Read Chokri Naga Matthew 26 Bible Online

Matthew 26 - Chokri Naga bible

Matthew 26

¹Süze Jisu zü hiko pothü küsüsa, Pu Pu sadziko yisü,

²Zho küna sa cüküvonye nye ta küto neko ri seba, mo thümanuo tüpüh gu va no die mi Pu tüsüto, zita.

³Sücesü pethiküzhoko mo lüsiküseko mo mi dolü mülhiko vo die Caiaphas li küti pethiküzhoo ceta zholü Künguyi.

⁴Sidie püko do ve shüh die Jisu tüpüh dokhri va küto kürüthi.

⁵Süri püko poti, thüma dolü kübvü küta kümüprüh na, thünye tüso nha ta sü, zita.

⁶Süsa Jisu Bethanilü Simon mpa küthio celü kübace,

⁷Thünomipü püh alabaster tir püma kürüh shüh püh süh vori die, Pu hi kübalü süo la püh Pu piyo sü.

⁸Eli Pu sadziko sü ngosü die puko ro die sü, dipüh na mha hikohi püh müka va zü shi?

⁹Kükrenamoli, tir hihi püh mhama kükro khriyi die püh küdikütsakhumi vaphi süyi vezo küti na; zita.

¹⁰Süri Jisu süo seyi die pükoce, Neko dipüh na thüno hipü küyhu yo la? Pu ayo mha küve thi sü zoe,

¹¹Küdimikoe neko zühsüh bayo zo, süri I neko züh süh bayi Iho.

¹²Pu tir hihi lapüh amoyo küsü, Pu a kükhrüh ne küsüh sü künyi na zo.

¹³I nekoce potü süto, cejü mütü züyiküve hio püh zhopo thisü küto mütülü, thüno hipü mhathi küsü hi kürükra ri sa po zoto, zita.

¹⁴Sücesü Iscariot Judas li küti mi kürikünako mipüh pethiküzhoko ce vo,

¹⁵Mopu sükoce, l pu tüpüh neko prü sü lize neko dipühpüh a prüta? zisü. Süce puko rüka sühmüri phi püh pu prü sü.

¹⁶Mo süyo gwino Pu tüsü küto tü küve ri bata.

¹⁷Süsa khre yisü kümo tsükhrüda küti nye thüra nha müthaküyiko Jisu ce vori die sü, No hakopo dipüh ceono cüküpranye küsüh püh npo küti n müdo ta? zisü.

¹⁸Süsa Pu sükoce, neko rüna nadeolü lü die mipüh ce, Kümüthaoe, atü tso bate, I müthaküyiko züh die n ce lüno cüküpra nye nyeto, süzi ba le, zi süte, zita.

¹⁹Sidie müthaküyikoe Jisu pükoce po küsü bi die thiyi, sidie puko cuküpra Ihüo küsühyi.

²⁰Süsa thüva voritice, Pu mi kürikünako züh bayi,

²¹Mo püko mhati küyice, Pu süko yisü, I nekoce potü süto, neko mipüh atü püh mi belü süto, zita.

²²Sücesü püko lü sü püh kümüre thita, sidie mi pühpüh Pu yisü, Nyepoo süosü I no me? Zive thita.

²³Mo Pu püko khüküla diesü, Mipüh pu be pühlü azüh mükhu pühlü süh küsüo tsü tho atü püh mi belü süto, zita.

²⁴Tho püh küma bi die, thüma nuo tata to, Eli puna thümanuo tüpüh mi belü küsüoe; Tsee thiyite! Pu münu püh vori kümoe veku to murü.

²⁵Sücesü, Judas, Pu tü sü kütooe sü, Kümüthao, süosü Ino me? zisü. Süce Pue püce, no posü tazo; zita.

²⁶Süsa püko mhati kübalü Jisu tsükhrüdao khi püh die galiphi sü die cethiyi; sidie Pu khi püh müthaküyiko prü die sü, Yi püh tiyite, hihi amozo.

²⁷Süsa Pu tüheo püh Jihova shüh sü die khipüh püko prü die sü, neko hiohi yipüh kra ve thiyite;

²⁸Kükrenamoli, hiohi aza, küzütsüh küzükho küyi küsao, thüma kükro küphoma rhayi küto na mükrüh küsüozo.

²⁹Eli, I nekoce potü süto; I apo küdebalü neko züh die khübühzü küsa krata küto tüsoo tsoyi kümothe, I tha yogwino khübühbo hio se yono kra sayi lhote; zita.

³⁰Süsa püko küzüh tsale püh thiyi die ta sü Olive cejüthuo khota.

³¹Süsa Jisu pükoce po die, Neko mütü ri tsüzi ayo jo ve thita to, Kükrenamoli, I tüko kükhüo vü süto, mo tüko kroko ta küpreyo tato, zidie thopüh müta tina.

³²Süri I rhühlasü küta sa I neko züra ta sü Galilee lü vo tato, zita.

³³Peter Pu khü küla die sü, Mi mütü n yo jota zori, I mhapühceri n yo jota lhozo, zita.

³⁴Jisu sü püce, I nce potü süto, süosü, tsüzi thüvü kükhu mhüzü no va süh aza phra mu ta to, zita.

³⁵Peter sü Puce, Apo n züh sa mosü ta lizo shi I mhapühceri n phra mu ta lhozo; zita. Müthaküyiko mütü ri süzi ve thite.

³⁶Süsa Jisu puko züh die Gethsemane liti thinyi pühlü vori die Pu müthaküyiko yisü, I lilü vo die sho kübace neko hice bayite, zita.

³⁷Sidie Pu Peter mo Zebedee nunyi züh vo die Pülü kümüzhe shun bata.

³⁸Süsa Pu puko yisü, Alü kümüzhe püh sata küto thi zote, Neko hice ba die a züh khü ba yite.

³⁹Sidie Pu küdo kümücuh zalü phe die tüprü zührüh pü die küsho thi die Yhie! Apo, mhaceno thiyi ve to lize, tühe hio püh a thürü vate, zita. Süri a müdo mo n müdo thiyite, zita.

⁴⁰Süsa Pu müthaküyikoce vori die püko züh küzü ngo küyice, Pu Peter yisü, neko bavüdo pühri azüh khü bayi Ihozo te me?

⁴¹Küdo kütilü lü ta mo küto na neko khü mo la bazo yite: Rüpüo ce lacoe thinyi bazo kütho, eli thio celacoe müza te.

⁴²Süsa Pu va künaolü la vo sho die, Yhie! Apo, apo tühe hio kra mo die khavayi lho zo to lize ntho n müdo thiyite, zita.

⁴³Süze Pu la Vori die puko zühzü zo küti ngoyi, kükrenamoli puko mhürhoyi lhozo zü küta na.

⁴⁴Mo Pu puko khava die va süh-o lü la vo die hi zü küpocoko po shola bata.

⁴⁵Süsa Pu ta Pu sadzikoce vori die puko yisü, neko tsüe züh mo rülüyite, Yhie, pütüo vorite, mo mi thümanuo tüpüh küphomako belü süva to bate.

⁴⁶Sürite, die uko tazü ta khe, Yhie a tüsü küto-oe vori bate, zita.

⁴⁷Süsa Pu züpo küthalü Yhie! Judas kürikünako dolü mi püh-e pethiküzhoko mo thüma dolü mülhiko celüno zesho mo sühdü küpüh thüma krodepüh züh die vori thata.

⁴⁸Süsa Pu tüsü küto maoe sü mhüzü zasi püh püh puko prü die; I vo die mbo sü kütoo sü pu zoho, neko Pu tüyi te zi püh mata.

⁴⁹Si die pu Jisu ce pheri die, Küveo thiyite, Kümüthao; zidie Pu mbo sü.

⁵⁰Süsa Jisu pu yisü, A züh-o, no dipühna hice bata; zisü, Süsa puko vori die puko be püh Jisu yo sü die Pu tüyita.

⁵¹Sücesü Jisu züh kütako mipüh pu be yho pra pu zesho süzühyi die püh pethiküzhoo cetami püh ni müta va.

⁵²Süri Jisu pu yisü, n zeshoo püh u balü süla vate, kükrenamoli, zesho sühyo kütimi zesho yono kata zoto küti na, zita.

⁵³Me, no I tsühi ri Apoce sho sü lize Pue tüyoshoyimi legion küriküna küzü ri kütsüh süyi lho lizu lü ba me?

⁵⁴Eli, süzi ta lize dibi die Kütholüsilü züko thi tsühyi ta? zita.

⁵⁵Sütücesü, Jisu thüma kroo yisü, neko zesho mo sühdü püh die kürügomi kütü bi die atü to vori zü me? I tüsonha Kürüsucelü neko züh ba die mütha vori zo, eli, sücesü neko a tüyi mo.

⁵⁶Eli mha hikohi thi kütae kütholüsilü sadzühküse züko po tsühyi küto na zo, zisü. Süsa müthaküyiko Pu kha va die ta tso ta.

⁵⁷Süsa Jisu tü küyiko Pu züh die pethiküzhoo Caiaphas celü, lüsiküseko mo mülhiko vo Küngu kübara vota.

⁵⁸Süri Peter-e u küla pe zova tozu die Pu sa müdzi zo Pethiküzhoo celü vo die; sülüno pu cetako zühbata.

⁵⁹Süsa pethiküzhoko, mülhiko mo müthi kühu mütüri Jisu dokhri va küto na; Puyo kütho kümo zhopoko phu süta.

⁶⁰Eli, kücezü zhopo kükro vori zori puko zhopo utü pühri ngoyi mota, Künuco mi küna vori die sü;

⁶¹Po küti Thüma hiohi po die, I-e Jihova rüsuceo dorhü va die zhosüh nha süo thi la sü vayi vezo, ziyo ho; zita.

⁶²Sücesü Pethiküzhoo süri die sü Pu yisü, No mhapühri küla sü Iho zo me? N kümütsu zhopoko hi dibi ta?

⁶³Süri Jisu kümükrethi bata, Süsa Pethiküzhoo Pu yisü, I-e Jihova rhüh tayo kütio zalüno rüshu zo die poto, süosü noe Jihova nuo Khrista zo me mo sheri hace po süte, zita.

⁶⁴Jisu pu yisü, No posü vazo; süzori I nce potü süto; Hisa nekoe Thümanuoe Kükuthoo zaco bayi die tüyono kümhülü vori küzü ngoto, zita.

⁶⁵Süsa Pethiküzhoo pu khüne cerhü die sü, Pu Jihova kütha zü pote, ukoe tsüsa dipüh zhopo kükre phu sa ta? Yhie nekori Pu Jihova kütha khü seyite, zita.

⁶⁶Nekoe dipüh Iü yoa? zisü. Pükoe pola die sü, Pue sata sü ta zo, zita.

⁶⁷Süsa pükoe mhütsa püh Pu züyo sü, duthü püh Pu vü mo kükrekoe bezi püh Pu vü, sidie sü;

⁶⁸No Khristao, sopühno n vü sheli tha sadzühküse zü hace po süte, zita.

⁶⁹Sücesü Peter-e ceta shozuco barü, rülimi pü püh puce vori die sü, No ri Galileemi Jisu züh tayo zoe, zita.

⁷⁰Eli, Peter süko mütü mhüzülüno mo lizo die sü, No dipüh po ba sheli I se mo, zita.

⁷¹Süsaripu ceta pari tice rülimi kükre püh ri pu ngo sü die süce kübako yisü; Thüma hio ri Nazaretmi Jisu züh tayo zo, zita.

⁷²Süri pu moli zo die rüshukhu zo die sü, I thüma süosü semo zo, zita.

⁷³Süsa zaco, süshice kübako püce vori die sü; Nori püko dolü mipüh zo küthozo, n züpolüno n seyi tazo, zita.

⁷⁴Sücesü pu rüshu büh zo die sü, I thüma süo semo zo, zita. Mo süzisü mütha thüvü khuta.

⁷⁵Süsa Peter-e, Jisu pu yisü, No tsüzi thüvü kükhu mhüzü va süh a müla tato; süzi küma jüo rükravoriyi; Sidie pu shozu vo die kra püh kümüre thita.