Read Chokri Naga LUKE 16 Bible Online

LUKE 16 - Chokri Naga bible

LUKE 16

¹Pü püsajiko ce posa kesü, mhakene mipü ba, püce kefümipü riba, pü mhako mediva kezü pü pü mejosü ta.

²Pü cüpü püce süyide poti, I nju seba ketahi no dipü bi bata? No mhape kebako phri kengu süte, kekrelamori no hisa ce kepe thisamo ta ketola.

³Süsa cekefü-o pütho pü rethi de poti, I dipü bize veta? A niepo0o apo cekefü thimo tato bate. I cejü mekü yiho (te thomi thiyi ho) mice khrüti keto sü menga.

⁴I dipü thi to sheri lüyi te (rhüyito) apo cekefü thimo ketasa, miko azü uko celüko vo tato.

⁵Süla pü niepoo popü kebako cüpü püce süyi, de kerao ce poti, no dipü aniepoo popüba?

⁶Püce po kesü, tirü bü krapü süsa püpo kesü, no bayite de hepüngu tho mhai te.

⁷Süsari kekreo ce poti, no dipü püba? Püfü kela kesü, ata rha krapü, püce po kesü, n popü rha hetütha thoyite.

⁸Mu niepoo poti, jütho kemo choyio ce kekrelamori pü sübi thi kesü, mhasephi, cejü hilü kehümi kevelü kehü miko ceri mhaseku, utho ushu nuye dolü.

⁹Neko ce posüto, mezi kemo cene khipü nekhretho thiyi süze no thiyi su ketace uko nzü vo kechothe kehü thethilü sü yito.

¹⁰Sopü mhakeni lüri jüthoyi sheri süo mha kekro lü sheri jüthoyi to.

¹¹Mhaceno ketho kemo cene lü sheri jütho yi ho lize sopü ketho ceneko pü n melü süta?

¹²Mhace no mizhüyo jütho molize sopü nzhü khapü ntsüta?

¹³Cetamipü niepo kena choyithi yi ho; kekrelamori pü mipü ngo metsü mu kekreo khrü tato, Jihova mu cene ni thekümi thiyi su.

¹⁴Pharisee miko mha meho ketako süko metü sekesüce uko pü melüta, (ngomu ta)

¹⁵Pü süko cepoti, neko thüma mhüjülü netho nethi kematho pü tayo;, vele Jihova ne lüdo seba, kekrelamori thüma mhüjülü ulü meve (lükerekrü) kebami Jihova mhüjülü ngo keretsü zo.

¹⁶Thezho mu saju kepoko vo John ketso Jihova kede zhopo thisü mu thüma kehopüri süko phutazo.

¹⁷Tü mu cejü di keta reyiku, thezho ketho pü di keta ceri.

¹⁸Thüma kehopüri pücemi huva de kekrepü yi lizo süo mha kesu (kekhrü kezü) tazo; mu kehopü sheri theno ta ketao yi ketimi mha kesu (kekhrü kezü) tazo.

¹⁹Kene mipü fü mere zütati bemene mu linen khitayo, side tüsonha ngotho tayo.

²⁰Lazarus khrüketimi pü rita; pü cekhrilü babayo, kethiku püyo kekro ba.

²¹Keneo ketico, retu, pü miz lü, ki ketako sheri ti nyüsa bayo; sülebi mori tehi vori de pü kethi kuko meyo bayo.

²²Sizi tari pünha khrü ketio sata, tüyo choyiko pü kekripüvo Abraham khoroyo mezü va; mu keneo sheri sata de pü khrüva.

²³Pü mezalü pümhü khrüsü, pürü methi ketala, Abraham laco (repeco) ba de ngosü khrü ketio tavo pü khoroyo bata.

²⁴Pü semeto de poti, Apo, Abraham aphimüzhe süte, Lazarus ketsüpü ace süte, püpo pübecüne khipü jülü süyi de püvo mepopü a meyi vasü te, kekrelamori I meli hilü athü ba ketala.

²⁵Vele Abraham poti, anu, nsa lü (rekra) süte, no n kerhüce mhakeveko ngoyi, sübi Lazarus sheri pü kerhüce mhakesu ngoi, vele tsühi pülü lu bate, mu no kemezhe bate.

²⁶Sülebi mori hani mu no uko dolü thekhü kesüpü bate; süla hice mipüri nceco pheri yi hote, mipüri mipüce pheyi sute.

²⁷Süsa püpoti. Apo no pü ketsüpü apocelü süte.

²⁸Kekrelamori asazü miko mi pünguba, püpo tavo ukoce posü ketola, molize uko sheri ta thethi hilü vori kemezhe taze sumo.

²⁹Abraham pücepoti, uko Moses mu saju kepoko sheri ba, ukopo süko fü reni yite.

³⁰Püpoti, mole apo, Abraham, vele mipü kesalü rhü salavo posü tisa uko thelü redeyito.

³¹Pü pücepoti, mhace uko Moses mu saju kepoko fü reni molize, mipü rhü salavo uko cepo zori reni yiho.