Read Chokri Naga MARK 11 Bible Online

MARK 11 - Chokri Naga bible

MARK 11

¹Sülize uko tasü Jerusalem münoce Bethphage mu Bethani ce Olive cejütu co vori küyi Pu Pu sadzimi mi küna kütsüh die unyi yisü;

²Nenyi tasü nenyi rüpeco rünalü hi lüte, mu nenyi lü mütha hizü müpühri puyo ku she kümo Gadane püh ba die ngoyi toho; nenyi süo phrühyi die züh vorite, zisü.

³Mu humi nenyi kütso die, Dipüh la hizi zü la? Zita, Nyepooe hihi süh mosu züle; zivate. Süzi sü mütha pue süo kütsüh mha püh hice sü va toho; zita.

⁴Süsa punyi ta vo tice shoprolüno mi cetazu Gadaneo khü püh ma die ngoyi, sidie unyi süo phrühyi.

⁵Sücesü mi shice küthako humie sü unyi yisü, gadaneo phrüh püh dito zü la? Zita.

⁶Mu unyie Jisu punyi ce po küsu bi die posü. Süsa mi unyi khamo ta.

⁷Sidie unyi gadaneo züh die Jisu ce vori, mu uko khü püh süo yo khrasu die pupo süyo bayi.

⁸Sücesü thümako kükro u khüko püh sholü lha, kükrekoe sühko yono sühcoko rhopüh shode khra sü.

⁹Sidie usa uzü küta mütü se die sü, Hosana! Nyepoo za süh vori küzüo.

¹⁰Yhevethoo! Nyepoo za süh vori küzü Upoo David küdebao Yhevetho! Hosana kürükrüthoo.

¹¹Sidie Pu Jerusalem lü kürüsucelü lü whi die mha mütü pe sü, mu putü münu küta la Pu mi kürikünako züh die Bethanilü prata.

¹²Sülize süsanha puko Bethani lüno ta pra küzüce Pu mürita.

¹³Süce Pu rapeco no shedübo püh unyiko ba die ngosü, mu Pu süyo mhapühri ngoyi totho zi die tavo, mu Puta süce voritice unyi libi sa mhapühri ngoyi mota, kükrelamori sütüce sü shedüse küji tü kümo la.

¹⁴Mu Jisu süo yisü, Tsüsayogwino mipühri po n yono nse rati lho; ziva. Mu müthaküyiko zü süo se.

¹⁵Süze puko ta Jerusalem lü vori. Mu Jisu kürüsücelü lü die mi kürüsucelü mha zhüh mu mha khri kübako püh kügü süta. Süze Pue mi rüka küle küba miz mu thürüvünu zhüh kübako phula va.

¹⁶Mu Pue mipühri po mhabüh püh die kürüsuce püthü muta.

¹⁷Sülize Pu süko mütha die, “Ace püh thüma shuyie mütü la küshoce thito;” zidie thopüh müta mo me? Eli nekoe süo yisü kürügomi ce thive; zita.

¹⁸Mu lüsiküseko mu sekrükoe zü süo se, sidie pukoe Pu müka va küto do phuta. Kükrelamori, pukoe müprüh küti thümakoe Pu kümütha züko la u malhü thi ba küta la.

¹⁹Süsa thüva vori mu Pu nade süolüno taprata.

²⁰Sülize püko küshwüh-o ta vo küzüce shedüboo u melü kütso sosa zü küta ngoyi.

²¹Süla Peter pusalüyi die sü, kümüthao, liyhie, no rüshu küva shedübo tsü sosa züta; zisü.

²²Süla Jisu puko yisü, Neko Poo celü kümülü neyite.

²³Kükrelamori, I nekoce potü süto, Thüma kühopühri cejütu hio yisü, No ta rude sü dzükütülü lü tate, zisü, sülize pu lü külüdo mozo mu pu dipüh po sü sheli süo thiyi zo küto mülüzo lize, süo thiyi tato.

²⁴Nekoe mhakühopühri shoti mütülü ngoyi zo küto mülütü zoyi lize süko thi püh neko prüto.

²⁵Sülize sho tozu die tha küyice, noe humi mütsu ba küti ba lize süo küjo vava to, sülize tüyo küba n Po ri n kükriko va püh n prüto.

²⁶Süri neko mi küjo va mi prü mu lize tüyo küba neko po ri ne kükriko va prüyi lho, zita.

²⁷Süsa puko tala Jerusalem voriyi. Mu puta sü kürüsucelü lü küzüce, sekrüko mu lüsiküseko mu pethiko puce vori.

²⁸Sidie pukoe sü Pu yisü, No dipüh küku süh die mha hikohi thiyo la? Mu sopüh-e mha hikohi thiyi küve küku kha n prü süa? zita.

²⁹Jisu puko zü küla die, I ri mhapüh neko kütso süto; mu neko a khü küla süte, sülize I ri dipüh küku süh die mha hikohi thiyo sheli küti nekoce po süto;

³⁰John Dzüluo hi tüyon kiri me thüma celün vori la? Po süte; zisü.

³¹Süsa puko tho kümüli die sü, Ukoe pu tüyono kiri; zisü to mu Pu uko yisü sülize nekoe dipühla pu mülüyi muta? Zitato.

³²Eli ukoe sü, Thüma celün vori zo, zisü to mu pukoe thüma kroo müprüh. Kükrelamori, mi mütü John yisü sadzühküsemi püh zo liyo tila.

³³Ukoe Jisu fü küla de poti hako poyi sute Jisu pola küsü I ri dipü küku pü mha hiko thiyo sheri poho sita