Read Chokri Naga LUKE 2 Bible Online

LUKE 2 - Chokri Naga bible

LUKE 2

¹Augustus kedeo celü thezhopü khakesü, cejü metü theza thosü node posü.

²Theza thopü lesilü kesü theratho-o tüce Quirinius Syria lü Angh thiba.

³Thüma metü uzatho ketola ta utho ura vota.

⁴Joseph sheri Galilee rüna Nazareth lü ta Judea lükho, David nadelü Bethlehem lü, kekrelamori pü David shuyemi tila.

⁵Pü Mary züde tavo, uni kevakha meta tila, mu thenopü nunepüta.

⁷Thenopü thepumipü menuyi de fünyepü pü kezhü sü, de khapü metho mhatibayo sümezü, kekrelamori resomi kerelü thilü uni badi ketala.

⁸Teko kefüko thera yilü tayo, tüzülü teko krofü mu la bayo,

⁹tüyo Niepoo choyimi ta ukoce vori de Niepoo keve pü uko keba khüko vamve yita, mu uko mpe shuta.

¹⁰Tüyochoyio ukoce poti mpe hite, hihe, I theju kevepü khi nekoce vorizütila; thümapo unüphi keto thümametüko

¹¹Kekrelamori tha David nadelü kelakeyipü Niepoo Khrista sü menu yite.

¹²Zasi hihi nekozü tato, neko nuranu-o fünhe pü kezhüpü cüripo mhaküti bayo khapü mezü de ngo yito.

¹³Tüyochoyio züde tüyo krode Jihova chusü;

¹⁴Püco the kesü, kerekrütho Jihova po zapozale thiyite, cejülü thümako po kezükeve and thümala mhakeve kelü thite.

¹⁵Tüyochoyimiko ta ketasa, uko khava ta tüyo khota, süsa teko kefüko hunehuce poti, khe uko tsühi ta Bethlehem lü vo tole, Niepoo uko ce po kesüko pe sükhe.

¹⁶Uko ta rekri vori de Mary, Joseph mu nuranu methoco ba-o züde uko ngoyi.

¹⁷Uko süo ngo keyice, ukoce po kesüko khapü uko mesesü, nuranu-o ju kepoko.

¹⁸Theju süko keseko metü ungo phita, teko kefüko po kesükola.

¹⁹Vele Mary mhasüko metü khapü pumelülü mhalü bata.

²⁰Teko kefüko salatata, Niepoo po kemele mu püchu, mhahiko metü se mu ngo keyila ukoce po kesübi.

²¹Nuo yirü ketola tüsozho tütha tsota, püza thopü Jisu thisü, püzu nobulü hü keyi mhüjü tüyo choyio thüza putsü kesüo

²²Thenopü thi kemesa keyi, Moses zholü thopü kemeta tüsozho tso ketasa, püzü Jerusalem lükho, pü khapü Niepoo mhüjülü sü ketola.

²³Thezho lesilü thopü kemeta, thepu nuranu püzu nobu khri (he) kepario Niepoo mhüjülü mesale poto.

²⁴Niepoo thezho lesilü thopü kemeta bide kereshü thipü Niepoo tsüto; therüvü kena mu mekhro kena.

²⁵Jerusalem lü thümapü püza Simeon lezi tipüta, thüma hio mhatho, mu kereshülü tayo; Isreal mi thelü kelupü fü mu meri tayo; Kemesa Rüpü püzüta.

²⁶Kemesa Rüpü puce mese kesü, Niepoo Khrista kengo mhüjü püpo sata hole zi tayo.

²⁷Pü Kemesa Rüpü züta de kereshücelü lüri nuranu Jisu krüneko püzü kereshücelü vori; thezho thopü kemetako thipü püyo sü ketola.

²⁸Nu süo püpüboyo süyi, de reliphripü Jihova tsüsü, de poti.

²⁹Niepoo tsüsa n cetao po tatate, pü kenülü n jüpo bide.

³⁰Kekrelamori amhü khipü n kelakeyio ngo kevala.

³¹No kesüpü thüma metü mhüjülü sü ketala.

³²Gentilemiko la kevepü mu Isreal n thümako la zapozale.

³³Joseph mu püzuni mha süko la uningo thibata, pü kepo fükola.

³⁴Simeon reliphri pü uko tsüsü, de Mary ce poti, Hihe, nu hiola Isreal mi kekro kritato mu tosü yiri to, ti thisüte, mu zasi popü kemeta pü kemetsülari.

³⁵I le, zechopü n melü kerhü thizoto, thüma melü metüko khipü hala sü ketola.

³⁶Anna sitipü saju kepopü leno tayo, theno süpü Phanuel nopü, Asher mi ye; theno süpü pethi tsa shuta, süpü tütse thüna pü nopu zühü pü reli phosalü.

³⁷Samepü süo tütse hetütha da, pü kereshücelü cutayomo, vele tüso tüzü mevo, mu kechothide Jihova choyi thi bayo,

³⁸Pütü süce tavoride Niepoo chuta, Jerusalem lü urha küyi fü meri kebako ce püju pü metükoce posü.

³⁹Niepoo thezho lesilü thopü kemetako thitso kevasa uko sala ta Galilee lü Nazareth uko nadelü kita.

⁴⁰Natsio ma sü rüpülü metüyi, mhasepü pü chuyi, Jihova ngokemezhe püyo ta.

⁴¹Hitüce, Jisu krüni Jerusalem lü cukevo nyelü vo süyo, tütse mütsü.

⁴²Pü tütse kerikena ketace uko ta Jerusalem thenye lükho, uko zhoce thiyo tibi,

⁴³Uko thezhoko tso ketasa tasala vo tazü natsio Jerusalem lü thothü bata, Joseph mu püzu ni süo sebamo.

⁴⁴Vele uni püsheri uko krolü tazo hoti lüba, zhopü chotalü vota; uko pükroko ce mu ucekroko celü pü phuvo.

⁴⁵Uko pü phu medita, süla ta Jerusalem lü lakho püphu.

⁴⁶Zhosü sa uko vo pü ngoyi kereshücelü bade, lesikesethoko dolü bade uko fü reni mu mhaketso ziba.

⁴⁷Püfü keseko ukongophita, pü miketso mu mifü kela kesüko se kesüce.

⁴⁸Uko tavo püngo keyice ukongophita, püzu puce poti, anu, no dithide haniyo hibi ta? Hihe, npo hani lü kemezhephi de nphu tate.

⁴⁹Pü unice poti, dithide neni aphu züta? Neni I apocelü pü mhatho thimokesu bati semo zome?

⁵⁰Uni pü kepoco seyi mota, unice posü zori

⁵¹Pü uni züde ta Nazareth lü kita de uni zü bata; vele püzu mhahiko kepo metü pumelülü rekra tazo.

⁵²Jisu mhase lüri mu püchosheri ma keheyi, thüma mu Jihova khrüpü.