Read Chokri Naga Matthew 5 Bible Online

Matthew 5 - Chokri Naga bible

Matthew 5

¹Süze Pu thümakro-o ngo südie ta cejüthu-o khota, mo Pu kho ba küyice Pu müthaküyiko Pu ce khori.

²Sidie Pu Pu ta taga sü puko mütha küsü hibi.

³Rüpü celaco kütsakhuko yhevetho, kükrenamoli tüyo küde-e süko sü zo tina.

⁴Krayo kütiko yhevetho, kükrenamoli süko ulü luyi zoto tina.

⁵Ulü kümünüko yhevetho, kükrenamori süko cejüo püh uzü thi zoto tina.

⁶Kümatho dzüh phu küthüri kümüri thiyo kütiko yhevetho, kükrenamoli süko u küchukühi ngozoyi to tina.

⁷Phikümüzhe küneko yhevetho, kükrenamoli süko phikümüzhe ngo zoyi to tina.

⁸Thülü kümüsako yhevetho, kükrenamoli süko Jihova ngo zoto tina.

⁹Vetho küthiko yhevetho, kükrenamoli süko yisü Jihova nune lie ci zoto tina.

¹⁰Kümatho dzühvena thilinyi kütako yhevetho, kükrenamoli tüyo küde süko zü zo tina.

¹¹A na mipo neko mushüh, müthimünyi mo kücezü lünyi po püh neko mütsuyo lize neko yhevetho;

¹²Nenü mo nenü müzüriyite, kükrenamoli tüyo ne zhokhro ve shüh zoto tina, mi süsü bi thazü neko mhuzü sadzüküseko ri mushüh süri zo tina.

¹³Neko-e cejüo tsa-o zo; eli mütsa zori pu külhü müdi va lize dipüh püh süo va mülhü layi veta? Süo pu küve pühri di ta die mipo kügü püh zürhüh küdü küva zota to.

¹⁴Neko cejü küveo zo, cejüthu yo küba rüna mi pu ngomo tayi lhozo;

¹⁵Mi me müto püh mürhakhro mori metobüh bayo dü mayo, sülize celü kübako mütü va nve bayo.

¹⁶Süsü bi mipo ne mhatho küve ngo die tüyo küba neko Po Jihova za thikümüleyi küto na ne küve po vekrü zoyite.

¹⁷I thüzhoo mo sadzühküseko zü thi müdi va tozu die vori küti neko lüta hite, I süko thi müdi va mori thi tsüh sü to küvori zo.

¹⁸Süze I neko ce potü süto, Tü mo cejü dita kümothe mo mha hiko pühri thitsühyi kümothe, thüzhoo lü tü sü küve mori züco ne pühri mhapühceri di tayilho.

¹⁹Süna thüma kühopühri zü khaküsüko dolü künyithoo zori varhü die süh mi mütha yo lize tüyo küdelü pu yisü künyithoo thi tato. Eli, thüma kühopühri süko müdzi tso die süh mi müthayo lize tüyo küdelü pu yisü künyetho-o thito.

²⁰Süti-omoli, I neko ce po süto, neko kümatho po lüsiküseko mo Phariseeko kümatho yezüyi zo kümosa, neko mhapüh dori thi die tüyo küde lü lüküyi di zo.

²¹Thazü popüh kümüta; No mi dokhri sü, mo kühopühri küdokhrimi sheti-olü pu müjo va küto kümüprühlü ba küta neko ri se bate.

²²Süri I nekoce potü süto, thüma kühopühri mhacomhala küdilü pu sazüh züra yo pu nümo, mori pulü rüdayo lize pue shetilü pu müjo küva kümüprühlü bate. Mo thüma kühopühri pu sazühzürami yisü ‘raca’ puco mhama pühri di süziyo lize pue mülhiko kühulü pu kümüprühbate; süri thüma kühopühri ‘No kümüloo’ zidie po lize pu Gehenna mezalü pu kümüprüh bate.

²³Süna no mhapüh kürüsucelü vo küzüce n sazühzürami n yo künyo küba nsa lüyi lize.

²⁴N mha khapüh kürüsüba-o mhuzülü ma die tala vo n sazühzüra süo züh vetho thiva müra die la vori n rüsu thi mosü.

²⁵No n yo kenyo küzüo zühdie sholü küta lü küzühve mhayite; molize n yo künyo küzüo n tüpüh sheti küzhoo belü sü, mo küzho süo n tüpüh pu mhu küzhoo belü sü die küzho süo po n tüpüh küdücelü süva ri se lhomo.

²⁶I nce potü süto, no vo die presa daprane pühri shu tsova kümothe no sülüno pariyi lho ta zoto.

²⁷No rügü rüzü sü süzidie popüh küma neko seyi ta zoe;

²⁸Süri I neko ce po süto, thüma kühopühri thünomi püh müho die süpü peyo lize pu lüno süpü züh mhaküsü thiva zo.

²⁹Süsübi die mhaceno nmhü nzaco nthi müsü tayo lize n moyono süo khi kügü vate; kükrenamoli, nmo mütü kügü püh mezalü sü küva ceri nmoyo zatho püh müdi küva veku.

³⁰Mhaceno, nbe nzaco nthi müsü tayo lize, n yono süo da kügü vate; kükrenamoli nmo mütü püh mezalü kügü küva ceri nmoyo zatho püh müdi küva veku.

³¹Süze thüma kühopühri pu cemi khava to lize pukha küva lüsi püh pu prüte, zi küti po püh müzü.

³²Süri, I nekoce po süto, thüma kühopühri kürügükürüzü na zo kümo sa pu cemi khava lize pu püh kürügükürüzülü süva zo; mo kühopühri pu khaküva pü yi lize pu ri kürüzü thi tazo.

³³Süsari, no kücezü po rushühta mori; n Nyepo-oce n zü khaküsüko thitsühyite; zidie thazü küramiko celü popüh kümüta nekori seyita zo.

³⁴Eli, I nekoce po süto, mhapühri po rushüh hi; türi po rüshüh hi; süosü Jihova küdeba zo kütina:

³⁵Mori, cejüri po rushüh hi; kükrenamoli, süosü Jihova phekhra-o zo tina, mori Jerusalem ripo rushüh hi; süosü Küde küzhoo nade zo tina.

³⁶Mori, no npi ripo rushüh hi; kükrenamoli no thüpitha pri pühri thi mütü, mori thi müga ri yilho tina.

³⁷Süri n zü ‘I’ zilize ‘I’ ziyi mo ‘MO’ zilize ‘MO’ ziyi; modie sü zü ta lize süko küsüo celü pari tazo.

³⁸Mhü püh khü mhü püh, hu püh khü hu püh, zi püh kümüta neko ri se bata zo.

³⁹Eli, I nekoce po süto, thüma küsümi müsüh thihi; süzi kütao mori thüma kühopühri n bro n zaco vü lize, kükreco ri kürüh püh prüte.

⁴⁰Mo, thüma kühopühri n bola khiyi ta nyi die thüzhoolü künyo sü ta lize n khü ri rhüpüh prü vate.

⁴¹Süze thüma kühopühri n kümu thi die n züh maldo püh vo to ta lize, pu züh maldo küna ri vovate.

⁴²Mha khapüh nce shoyo kütimi prüte, mu nce lü thüpo mosü küvori-mi po müthu tala ta hite.

⁴³No n sühzanumi khrüyi mo n ngomumi phi mütsüyite; süzi püh küma neko seyi tazo;

⁴⁴Eli, I nekoce po süto, ne ngomumi khrüyi, mo galiphi püh ne rüphi kütimi prüyi, ne phimu yo kütimi na mha küve thiyi, n phimu die n müthimünyiyo kütimi na shoyite.

⁴⁵Sülize, nekoe tüyo küba neko Poo nuneko thiyi küto na; Kükrenamoli Pün ace mütho püh küsümi rimo küvemi ri vasüyo, mo tü mürü püh küzüthomi ri kümomi ri prü süyo tina.

⁴⁶Süzomoli, neko mi neko khrüyo kütiko libi khrüyo lize; neko dipüh zhokhro ba? Khazhonu kükhrümi ri süziyo zo mome?

⁴⁷Mo ne ne sazühzürako libi küluyo lize; ne dipüh thi rükri kuyi ta. Khazhanu kükhrümi ri süziyo zo mo me?

⁴⁸Süna, tüyo küba neko Po vezhosü küti bi die neko ri vezhosüyite.