Read Chokri Naga LUKE 14 Bible Online

LUKE 14 - Chokri Naga bible

LUKE 14

¹Vapü Jisu Pharisee krüta mipü celü mhati tole tavozü Sabbath nha, miko püpe türü püba.

²Pü mhüjülü kethi (dropsy) mipü süceba.

³Jisu thezho keseko mu Phariseemiko ketso de poti, Sabbath nha mithi kesürho kesü thezho me m a?

⁴Uko kemekre bata. Süla Jisu püthi kesürho süde pü ketsü metava.

⁵Jisu ukoce poti, mhace mipü pünunepü mori püthopü retu jüfülü lüta lize, süo sü Sabbath tüsozho nha ta zori neko rekri süo süphra prari ta mo tome?

⁶Uko püfü kelasü mota.

⁷Misothi kebako therho bayo keda de tavo ba ketango kesüce Jisu jüvepü posü.

⁸No nolü hülü kevola mi ncü kesüce, tavo theba kerekrülü bata hite, kekrelamori mi kekre nce meleku timi n niepoo cüpü meta sheri no semo tila.

⁹N nieposo-o tavori de nce, n thethi (nba) kha putsü vate sizilizo no ta kerenulü kita ketola m u no renümo tato.

¹⁰Vele ncü kesüce, no tavo theba kerenutho lü ba merayite, n nieposo-o ta nce vori de poti, azü-o, no kerekrülü kute, sizilize nzü keba thüma metüko mhüjülü no therho ngo yito.

¹¹Kekrelamori somi utho uthi kerekrü pü tayo sheri thi renu vato, vele somi uthi kerenu pü tayo sheri thi kerekrü sü ketola.

¹²Mi cü kesü niepoo cepoti, no mipo ncelü mhati tole cü kesüce, n khrethomiko, mori nsajü jürako, mori ncekromi, mori mha kenemiko cü hite; uko nposhu vato. Mori n cü sala vato.

¹³Vele no mizüvo hi tice, kedimi, pheyhomi kerengami, mhücemi cü süte.

¹⁴No thejo ngoyito, kekrelamori uko npo shu salayiho tila, mu no kemethako rhüla kesüce nshu sala süto.

¹⁵Mha ketilü resoko mipü süo sekesüce, puce poti, “kehopüri Jihova celü mhati ketomisü thejo kepütho.”

¹⁶Süsa Jisu puce poti, thümapü mi kekro cüpü pü celü mhati nosü,

¹⁷Mhati keto tülü pü thekümi ketsüpü cüpü kemetako ce posü, tavorite mha metü kerede pü mezü te.

¹⁸Vele uko metü thiyi sutale sizi tsota, thüma kerao poti, I cejüpü khripü meta, mu I tavo süo pemo sute, akejo vasüte.

¹⁹Kekremipü poti, I metho mha kethipü püngu khripü meta, I süko züvo mhathi to bate, I vori hote, a kejo va süte.

²⁰Kekremipü I ceyo yite tsüdo cehi, I süla vori yi hote.

²¹Süla choyi kethio ta sala vori süko pü pü niepoo ce posü siri niepoo pünü moshuta, de pü cetao ce poti, rekri tavo chopü kolü chotsu kolü metü rünalü mhakedi miko, lahemiko, mhücemiko, mu pheyhomiko zü vori te.

²²Miceta-o, poti, kezhoo n kepoko thitso süte, siri thethi kekro meshopü balu,

²³Süsa niepoo poti, ta cho metülü vode thümako kemuthi zü vori te, sizide acelü chuyi ketola.

²⁴Kekrelamori I neko ce potü süto, cüpü kemezüko mipüri acelü mhati mo tato

²⁵Thüma kekro püzüta, pü regü sü ukoce poti,

²⁶Mhace kehopüri acekevoriko, upo, uzu, ucemi, ununeko, usazüjüra, ulipüko ngo metsü ta kemomi, utho ukerhüro sherei, sümi asaji thishümo.

²⁷Pütho pü cross pü kemomi asaji thi shümo.

²⁸Neko mipü dahu fü keto rhüyi, ba merayi de püma sosü, Thitsoyi tome ho shi?

²⁹Molize shüdü sü de süo thitsoyi hota, Thüma metü pükrünyü ta.

³⁰Miko poti, thüma hio shudüsü thitsoyi mote.

³¹Mori kede mipü kedekekrepü zü therithi tole zütatice, bamerayi de pükerüko sosü kemoba me? Thüma nye keri keba, püzü kesü tolizü thüma nye mecü zükesü keto.

³²Mori kro kekreo chokecholü ketace pü thüma ketsüpü kezüküvela jüchoyi khasü.

³³Sübi kehopü seri pü kebako khava meramode a sajimi thiyiho.

³⁴Metsa veshu, vele metsa zori pükekhrü bamo ta lize dipü khipü thi mekhrüyi veta?

³⁵Süo sü cejü la vemo, mori khapü methobü ri thiyi su; thümapo kegükeva thi vayo. Püni kebami po reniyite.