Read Chokri Naga Matthew 7 Bible Online

Matthew 7 - Chokri Naga bible

Matthew 7

¹Neko mi müjo hi; sülize miri ne müjo talho;

²Kükrenamoli, ne-e süh mi müjo küsüo miri süo süh ne müjo zoto tina.

³Sülize, no dipüh bi die ntho n mhülü sühthü kübao lü mozo die n sazüh-o mhülü sühco kübao pe yo la?

⁴Mori, no dipüh bi die ntho n mhülü sühthü kübao lü mozo die n sazüh-o yisü, apo n mhülü sühco-o ka vate, sidie poyo la?

⁵No küthüra küti-o, ntho n mhülü sühthü-o khiva mürate, sülize no nsazüh-o mhülü sühco-o ngo müle mülu die khi vato.

⁶Mhakümüsa khapüh tüshi prü hite; mori ti püma kürühpü kügü püh thüvo mhuzülü sü hite, süko u phe püh süko küdu mo rürüh pra ukü püh ne rhe ri zoto küti na.

⁷Shote, süze khapüh ne prüto, phute, süze ne ngoyito; cekha küdü züzo te, süze khrisü ne prüto.

⁸Süze thüma kühopühri shoyo kütimi ngoyi yo, mo phuyo kütimi ngoyi yo; cekha küdüyo kütimi ri mi khrisü sümi prüyo.

⁹Süze, ne dolü sopühno unu-e tsükhrüda sho lize kütsü püh prüyo la?

¹⁰Mori, pu khu sho lize tünyhi khi püh prüyo la?

¹¹Ne küsümi thori mhaküve püh nenu nene küprü do seyo lize tüyo küba neko Po-e mhaküve dithüdüpüh püh mi Puce shoyo kütiko prü süta?

¹²Süna mi neyo mha dipüh thisü lize nenü sheli neri süsü bi die thipüh miyo süte, kükrenamoli, thüzhoo mo sadzühküseko zübo hihi zo tina.

¹³Neko kharü kümürüho züh lüyi te, kükrenamoli, mi züh kükalü küvo khrü-o müyo mo sho süo müthi, mo thüma kükro sho süo züh lü tayo.

¹⁴Süri, mizüh kürhüh lü küvo kharüo mürüh mo pu shori kürühbüh, mo süo ngo küyi thüma tsa.

¹⁵Kücezü sadzühküseko yo neko münuyi te, süko tüko khüne süh die neko ce vori yo; eli puko lü lükhrono tüküti saceko zo.

¹⁶Neko puko se yono puko se yito; mi tsahubo yono khubüh se rayi yo me? Mori hushihu bo yono shedüse rayi yo me?

¹⁷Sühbo küve kühopühri use küve jiyiyo; eli sühbo küsü khü use küsü ji tayo.

¹⁸Sühbo küve püh-e use küsü ji ta ndi, mori sühbo küsü püh-e use küve ji ta yomo.

¹⁹Sühbo kühopühri use küve jiyi kümo khü ve va die püh melü kügü vayo.

²⁰Küthozo, neko use yono puko seyi to.

²¹Thüma A yisü, Nyepoo, Nyepoo, ziyoti mütü ri tüyo küdebalü lütso tayi lho; eli, tüyo küba Apoo müdoko thiyo küti-o zoto.

²²Sünhasü thüma kükro A yisü, Nyepoo, Nyepoo ha nza süh sadzühküse po mo me? Ha N za süh thürüküsü hu mome? Mo ha N zalü no mhatho kuku küzho kükro ri thi sü mome? süzi to.

²³Eli, I puce po die, I neko se mo ho, neko mha küsü küthiko neko ta a thürütate zita to.

²⁴Süna thüma kühopüri azü hiko rünyiyi die thi mo züh küyimi püh udo küveo kütsü tsüroyo pu ce thi küyi züh kümüde süto.

²⁵Sücesü türü shüh vori die züde süri, mo tükhra khrade vori ce süo hü, süri ce süo rütu prü mota, kükrenamoli, ce süo kütsü tsüro yono pu me shühyi kütana.

²⁶Eli thüma kühopühri azü hiko rünyiyi yo süri thi mo zühyi yomo lize süo püh thüma udo di die thusünyolü pu ce thi küyi züh kümüde süto.

²⁷Sücesü türü sü mo zü de süri, mo tükhra vori die ce süo hü, sücesü ce süo rütu müsü shühta.

²⁸Süsa Jisu zü hiko pothü küsüsa, thümako Pu kümütha zü na puko malhü thita.

²⁹Kükrenamoli, Pu lüsiküseko bi mo die Pu kuku ne shüh die puko mütha küta na.