Read Chokri Naga MARK 5 Bible Online

MARK 5 - Chokri Naga bible

MARK 5

¹Süsa puko tasü dzü kütü shico Gadarenes mi rünalü voyi.

²Sidie Pu püzu lüno ta prari mütha küsürüpü po u kübü pü kütami püh mhakhreko lüno ta prari Pu züh küsüh.

³Thüma hio mhakhreko püh pu kübathi thiyo; mu mhapühri püh pu phayi yomo, thügiro zori phayi yomo.

⁴Kükrelamori, mi tsükünu bekharo mu thügiroko püh pu phayo, süzori pu thügiroko püthü küna thiva yo, mu bekharoko cethü kügü vayo, sidie mipühri pu kükha pü bayi kündi tata.

⁵Sidie tüso tüzüh cejüthuko yo mu mhakhreko lüno se mu kütsüko püh putho pu jo zi ba zota.

⁶Mu pu rapeco no Jisu ngo sü die ta vori die tüprü Pu rüsuta.

⁷Sidie pu se müto zodie, Jisu kürükrüthoo Poo nuo no azüh dipüh thita? I Poo zalü rushüh zo die shoyo, a müthi tahi zote! Zita.

⁸Kükrelamori, Pu süo yisü, küsü rüpü no pulüno ta prari tate, zi kütala.

⁹Mu Pu süo Yisü, nza sopüh la? Zidie kütso sü, mu pu küla die Azae Legion, kükrelamori, hako mi kükro ta tila, zita.

¹⁰Süze Pu po pu kütsüh pü rüna süo mücu va mo kütola shobü ta.

¹¹Sücesü thüvo krode püh-e sü kümünoce mha ngüti ta mu küsürüpüko mütü.

¹²Pu ce shodie, hako kütsüh püh thüvoko ce süte, hako po süko lülüta küto la, zita.

¹³Süsa Jisu puko po vota no sü, süsa müsakümo rüpüko ta prari die tasü thüvoko lülüta; süze thüvo kro nyekünako ta kühu dzükütülü lü die mülhü khriva.

¹⁴Sülize, süko kükhükoe ta vo nadekolü mu yi kolü mice rükhrü sü, sidie thümakoe dipühthi ta shi küti pe tozu vori.

¹⁵Süze puko Jisu ce vori die thürüküsü puco Legion po kübü züh ta kütao khüne be münemu u mülü tsühyi die ba küta ngoyi die müprüh shuta.

¹⁶Süsa thürüküsü po u kübü küvorio yo mu thüvoko yo dipüh thita sheli küti küngokoe mha mütü püh mice posü.

¹⁷Süsa pukoe Pupo uko rünalüno tata no die uko müzhe mülo ta.

¹⁸Sidie Pu tata tozu die lü dpüzulü ba küyice thürüküsü po u kübü kütaoe Pupo pu züh tata no die shota.

¹⁹Süri Jisu mu ta die pu yisü, no ta n celü mu n thümako ce vo die Nyepooe nla dipüh thi sushi küti püh po süte, zita.

²⁰Süsa pu ta sü Dekapoli lü vo die Nyepoo pula dipüh thi sü shi küti po püh mice za sü. Mu mi mütü u malhü thita.

²¹Süze Pu püzu lüno ta lishico ku la küyice, Pu dzükütü poce ba, mu thüma kroo Pu ce vori künguyi.

²²Sücesü, Yhie! Synagoguelü küzhomi püh puza Jaira li küti püh ta vori die pungo küyice tü Pu phelü prü Pu ce sho die;

²³A nupü sata tozü te, pupo ve mu sührholayi küto la no vori die n be yhio püh puyo sü zhie, zita.

²⁴Mu Pu süo züh vota, süze thüma krode püh Pu whü tata.

²⁵Sülize thünomi püh tse küriküna thüza krüh die kümüzheri ta küta püh daru küsemi kükrori po pu pe die.

²⁶Sükola pu mha küne küdi mvo va zori ve küyio moli süku küta püh.

²⁷Jisu vori küzü se sü die makro dolü vori die Jisu saco vo Pu khü nyisü.

²⁸Kükrelamori, pue pu lüno, I Pu khü zori nyi sü lize sührhoyi tato, zi die lü kütala.

²⁹Mu nyisü mütha puyo thüza krü kütao so mhata, sidie puyo küthi süo münüyi küta seyita.

³⁰Süzita mütha Jisu Puyo no kuku pra küta seyi die rügü pra thümako pedie sü, sopühn a khü nyi sü laha? Zita.

³¹Mu müthaküyiko Pu yisü, thüma kroko n whü pü küta ngo zori, No sopühn anyi sü la zi tome? Zita.

³²Mu Pue Pu nyi küsüpü ngo sü kütola rügü lico hico pe ta.

³³Sücesü, thünopüo pütho puyo dipüh bi ta sü ti seyi die mu müprüh rüsü zodie ta vori tü Pu mhuzülü prü die pu jüh mütü püh Pu ce posü.

³⁴Süsa Pu süpü yisü, A nupü, n kümülü tho nthi münü süho, nnü die tavo tate, mu n küthi po münü tsüh ta küyio thite; zisü.

³⁵Pu züpo kübalü thüma hu Synagogue küzhoo celüno vori die sü, n nupü sate; dipühla kümüthao po kümüzhe la züta, zita.

³⁶Süri. Jisu süo sesü mütha synagoglü küzhoo yisü, müprüh tahi, no mülütü zoyite, zita.

³⁷Süze Pu Peter, James, mu James sazüh-o John neko zo kümosa mi kükre pühri züh sa muta.

³⁸Sidie puko synagoglü küzhoo celü vori küyice mi kra mu thükri thipüh münyomünyi pü küzü ngoyita.

³⁹Mu Pu celü lüri die puko yisü, neko dipüh la kra mu thükri thi hi bata? Unupü sata mo; eli züh küzü zo. zita.

⁴⁰Süri süko Pu krünyita, Eli Pu mütüko po ceta vota die u nupü ne po mu pu zu, süze Pu züh kütako züh die tasü u nupü küzü thilü vota.

⁴¹Sidie Pu unupü be ceyi die puce, “Talitha cumi” puco, ngane I nce posüyo ho, ta süri te, zisü.

⁴²Süzi sü mütha süpü süri die tayita, kükrelamori süpü tse küriküna kütala.

⁴³Sücesü puko u malhü thi shühta, mu Pu mipühri po hihi se hizo no die posü, süsa Pu süko po lüva püh süpü po tiyi no die po sü.