die cejü thiyi prühlünovori tsü kütso mori hisari mhapühceri süsü biyi külho pü thizoto küti na.

²²Süze pu tüsozho süko thi kümüzü süzo kümosa mipühri külaküyi ngoyi lho zoto. Süri küdaküyiko züve na tüsozho süko thi müzü süto.

²³Sücesü mi nekoce Khristao lice ba mori hice ba ziri; mülü hite.

²⁴Kükrenamoli, Khrista kücezü mo sadzühküse kücezü süri die mha zasi kümüre mo u malhü mhathoko thi püh mi müka to; sidie thiyi küvethe küda küyiko ri shu kütse züh tato tina.

²⁵Yhie! I müzümüra nekoce po sü va züho.

²⁶Süna mi nekoce, Yhie! Pu nhatsalüba, ziri vo hite; Yhie! Pu kümükhrühra ba, ziri mülü hite.

²⁷Kükrenamoli, nathoco tü küprüh sü lize nakrocori ve voyo küti bi thümanuo küvori ri süsü bi zoto tina.

²⁸Kükrenamoli, kühopühra ri küsamo küzüra thirhako ri vo sülü Küngu to.

²⁹Kümüzhe küti tüsozho süko vota mütha nace züh tato; mo khri vesü mu tato, sü libizo mo ri thünyiko ri tüyo no rüra tato, mo tüyo küku mütü ri sü küna vato.

³⁰Sidie tüyono Thümanuo zasi thipüh mika süto; Sücesü cejü küta thüma lünyiko kra tato, sidie püko thümanuo küku süh die zapozale thi die tüyono kümhülü kiri küzü ngoto.

³¹Sücesü Pu Pu shoyimi kütsüh püh süko po thütsü khu kümüre thi süto, sidie puko po tüyo lapühcono vo kükreco kütso tükhra küdako lüno Pue küdaküyiko phu Künguto.

³²Süze shedüboo yono küzüve küsü nekoe seyite, pücoko müzü la die; pu nyi nyisa thü pari kütace; nekoe tülü tate zi küti seyiyo.

³³Süsü bi die neko mha hikohi ngo küyice, pu tü müno te, cekhace thate; zi küti seyite.

³⁴I neko ce potü süto, mha hikohi mütü thi tsühyi kümothe, tsüdo nulhü hiohi di talho.

³⁵Tü mo cejü di tato, eli, azüko di ta lhozo.

³⁶Süri pu tüsozho mo pü bavüdoo mipühri semo, A po zo kümosa tüyo shoyimiko ri semo.

³⁷Süri Noah tüce bi thümanuo küvori tüce ri sü bi zoto.

³⁸Kükrenamoli, sücesü dzü de süri ta kümothe mo Noah püzu rülü ta kümothe mi mhati mha kra, thüno yi mo mhi bazo.

³⁹Sidie zü kro süri die puko vopü ta kümothe püko se bamo; thümanuo küvori ri süsü bi zoto.

⁴⁰Sücesü mi küna yilü tato, mipüh khiyi tato, mo kükreo kha vato.

⁴¹Thünomi küna mha kügünyo süh die mhagü thato, mipüh khiyi mo kükreo khavato.

⁴²Süna neko khü ba zoyite, kükrenamoli neko Nyepoo küvori tü sekümo na.

⁴³Süri neko hio se bato; mhaceno ce nyepomi püh-e kürügomi rikhu küvale ditsüolü vori to sü küti se ba lize puce khü münu ba die kürügomi po vori pu ce rhe va lho.

⁴⁴Süna neko ri bayite; Mhakükrenamoli, neko lüba kümo bavüdo pühlü thümanuo vori zoto tina. Küzütho mo kürüzü ceta

⁴⁵Süze sopühno ceta küzüthoo mo pu do küveo thi die pu nyepomi po pu thipüh celü nyepo thi die pütü tüce mhapüh püko prü kübao thi ta?

⁴⁶Pu nyepoo küvori tüce süsü bi thi ba die ngoyi küto ceta süo yhevetho zo.

⁴⁷I nekoce potü süto, pu thüma süo po pu mha mütü mhu nyepo thi tato.

⁴⁸Süri kürüzü cetao pulü no sü, a nyepoo vori münu yo;

⁴⁹Sidie pu ceta besüh kükreko vü mo küthi shühdü tato; mo kümüzühmiko züh die ti mo kra müzüh bato;

⁵⁰Ceta süo ne nyepoo pu lüba kümo tüsoo lü mo pu müri ba kümo bavüdoolü vori tato.

⁵¹Sidie pu dothü küna thiva die pu püh küthüra kütiko kroolü sü vato; sülüno kra mo uhu thüzhe pu bata to.