Read Chokri Naga Matthew 28 Bible Online

Matthew 28 - Chokri Naga bible

Matthew 28

¹Süze kürülüzho tsüh ta die deobado thürao thita to küzüce, Magdaline Mary mo Mary kükrepü unyi mhakhreo pe tozu die vo.

²Mo Yhie sücesü ceyice sü mürüh shühta, kükrenamoli, Nyepoo shoyiooe tüyono kiri die kho mhakhre talüno kütsüo phü kütu va die süyo baba küta na.

³Pu züe ve püh tü küprüh küsü bita; mo pu khüne müga püh makrekro bita.

⁴Sülize, rikhukoe Pu kümüprüh thono puko sü künakütu püh küsami bi pu züta.

⁵Sücesü tüyo shoyioe thünonyi yisü, Nenyi müprüh hite, kükrenamoli nenyie mi Jisu gu küvao phuzü zo küti I se küba na.

⁶Pu hilü ba mote, Pu po küsü bi, die rhühla süte, pheri die Pu püh kümüzü thilü pete, zita.

⁷Süna ta mha vo die Pu küsa lüno rhühlasü küta püh Pu müthaküyikoce posüte, Mo Yhie! Pu neko züra sü Galileelü vo ta züho, neko sülüno Pu ngoyi to, ho, Yhie, I nekoce posü vaho zita.

⁸Süsa pünyie müprüh mo unyi nü püh kümüre thi die ta külülhü mhakhreo prüh vo müthaküyiko ce po sü kütona vota.

⁹Sidie unyi tavo küzüce, Yhie! Jisu vori unyi züh küsühyi die sü, Küveo thiyite, zita. Süce pünyi tavo Pu phe sho pühyi die Pu rüsu ta.

¹⁰Süsa Jisu unyi yisü, nenyi müprüh ta hi die ta vo a sazühneko po ta Galilee lü vo no die po süte. Puko sülüno a ngoyi to ho, zisü.

¹¹Süsa pünyi vo küzüce, Yhie! Rikhuko humi rüna nadeolü vori die mhathi kütako püh pethiküzhoko ce po sü va.

¹²Sidie ukoe mülhiko züh Künguyi die puko züh kürüthi die rüka kükro püh rikhuko prüva.

¹³Sidie puko yisü, nekoe Pu müthaküyiko tüzüh-o vori die hako züh küzülü Pu rügo püh tata ho, zi küti po va te, zita.

¹⁴Mo mhaceno mha hikohi se sü küzhoo nyilü lü ta lize hako tho münu die pu rüthi va to mo, sidie neko mürhüyi tato, zita.

¹⁵Süna puko rükao pühyi die, puko tarho küsü bi die pota, süna tha kütso Jewmi dolü zü hihi süh po küye tata.

¹⁶Süsa müthaküyi kürikünako ta sü Galileelü cejüthu pühyo hizü Jisu puko ce po püh küma yo vota.

¹⁷Sidie puko Pu ngo küyice prü Pu rüsa ta, eli humi külüdo ta.

¹⁸Mo Jisu pükoce vori die pükoce mhapo die sü, Tüyo rimo cejü ri küku mütü kha a prüve.

¹⁹Süna neko ta vo die thüma mütü mütha püh a sadzi thiyi, sülize Poo, Nuo mo Kümüsa Rüpü zalüno süko püh dzülu pu süyi te;

²⁰Sidie puko po I nekoce po küsüko thi mo zühyi kütona mütha süte. Sülize, Yhie! I künu künu kütso ri neko züh süh ta zoto süzi sü. Amen.