Read Chokri Naga Matthew 8 Bible Online

Matthew 8 - Chokri Naga bible

Matthew 8

¹Süsa Jisu cejüthu yono kiri küyice thüma kro küzho shüh püh Pusa müdzi vori ta.

²Mo, Yhie! Lepra küthimi püh Puce vori Pu rüsu die sü, Nyepoo no n müdo lize a thi kümüsa vayi vezo zita.

³Süce Jisu Pu be yho püh pu nyi die sü, a müdo ve, no müsayi tate; zisü. Süzi sü mütha pu lepra küthi-o münü mhata.

⁴Süsa Jisu puce po die, no mipüh ceri po hite, sidie tavo ntho n khapüh Pethiküzho-o mhüngo thisü te, sidie mi po seyi küto na Moses-e po püh kümüzü rütho-o thisüte, zita.

⁵Süsa Jisu Capernaum lü lüri küyice, riwhümi kra mhu küzhomi püh vori Puce sho die:

⁶Nyepoo, a cetami püh lasa ta die kümüzhe shüh die celü bayo le, zisü.

⁷Jisu puce; I vori die pu thi küsührho sü to, zisü.

⁸Riwhimi kra mhu küzho süo sü; Nyepoo, I n po a cekhrikhro vori no küto sümo ri zo; eli no züco pühri posü zori a cetao sührho ta zoto, zita.

⁹Kükrenamoli, I ri küzhomi khrikhro ta kütimi zo; a khro ri riwhimi ba, mo I hio ce, vote, zi lize puri vo tayo, kükremi pühce, vorite; zisü lize puri voriyo; mo a cetami yisü; hihi thi süte; zi lize puri thi süyo; zita.

¹⁰Jisu sü se küsüce, Pu malhü thi die Pu samüdzi kütako yisü, I nekoce potü süto, I Isrealmi dolü u kümülü hidü zho küti ngo mozo.

¹¹Süze I neko ce po süto, nathoco mo nakroco thüma kükro vori die tüyo küdelü no Abraham, Isaac mo James neko züh ba tato.

¹²Süri cejü küdenuko-e kügü püh shozu küzühlü sü vato, sülü kra mo uhu thüzhe pü ba tato.

¹³Süsa Jisu kra mhu küzhoo yisü, n sholü votate, mo no mülü küyi bi die süo po n yo tsüh küyio thiyite. Sidie po küsü tütü lü pu cetao sührho bata.

¹⁴Süsa Jisu Peter celü vori küyice, Peter cemi ne zu rüce zü die ngoyi,

¹⁵Süna Jisu süpü be nyi sü mo rüce-o lata; sidie süpü sü die puko shoyi thi bata.

¹⁶Süsa thüva vori küyice. Thümako küsü rüpü po u kübü küta kükro züh Puce vori; mo Pu zü püh lüno rüpü süko hu va; mo küthi künyiko thi küsührho sü.

¹⁷Sidie Isaiah sadzühküseo po thazü; Putho u küsü kümüzako mo u küthi künyiko khi püyi te; süzi die po püh kümüzüo thi tsühyi.

¹⁸Süsa Jisu thüma krode püh Pu hupü küba ngo küsüce, puko potasü lishico ku tano die Pu zü khasü.

¹⁹Sücesü lüsiküsethomi püh Puce vori die Pu yisü, Kümütha-o no kühopühra vo sheri I nsa müdzi tole, zisü.

²⁰Jisu pu yisü, müsührüko ri uce ne, mo tüyo rako ri u kro ne, eli thümanuo Pu pi kha thothü küyi thiri di; zisü.

²¹Müthaküyimi kükremi püh ri Puce, Nyepoo apo vo apo khrüh va mürate; zita.

²²Eli, Jisu pu yisü, a sa müdziyite, mo küsako po utho küsako khrüh vate, zita.

²³Süsa Pu püzu lü küyice Pu müthaküyiko pu sa müdzita.

²⁴Sücesü Yhie züküzholü tükhra kümüre thi süri, mo tükhra küyeri küta na züküzho rükhü tho püzu-o whüyita, süri Pu züh zü zo.

²⁵Sücesü müthaküyiko Puce vori Pu küsüh die sü, Nyepoo hako küla süte, hako kata tozü te; zita.

²⁶Süsa Pu süko yisü, Yhie! Neko kümülü kütsako, neko dipüh na müprüh ri zota-a? Sidie pu süri die tükhra mo züküzho rükhü-o kükha va, süsa rütü züh ta.

²⁷Eli thümako u malhü thi die sü, thüma hihi dipüh bi küti mapüh ta shehe! Tükhra mo züküzhotho ri Pu khüzüh küta hi, zita.

²⁸Süsa Pu süo prüsü lishico Gergesenesmi cejülü tso küyice, küsü rüpü po u kübü pü kütami küna mhakhre lüno pari Pu züh küsühyi, unyi zhosü püh kümüre thi die mipüh ripo ta sü sholü vori yi sü bata.

²⁹Sücesü Yhie unyi se die sü; Jihova nuo Jisu; No hanyi züh dipüh thi ta? No putü tso kümolü ha müthi münyi to vori yo me? zita.

³⁰Sücesü thüvo kro künye püh vo rapeco mha ngüti ta rü;

³¹Thürü küsü rüpüko Puce u müzhemülo die sü; “No ha hu sü lize ha hu püh thüvo kroo lü süte,” zita.

³²Süsa Pu süko yisü, ye tate, zisü, Süna puko ta pari die tasü thüvo kroo dolü lüta; sücesü, Yhie, thüvo kro süo ta rüthü sü dzüküzho shice thikha lü prü die dzülü mülhü khri tso va.

³³Sücesü süko kükhüko ta nadelü vo die mha dipüh püh thita sheri mo küsü rüpü po u kübü pü küta yo dipüh thita sheri küti posü.

³⁴Süsa Yhie! Nadelü thüma mütü Jisu züh küsüh tozu die prarita; Süsa puko pungo küyice Pupo ta puko rüna prühta no die Puce shota.