Read Chokri Naga MARK 3 Bible Online

MARK 3 - Chokri Naga bible

MARK 3

¹Süsa Jisu Synagoguelü lalü, mu sülü besa kütami pühba.

²Süna pukoe Pu müjo kütola Pu kürülüzho nha süo thi küsührho sü tome lhoshi küti riba.

³Süce Jisu ube sakütao yisü, No midolüno süri te zisü.

⁴Sidie Pu süko yisü, kürülüzho nha mhaküve küthi thüzhotome mhaküsü küthi ta? Kürhühro küla küti me? Dokhri küti ta? Zisü. Eli puko kümükrethi ta.

⁵Süze puko lü kürüh lü püh Pu lüsü mu Pulü rüda die rürüh pra lico hico pedie puko pe die, thümao yisü n be sho süte, zisü mu pu shosü, sidie pube süo thi nve püh kükreco bi va.

⁶Süsa Phariseeko ceta vo mütha Herodianmiko züh die dibi die Pu müka va to shi küti rhüta.

⁷Süri Jisu Pu müthaküyiko züh die ta sü dzüdeco vota, süze Galilee lüno.

⁸Thüma krode püh pusa müdzita, süzomoli Judea lü mu Jerusalem lü, mu Idumaea lüno mu Jordan cu küvo cori mu Tyre mu Sidon kümütu mütü lü makroe Pu dipüh thi sü shi küti se sü die ta Puce vori.

⁹Süze Pu müthaküyiko po püzu püh khapüh Pu müno süma nodie posü, kükrelamori makroo po Pu gü zo vo kütila.

¹⁰Kükrelamori, Puthüma kükro thi küsührho küsü la, u küthi künyi ne kütako pu nyi sü tezü die Pu whü züta.

¹¹Süze müsakümo rüpüko pu ngo küsüsa rütu prü Pu mhuzülü zü die se zodie sü, No Jihova nuo, zita.

¹²Mo pu süko po pu popüh mi muse hino die puko khabüh mu küthi va.

¹³Süsa puta cejüthuyo kho Pu müdomiko ci sü, mu puko ri Puce vori.

¹⁴Sülize pu mi kürikünako küda püh süko po Puzüh ba kütola, mu kütsüh züyi küve zhopo thi sü kütola.

¹⁵Mu küthi künyiko thi küsührhoyi küto kuku bayi küto, mu küsü rüpüko huyi küto la.

¹⁶Süko Simon, puza thopüh Peter thi kütao.

¹⁷Mu Zebedee nu James sazüh-o John; Pu süni zatho püh Boanerges, puco tüküsüh nunyi; thisü.

¹⁸Süze Andrew mu Philip. Mu Bartholomew, mu Matthew, mu Thoma, mu Alfia nu James, mu Thaddaeus, mu Canaanmi Simon;

¹⁹Süsa Pu tüpü mi belü sü küva Iscariot Judas risa.

²⁰Süsa Pu ce pühlü vori küyice thüma kro künye püh la vorita, sidie puko po mhari tiyi süta.

²¹Süze pu züh kütako sü se sü die ta vo Pu tüyi tozu ta, kükrelamori, pukoe sü pu mutse tha mote zi die lü kütala.

²²Mu Jerusalem lün kükiri lüsiküsekoe sü, Pu Belzebub züh bate, Pue küsü kükuko züh die küsuko huyo, zita.

²³Süze pu süko cipün Pu müno süyi die; küzüve die puko ce po die sü, Dibi die.

²⁴Satan Satan huyi veta?

²⁵Mhaceno küde püh-e putho pu mütsu ta lize, süeprote, mu pu küde thayi kündi tato.

²⁶Mu mhaceno Satan ri pu tho pu mütsu süri Ta lize die küpüphro ta lize pu küde thayi kündi tato.

²⁷Mipühri kükumi püh celü lü die pu mhako mükayi yomo, pu süo tü püh pha va müra zo kümosa, süzi küva züh pu mhako mükayi küve zo.

²⁸I neko ce potü süto, thüma nuko küphoma lünyiko mu puko Jihova kümütsu zü küpo thüthako mütü vapüh puko prüto.

²⁹Süri thüma kühopühri Kümüsa Rüpü thayo lize pu külhüthe küjo va küprü ba samo, eli, lhülü pu müjo va küto kümüprüh lü bate.

³⁰Süosü pukoe; Pu müsakümo rüpü züh ta, zi küta lazo.

³¹Sülize Pu sazühneko mu Pu zu puko vori ceta tha die Pu küyi ba.

³²Mu thüma kroo ba Pu mütu pü kübakoe pu yisü, Yhie Nzu mu n sazühnekoe ceta thadie n phuzü le zisü.

³³Pu süko zü küla die, sopüh-e azu, mu sopüh-e a sazühzürako la?

³⁴Süsa Pue Pu mütu pü die ba kübako pe die sü;

³⁵Yhie; azu mu a sazühzürako sü; thüma kühopühri Jihova müdoko thiyo kütio sü a sazüh-o, mu alipü, mu azu zo, zita.