Read Chokri Naga LUKE 18 Bible Online

LUKE 18 - Chokri Naga bible

LUKE 18

¹Pü ukoce jüvepü posü, pütü metülü kecho thiba moze kesu, mu ho mezata kemo.

²Pokesü, nade pülü sheco mipü tayo; pü Jihova ri mpe yomo, mori thüma sheri rho yomo.

³Nade sülü samepü mipü ba, theno süpü ta püce vori poti, ametsü ketio yo akhüpo süte,.

⁴Dopüla pü muta, vele kenuco pülüti, I Jihova mpe yogmo, mori thüma sheri rho yomo sheri,

⁵Sizi zori theno hipü a keyhu ba zote, I pükhü pothi süto, kemosa thenohipü a keba zote.

⁶Niepoo poti, jütho kemoo sheco reni süte.

⁷Jihova khüpo thisü mota tome pü keda keyi mikoyo pü uko kecho pütühu güpü bata sheri?

⁸I nekoce posüto, pü, khüpo thimha sütoi; sizizosheri, thüma Nuo kevorice cejülü kemelü ba ngoyi tome?

⁹Jüve hio khapü humi utho ulü kematho de mikekreko lü thathi ketako ce poti;

¹⁰Mi kena ta kereshücelü kho kechothi tole vo; mipü Pharisee mu kekreo mahomi.

¹¹Pharisee süthayi de kechothi sü, therüo I n meza, I thüma kekremi bi kemola, mizhü kethi kedü tiyo, jüthomo, regü rezhü mori matu kehomi thüma hio ri bi kemola.

¹²I deoba dopülü zho kena (va kena) mevo yo, I zakeri zapü amhazhü metükolü khasüyo.

¹³Matu kehoo rapeco tha, pü mhü khrüpü türi peyi ho, de pü khoro kekhu poti, Jihova I kephomami a hiri phimizhe süte.

¹⁴I nekoce posüto, thüma hio kekreo ceri püthi kematho pü pücelü vote; kehopüri uthi renu pü ketami thi rekrü süto.

¹⁵Uko nuranuko züpüvo püpo jüsüno püce vori, vele melha kenyiko süko ngosü de süko lekhuta.

¹⁶Vele Jisu uko cüpü püce süyi, de poti, natsiko po ace vorite, uko khahite; kekrelamori Jihova kede hibi tiko zhüzo tila.

¹⁷I neko ce posüto, kehopü sheri Jihova kede yiyi ketomi natsi hiko keniko biyi kemosa sülü lüyi hozo tila.

¹⁸Kezho mipü püce mhaketso, de poti, kemeta keveo kechothe kehü kalü thiyi ketola I dipü thi moze su?

¹⁹Jisu pücepoti, no dipü thide a cüpü keveo thiba? Mipüri vemo, mipü lebi sü Jihova zo.

²⁰No khakesü thezhoko seba, mi dokhri su, regü rezhü su, mi rego su, kemeda zhopo thisu, npo nzu rhoyite.

²¹Pü poti, I anatsilü süko thi mu zü vorite.

²²Süko sekesüsa Jisu pücepoti, no mhapü tsomo balu; n mhakebako zhupü kedimi za vate, size no tüyo cene kengu yito; mu tavori asa meji yite.

²³Pü süko se kesüsa, püthü küshu ta, kekrelamori pü mhane shu timi tila.

²⁴Pülü shüshu keta Jisu ngokesü ce poti, Jihova kedelü lü ketola kenemiko dithedü ri rü zoshi!

²⁵Kekrelamori ut püpo theprü celü lü keta reyi ku, kene mipü po Jihova kedelü lüti ceri.

²⁶Uko süo keseko poti, süsa sopü kelayi veta?

²⁷Pü poti mhako thüma thiyi kehoko, Jihova thi yi ve.

²⁸Süsa Peter poti, Hihe, hako mhametü vava de nsa meji tate.

²⁹Pü ukoce poti, I neko ce potü süto, thüma uce khava, ukrüko khava, usazü jüra khava, ucemi khava, uneko khava, Jihova kedelano.

³⁰Tsükehü tülü mhakekro ngoyi to, mu hisa kehü lü kechothe kerhü ngoyi to.

³¹Süsa püsaji mi kerikenako züyi de uko ce po kesü, hihe, uko ta Jerusalem lü khoto, mu saju kepoko thüma nuo lapo pü kemetako thitsü süto.

³²Pü khapü Gentile (melükemo) mi belü sü vato, de pü krünyü süto, pü meshu mu pü rephri süto.

³³Uko po, methimeni süto, mu pü dokhri vato; mu pü zho sünha rhüla süri to.

³⁴Uko mhasüko püri püco seyimo, mu püco uko mhüjülü kevava tila, mori püpo kesüko püri semo.

³⁵Pü Jericho meno vori tazü tice, mhücemi pü cholü baamakhrü ti bayo.

³⁶Makro tavo kezü sesü, dipüla sheri pü ketso sü.

³⁷Uko pücepoti Jisu Nazerath mi tavo züle zisü.

³⁸Pü semeto de poti, David nu Jisu aphimezhe süte.

³⁹Tara kevoko pülekhuta, püpo kemekre tano zita, vele pü se meto sata, David nu Jisu aphimezhü süte.

⁴⁰Jisu thayi de püzü püce vono sü, mu pü ta meno pheri tice, pü ketso, de

⁴¹Poti, mhakedipü apo nlathisü ta? Püpoti, Niepoo, apo mhangoyi te.

⁴²Jisu pücepoti, mhango yite, n kemelü n kelasü teho.

⁴³Sizi sü metha pü, mhango yita, de püsa mejuta, Jihova zapozale pota, mu thüma süo kengo metü Jihova chuta.