Read Chokri Naga Matthew 6 Bible Online

Matthew 6 - Chokri Naga bible

Matthew 6

¹Thüma po ngo zo küto na ne mi mhuzülü phikümüzhethoko thizo mo küto lü türüyite; kümosa tüyo küba neko Poo celü ne zhokhro ngoyi lhozo.

²Süze ne mha müthu püh mi küprü ce küthürakütiko-e thüshüh ngoyi nyi die synagogue ceko lü mo shopüsholiko lü thiyo küti bi die sekhu zota hite. I nekoce po süto. Süko zo-e puko zhokhro ngoyi bate.

³Eli, nekoe mha khaküsüce ne be ne zaco-e khaküsüo ne veco po se hite.

⁴Sidie no mhaküsüo kümükhrühlü khasü te, süze kümükhrüh mütü ngoyo küti ne Po-e mi mhüngolü ne zhokhro thipüh ne prüto tina.

⁵Süze no küsho küthice küthüra kütiko bi ta hite: Kükrenamoli, sükoe mi po ngo küto na synagogkolü mo shopü shiceko tha die sho küti puko nüyo, eli, I nekoce po süto, süko zo-e u zhokhro ngoyi bate.

⁶Süri, noe sho kütice n celüsühku lü die n cekha khayi, die kümükhrühlü küba n Po ce shote. Süze kümükhrüh mütü ngoyo küti n Po putho mi mhüngolü n zhokhro thipüh n prüto.

⁷Eli, no zo-e sho kütice mülükümomi bi die uco küdi küpo sapo lala hi, kükrenamoli, puko-e zü kükro küpo na puko küsho rünyiyi küto lüyo tina.

⁸Süna nekoe süko bi ta hite; kükrenamoli, neko Po-e ne küsho mhuzü ne tsakhuko se batayo tina.

⁹Süze nekoe sho kütice hibi die shoyiyi te; tüyo küba ha Po N zapo kümüsao thiyite

¹⁰N küde thi vorite Tüyo bi cejü hiri püh n müdo thiyite.

¹¹Tha tha va kha ha prüte

¹²Ha mi küjo va küsü bi, ha küjo ri va ha prüte

¹³Ha züh müdoküphilü vo hite, eli küsüo belü ha küla süte. Kükrenamoli, Küde, kuku mo Zapozale sü tülhülü nzüzo tina.

¹⁴Süze no mi küjo vasü mi prüyo lize tüyo küba ne Pori ne küjo va sü ne prüto.

¹⁵Süri ne mi küjo vapüh mi prü mu lize; tüyo küba ne Pori ne küjo va süyi lho.

¹⁶Sülibizomoli, neko kümvo tice küthürakütiko bi die ne thusü sa tatahite, süko mi po ngo küto na puko zü thi mükre pu tayo. I neko ce po süto; süko zo-e puko zhokhro ngo bate.

¹⁷Eli, no kümvo kütice tier püh n pi künhüyi mo n zü chu vate.

¹⁸Sidie n kümvo püh thüma po ngo zota moli kümükhrühlü bayo küti n Po po ngote; süzi lize mha kümükhrühko ngoyo küti n Po tho mhulhelü n zhokhro thi n prüto.

¹⁹Silhü mu gitsü poti vayo küti mo kürügomi po rhelü die rügoyi tayo küti cejülü küngu hite.

²⁰Süziküti-omoli, silhü mori gitsü ri ti müdi vayi külho mo kürügomi ri rhelü rügo yi külho tüyo neko cene künguyi te.

²¹Kükrenamoli, n cene kübara nlü ri vo sülü ba tayo tina.

²²Umo meto sü u mhü zo; mhaceno n mhü ve ba lize n mo ri vekrü pü bato.

²³Eli, n mhü sü ta lize, n mo mütü ri zühbüh ta zoto. Süna n yo küba küveo züh ta lize, süsa küdithüdüpüh züh ta ta?

²⁴Mi cetami pühri nyepo küna ceta thi küduyi ndi; süzi lize pu mipüh mütsü mo kükreo ngo pü nü tato; mori pu mipüh-o va ta die kükreo the tato. Ne Jihova mo züthokümo cene unyi ceta thi küduyi ndi zo.

²⁵Süna I nekoce po süto, ne külhü hio na dipüh ti mori dipüh kraba teshi küti; mori ne mo na dipüh bemüne ba teshi küti rüleko lü ne lü künyi thi hite; U kürhüro-e kütikükra ceri mo u mo-e khümüne ceri veku mo me?

²⁶Tüyo rako pe süte; süko prühyo mo, mo rühriyo mo; mori süh vo ulhacelü künguri yo mo, süzori tüyo küba neko Po süko va thori thisü bayo. Neko-e süko ceri veku mo me?

²⁷Neko sopühno mhalü shüh küsü na pu külhüzho bothopüh the ri thi müshoyi ve ta?

²⁸Süze ne dipüh na khüne rüleko lü zo la? Neko yilü thürüba puko dibi die lhü bayo sheli lü süte, süko mhathi mhayi kümüzhe yo mo, süko türhi türha thiyo mo.

²⁹Süzori, I nekoce po süto, Solomon zapozale thishü zori, süko mipüh düri kürütso mo.

³⁰Süna Jihova-e nha tha lhüba die südo papüh mephülü müto va kütoko rütso thori thi süyo lize, neko kümülü kütsako, Pu süko ceri neko rütso thiku sü mo to me?

³¹Süna neko dipüh ti mo kra ba teshi, mori dipüh be müne ba teshi küti rüleko lü die nelü künyi thiba zohite.

³²Mülükümoko-e mha hikohi rüle libi lü die phu bayo eli tüyo küba neko Po-e neko tsakhu hikohi mütü se bayo kütina.

³³Süri neko Pu küde küthi mo Pu kümatho phu mürayite, sülize mha hikohi mütü püh neko sa süto.

³⁴Süna neko sühdo rüle lü neko lü kümüzhe hite. Kükrenamoli, tüsonha putho pu kürüh batso tina.