Read Chokri Naga Matthew 27 Bible Online

Matthew 27 - Chokri Naga bible

Matthew 27

¹Süsa tüso pari mütha pethiküzhoko mu thüma dolü mülhiko mütü vori Küngu die puko Jisu müzho die Pu dokhri va küto na kürüthi.

²Sidie puko Pu phayi die züh vo Pontius Pilate puko nadelü governor belü süva.

³Sücesü Judas Pu tü küsüoe mi Jisu müzho küva ngo sü die pülü kümüzhe shüh die rüka sühmüriko khi la püh vo pethiko mo mülhiko prü die sü.

⁴I-e küzho küdimi püh thüza mükrü too küzü hi phomate; zita. Süri puko sü, süsü hayo mo ntho lüyite; zita.

⁵Süsa pu rüka süko kügü püh Kürüsucelü sü va die ta vo pütho kürüshokhri ta.

⁶Süsa pethiküzhoko rüka süko pühyi die sü, hihi thüza ma zo tina püh raka bühlü küsü thüzho mo, zita.

⁷Süna puko kürüthi die, rüsomi kükhrüh thi thi küto na rüka süko püh le küthio yi pro püh khriyi.

⁸Süna tsüdo ri yi süo püh thüza yi, zidie ciyo.

⁹Sücesü, thazü Jeremiah sadzühküseo po; I-e Israelmi nuneko humi po Pu ma shepüh kümüta bi die; puko rüka sühmüri pühyi die,

¹⁰Süh vo Nyepoo ace po küsü bi die püh le küthio yi, khriyi, zi püh kümüta züo po tsühyi küto na.

¹¹Sücesü Jisu rüna sülü governor mhüzülü tha küyice governor Pu kütso die sü, No Jewmi küdeo me? zita. Jisu pu yisü, N küpo sü zo, zita.

¹²Sülize, pethiküzhoko mo mülhiko Pu kümüzho zü po zü zori Pu mhapühri küla mota.

¹³Sücesü Pilate Pu yisü, puko n kümütsu zü di thüdüpüh po ba sheli no se ba mo me? zisü.

¹⁴Süri Jisu pu khü küla sü shemo zo küta na küzhoo po pu malhü thita.

¹⁵Sülize thünye süo tülü sü küzhooe thüma kroo müdo kütso die küzümi püh kha küsü thüzho tayo.

¹⁶Sücesü pükoe küzü zalemi püh pu za Barabbas li küti püh ba.

¹⁷Süna puko vori küngu küyice, Pilate puko kütso die sü, A po sopüh kha püh neko küprü neko nü ta? Barabbas to me? Jisu Khrista li kütio ta? zisü.

¹⁸Kükrenamoli, thüma hikohie Pu ngo puko ro die Pu tü küsü Pilate-e se küba na.

¹⁹Süzomori pue sheti balü ba kütice pu cemi-e shoyi püh kütsüh püce sü die, No thüma kümatho hio yo mhapühri thi hite, kükrenamoli, I tha a mholüno Pu na kümüzhe shüh zo küti thi ho, zi küta na.

²⁰Süri pethiküzhoko mo mülhikoe Barabbas shoyi mo Jisu püh gu va no die makroo kühi ta.

²¹Sücesü küzhoo püko yisü, unyi mi küna dolü apo sopüh-o püh neko küprü neko müdo ta? zisü. Mu pukoe sü Barabbas li kütio to li zita.

²²Pilate püko yisü, süze apo Jisu Khrista li kütio püh dibi va ta? zisü.

²³Puko mütü sü, pu püh guva te; zita küzhoo la sü, Pu dipüh thi kükri küva na ta? zisü. Süri puko se mütoku die sü, Pu püh gu vate; zita.

²⁴Süsa Pilate-e ku küyio moli mha kübvüku pari ta küzü ngo die, zü püh vori die makroo mhüzülü pu be mütüdie sü, netho pete, I thüma kümatho hio za na küjo ayo di ho, zita.

²⁵Süzi küsüce thüma mütü se die sü, pu za po hayo ri mo hanu hane yori vorite, zita.

²⁶Süsa pu Barabbas kha püko prüva, mo pu Jisu vü sü die pu püh guva no die kha puko belü süva.

²⁷Süsa governor riwhumiko po Jisu züh die müthi kühu celü lü mo riwhu kroo mütü vori die Pu hu püyi ta.

²⁸Sidie puko Po khüne celhü va die khüne müreve küti püh khi püh Pu yo gu sü;

²⁹Süsa puko tsahu kürepüh küde pirüh thiyi die püh Pu piyo sü, mo tükhrathü püh püh Pu be u zaco sü. Sidie shetü Pu mhüzülü prü Pu krühnyi die, Judako küdeo küveo thiyite zi bata.

³⁰Sidie puko mhütsa püh Pu rüshu mo tükhrathü püh Pu pi vü.

³¹Süsa puko Pu krühnyi küti thoko thitsüh küvasa Pu khüo Ihüva die Pu tho Pu khüo khi püh Pu yo sü. Sidie Pu püh guva tozu die Pu züh tata.

³²Süze puko tavo küzüce Cyrene püh pu za Simon li küti püh ngoyi die pu kümu thi püh pu po Jisu cross püh.

³³Süsa püko Golgatha, uco mi pi khuro li küti thüthi pühlü vori küyice;

³⁴Puko khübühzü püh kükhrozü sa küre kütipüh Pu po kra nosü, süri Pu süo mütha die kra muta.

³⁵Süsa puko Pu püh guva die Pu khüne ri püh cethi khüle thiva die puko tho küzayita. Süosü sadzüh küseo po püh kümüta, Puko tho a khüne küzayi, mu puko a khüneko yo cethi khüle thi; zi püh kümtao thitsühyi kütona.

³⁶Sidie puko süce ba die Pu khü bata.

³⁷Süsa puko Pu pi mhuyo Pu kümüzho zü tho die, Hiohi. Jisu, Jüdami küdeo zi püh ma.

³⁸Sücesü kürügomi küna, mi püh Pu zaco mo mi püh Pu veco zidie püh Pu sa gu püh ma,

³⁹Sücesü thüma pheliphe küti mütü pigü die Pu kürhe die sü;

⁴⁰No kürüsuce dorhü va die zho süh nha thi lasü va kütoo, N tho n külayite, No Jihova nuo kütho lize; cross yono ta kiri te, zi bata.

⁴¹Süsü bi pethiküzhoko ri lüsiküseko mo mülhiko züh die, Pue mi kükremi külayiyo, eli,

⁴²Pu tho Pu külayi lho, mhaceno Pu Israelmi küdeo lize, Pu tho tsühi cross yono ta kiri te, sülize hari Pu mülüyi to; zi die Pu krühnyi bata.

⁴³Pu Jihova mülüyo erü, Pue Pu zühyi to lize, Pupo tsühi Pu küla süte, Kükrenamoli, Pue I Jihova nuo zo, zi die poyo kütina.

⁴⁴Süzomoli Pu sa gu pu küzü kürügonyi zori süsü bi die Pu kürhe ta.

⁴⁵Süsa bavüdo shorüh-o lüno vo thücio kütso cejü mütü zühbüh pü bata.

⁴⁶Süze bavüdo thücio müsühce Jisu se müto die sü, Eli, Eli, lama sabacthani, püco, A Jihova, A Jihova, No dithi die a kha va laha? zita.

⁴⁷Sücesü thüma süce küthakoe süo se küsü ce sü, Thüma hio Elijah ci ba te, zita.

⁴⁸Süze püko mi püh-e rükri ta vo die mha kümütsükhü püh kükhro zülü sühyi die püh vo Pu po kra no die püh Pu prü.

⁴⁹Eli kükrekoe sü, hilu note, Elijah ta vori die Pu küla sü to me lho sheli uko pe za balu khe, zita.

⁵⁰Süsa Jisu müyi müto la sü die Pu rüpü kha sü va.

⁵¹Mo sütü tülüsü Kürüsucelü khü lhapüh kümüzüo pu pilü lüno prü u küla kütso kro küna thi ta, cejü ri rüna ta, mo kütsüko ri prota.

⁵²Mo mhakhreko ri pata, sülize züh küta kümüsami kükro ri la süri ta.

⁵³Mo süko mhakhreko lüno pari die Pu rhühlasü kütasa rüna kümüsaolü vo die thüma kükro mhüngo thita,

⁵⁴Sücesü riwhumi kra mhü küzhoo mu pu züh tha die Jisu khü kübakoe; ceyice sü küta mo mha thi kütako ngo sü die, müprüh püh kümüre thi die sü, Hiohi Jihova nuo kütho zo, zita.

⁵⁵Sülize Galilee lüno Jisu sa müdzi die Pu shoyi thi küvori thünomi kropüh ri, rapeco ba die mhako pe ba.

⁵⁶Süko dolü Magdalin Mary, Jacob mo Joseph nyi zu Mary mo Zebedee nunyi zupü, süzi ba.

⁵⁷Süsa thüva vori küyice, Joseph, Arimathiami künemi püh, püri Jisu sadzi thi kütami püh vori.

⁵⁸Pu Pilate ce vo die Jisu mo sho, mo Pilate-e süo püh pu prüsü nosü.

⁵⁹Süsa Joseph thümoo pühyi die linen khü kümüsa pühlü küzüyi die;

⁶⁰Süh vo pu tho tsüpüh ho püh kümüta pühlü khrühva, sidie kütsü künyepüh kütu püh mhakhreo müka va die tata.

⁶¹Süze Magdaline Mary mo Mary kükrepü unyi mhakhreo mhüzülü bata.

⁶²Sülize mha küsühküti tüsoo sa nha Phariseeko mu pethiküzhoko vori de Pilate mhüzülü Künguyi.

⁶³Sidie pukoe sü, Küzhoo, mi küdoyo küti thüma hiohi Pu rhüh kübace, I zho süh nha rhühlasü tato, zi küti küpo ha rükra ba le;

⁶⁴Süna zho süh kütso mhakhreo khü münu bayi küto azah khasü te, Kükrenamoli, Pu sadziko tüzüh züh vori die Pu mo rügo püh tata die thümako ceno Pu küsa lüno rhühlasü te, zidie po ta küto kümüprüh na, sülize kümüda thülakoe thürako ceri süku tato, zita.

⁶⁵Pilate puko yisü, rikhu zühyi die neko tho vo thiyi küvethe khü vayite, zisü.

⁶⁶Süna puko ta vo mhakhreo yo thishühthi kütsüo yo soma vüva die rikhu kha püh khü mata.