Read Chokri Naga LUKE 21 Bible Online

LUKE 21 - Chokri Naga bible

LUKE 21

¹Pü, mhapesü, kenemiko mhakhapü presa kengu kebalü khasü keba ngosü.

²Mha kedi samepü sheri presa kena khakesü ringo, sülü

³Püpo kesü, kethopü I nekoce posüto, mhakedi samepü hio kekreko metü ceri kroku khasü te.

⁴Kekrelamori hiko mha kekro kebalü pü khasüba, Jihova mhangulü; vele theno hipü pü tsakhulü keba metü püvo khasüte.

⁵Humi kereshüce ju kepo ba tice, ketsüko dithedü ri vezho mu mhakha kesüko sheri kepoba.

⁶Pü po kesü, neko ngo keba hiko metü, pütü pü vorito, ketsü hiko püri kepishu kemo, kelhu keva.

⁷Uko pü ketso, kemethao dipü kethice mha süko thi vorita? Zasi dipü khasüta, mha süko thi vori ta ketoce?

⁸Pü ukoce poti, neko menuyite, neko kedo va mo ketola, thüma kekro azalü vorito, uko poti, I Khrista zole (süle); pütü süo meno bate, süla neko süko sameji ta hite.

⁹Vele theri kethiko mu kebü keti seto, neko kere va hite; süko vori mera zo ketola, vele pütü thela thi holu.

¹⁰Süsa pü uko ce po kesü, shuye shuye kemetsu to, kedepü kede kekrepü zü kengomuto;

¹¹Cece thethi kekretilü sü mezhoshu tato, tüsa therü mu kemekre; kempe kengo zasi kezho thipü tüyo süto.

¹²Vele süko kethi mhüjü uko be khapü neko yo sü to; neko methito, neko zü kereshücekolü voto, thejücekolü, kedeko mu kezhomiko mhüjülü voto; azalan.

¹³Neko po zhopopü thisü ketola.

¹⁴Süla n melü kerede yite, neko kedipü püpo to sheri lü medo hite.

¹⁵Kekrelamori I mhase mu kepota kha netsü süto, ne ngomuko ne meliva keho mori keprü yi keho.

¹⁶Ne sazüjürako, nekrüko, neshuyeko mu nekhretho miko neko tüsüto; mu neko humi dokhri ri va zoto.

¹⁷Mi metü neko ngo metsü tato, azalano.

¹⁸Vele neko pitha pripüri nepiyo shütaho.

¹⁹Neko sügü sühe keyilü nkhri n rarü khi bayi to, (nthinpho merhü yito).

²⁰Thipahe tavo Jerusalem whipü keyi neko ngoto, süce süo kemeka meno keba seyi te.

²¹Süce Judah lü kebako ta cejütuyo vota te, mu sülü keba kopo tapra tate; mu yilü ketako po sülü vohi tate.

²²Kekrelamori tüsozho süko khüpo kethila mhasüko thopü kemetako thitso sü ketola.

²³Vele natsimi kebako, no kebako, sütüce kemezhephi tato thethi sülü kehüko hesheherü lekhu sülü thümako yo vo ketala.

²⁴Mu uko zecholü sa tato, mu uko tüzü shuye metülü thejü thivo tato, mu Gentilemiko Jerusalem kedüda vato, Jewmi kemoko pütü tsota kemothe.

²⁵Naceyo zasiko thisüto, khriyori, mu thenükoyori, mu cejülü zimo tato shuye metülü, krokrü kemo, jükezho mu pü rephüko rü meho tato.

²⁶Thüma melüko di tato mpe ketala, mha süko cejülü vori ketala, kekrelamori tülü kekuko kena süto.

²⁷Thüma Nu kekupü tüyo zapozale thi vori kezü ngoto.

²⁸Mhasüko thi vori kezüce neko pi pükhrü sü pete, kekrelamori neko rha keyio meno ba ketala.

²⁹Pü jüve khipü ukocepo, chüdübo mu sübo metüko pede.

³⁰Püse zhü kerethi prari ticoneko seyite, tülü menote.

³¹Süla mha hiko thi vori ketasa neko seyite Jihova kede kethi meno bate.

³²I nekoce potüsüto, tsüdo kehüko di taho mha süko thitso kemothe.

³³Tü mu cejü di tato vele ajüko di ta hozo.

³⁴Fü mula bate, kehü zhorele po ne melü thi mesu vamo ketola, mezünyonyü, meyhu mezhe tiko po ne tüpü ba keredeyi mo bata mo ketola: zoma bü pübi cejülü kehü metüko yo vori zo ketola.

³⁵Rhorhü pü bate pütü metülü kechothi metü mode.

³⁶Mhakesu vori ketoko therüyi ketola Thüma Nuo mhüjülü thayi ketola.

³⁷Tüsonha pü kereshücelü mimethaba, mu tüzülü ta olive cejütuyo vo süzi kechothi batayo.

³⁸Thüma metüko tavo kereshücelü püfü reni bayo.