Read Chokri Naga LUKE 23 Bible Online

LUKE 23 - Chokri Naga bible

LUKE 23

¹Kehulü thüma makro püzü Pilate-e ce vori.

²Uko pü mejota, uko poti, thüma hio u rünalü mhakebü tate, mha khapü Caesar khrü thi hino, mu pütho püpü Khrista kedeo zole; si tate.

³Mu Pilate-e pü ketsoti, No Jews miko kedeo me? Mu pü pokesü, no süo po süzo.

⁴Süsa Pilate-e poti, thevo kezhoko mu thümako ce, I thüma hio yo kejo ngoyimole,

⁵Vele uko khrü kuta de poti, pü thümako hüpü mhakebü, Jew miko kehü metülü Galilee lüvo hice ketso.

⁶Pilate-e se keyice, pü Galilee lü kehümi me de ketso.

⁷Mu pü Herod khro keba se keyi la pü ketsüpü Herod ce sü. Sütüce Herod Jerusalem lü kezhothi kebala.

⁸Herod Jisu ngo kesüce pünü shuta, kekrelamori püju se bayo, mu pü mha ungo zasi thisü totho meri kebala.

⁹Pütü kecho pü ketsosü, vele Jisu mhapüri po mota.

¹⁰Thevokezhoko mu lesikeseko süce tha, uko pü mejo shu bazo.

¹¹Herod sheri pü paheko zü pü krünyü mu pü zhoshu sü, fü kemere khapü bemenesü side pü ketsü sala Pilate-e ce süva.

¹²Sünha Herod mu Pilate-e ni kekhretho (kezüveyi) sümhüjü zowe uni kengomu tayo,

¹³Pilate-e, thevoko, krütako, mu thümako cüsü.

¹⁴De ukoce poti, neko thüma hio zü acevori pü mhapükerhü tale side, mu I pü ketso neko mhüjülü mu pü kejo mhapüri ngoyimo neko pü mejo kebako.

¹⁵Herod sheri mhapüri ngoyi mo de pü ketsüpü acesü; sübi pü sata keshü mhatho püri di.

¹⁶Süla I püvüsü de pü khasü vato,

¹⁷kekrelamori thenyelü mipü khasü keva mesü.

¹⁸Uko metü se meto de poti, thüma hio po ta tate, Barabbas khapü hako tsü vate.

¹⁹Thüma hio kedekecholü mhakebü de mi dokhri keva mipü, pü tüpü thajü thi meta;

²⁰Pilate-e pü (Jisu) khasüva nyüde thümako jüpo sala.

²¹Vele uko se meto ba zota; “Pü khapü cross yo gu vate”

²²Vasü lüri pü poti, pü kedipü kesu thiva, I püyo mhakesu püri ngoyi mo, püpo sata keshü, I pü vüva de pü khasü vato.

²³Vele uko semeto shude püpü gu vate mu uko füphra khiyita.

²⁴Süla Pilate-e püjü khakesü uko kecho thipü tsü süno pova.

²⁵Pü uko cho keba thümao khapü uko tsüsü, mi kedokhri mu mhakebü ketao, thejücelü tüpü kemetao, mu Jisu khapü uko menyü kebabi pü uko belü süva.

²⁶Uko pütüpü tavo kezüce Cyren mipü Simon pürünalü tavori züde pütüyi, de püpo cross pü Jisu sameji vo.

²⁷Thüma kekro pü samejita, süko dolü thenoko ukhoro kekhu mu pükri krata.

²⁸Jisu regüpra ukoce poti; Jerusalem püko alakra hite, vele netho nela mu nenuneko la krayite.

²⁹Kekrelamori tüsozhoko vorizoto, sünha uko poketo, nudipüko, mu nune kemo nobuko, mu nokemo noko thejo kepütho.

³⁰Süsa uko cejütuko ce pode, retu hayo tsü hava süte, side hahuyi tate.

³¹Kekrelamori sü rhü kebao yo thori uko mha hizi ti thisü lize, sü, kesao yo dipü bitatoshe?

³²Keregomi kena tüzü vo püzü kesa dokhri va tole tavo.

³³Uko tavo thethi pü “mipifüro” tsoyi, Jisu pü sülü guva;

³⁴Süsa Jisu poti, Apo, uko kejo vapü uko tsüte, kekrelamori uko thi kethao sede thiba motila. Side uko pü füneko pü hevehesu (chethikhüle) thide kezayi.

³⁵Thümako süce tha de peba, vele krütako pü zhoshu sü de poti, pü, mi kelayiyo, pütho pü kelayite mhace pü Messiah süze. Jihova pü keda keyi mipü lize.

³⁶Thipaheko sheri pükrünyüta, meleku de kephrojü kha pü mekrasü.

³⁷Uko poti, mhace no Jew miko kedeo lize ntho nkeleyite!

³⁸Püpice tho kesü, “Hiohi, Jews miko kedeo”

³⁹Keregomi pü püzü gupü kemetao pü kenga, de poti, “No Messiah mo me? Ntho n kelayite, mu hani sheri kelayite.”

⁴⁰Vele kekreo pü lekhu de poti, No Therü-o mpe mome? No sheri pü bide n mejo keva mi thi bate?

⁴¹Avu mejo keva pütüzo, kekrelamori avu mhathola zhokhro ngo züzo, vele thüma hio kekriti thimo.

⁴²Süsa pü poti, Jisu ava rekra süte, no n kedelü kelüce.

⁴³Püfü kelakesü, I nce kethopo süto, tha no azü kereyi balü (tülü) lü tato.

⁴⁴Sütüce bavüdo shurüta, kezüpü thethi metülü vota; keba thecü ta kemothe, thevace.

⁴⁵Nace vesü mota, kereshücelü füha cekhro kena thita.

⁴⁶Süsa Jisu semeto sü, poti Apo arüpü khapü nbelü süva züho; süo po kesüsa pü süshü ha thüla thita.

⁴⁷Thüpahemi krapi kezhoo süko ngosü, Jihova chuta, de poti, thümahio mesa (kejodi) kethozo.

⁴⁸Makro süce kengupü kebako mhathi ketako ngosü, uko khoro kehu de ta ucelü vota.

⁴⁹Vele püzü kemekro ketako, thenoko risa de püsa meji vori Galilee lü, kemeculü thade mha hiko peba.

⁵⁰Hi he, thüma kevepü, jütho mezi, püza Joseph kehulü piphri mipü (sanhendrin).

⁵¹Uko medo zü kerhü kemo. Pü Jews mi rüna Arimathea lü vori, pü Jihova kede fütayo.

⁵²Thüma hio ta Pilate-e cevo Jisu mo cho.

⁵³Side pü süo khipü kiri, süo khapü linen fülü kezhüyi, ketsüro mekü kemeta mhakhre, mipüri kha sülü sü kemo pülü mezüsü.

⁵⁴Sünha Sabbath la kerede ti tüsozhota.

⁵⁵Galilee lü kevori theno miko püsa mejita, pümopü mhakhrelü mezü keva ngo.

⁵⁶Süsa uko tavo mharü kethenyüko mu tirü kesüyi, sala ucevo ketasalü.