Read Chokri Naga LUKE 5 Bible Online

LUKE 5 - Chokri Naga bible

LUKE 5

¹Thümako pügü tutu tata, Jihova jü kerenila, pü Gennesaret jükezho poyo thayi.

²Ru kena jükezho khüce ba, vele fü ketüko bamota, uko füketü jal (fü) ko meni bata.

³Pü ru pülülü, süo Simon ru, khupü jülü sünode posü, cejü kesozü kemecu kemoce; Pü bayi de thümako metha.

⁴Hice püjüpo mota, mu Simon po püru khupü jü kerelü lüphe no posü, de pü jal (ketüfü) khasüte khutüyi ketola.

⁵Simon püfü kelade pokesü, kemethao hako tüzüzho metü thehe thizole mhapüri tüyimole; sizosheri I n kepo jüla ajal kelhu süto.

⁶Ukosübide thisü, fü kekro boyita, mu uko jal pretazü.

⁷Ukokromi ru kekrelü ketako cüsü de ukopo kekhrühi sünosü. Uko tavori mu füko pü rukena nilü chuyi, süla runi relütanu.

⁸Simon Peter süo ngosüde, Jisu phelü neküki pü reshüta de poti, Acelü tatate, kekrelamori I kephomamipü tila, Oh, Niepoo.

⁹Kekrelamori püngothi ketala, mu püzü keta metüko, khu kekro tüyi ketala.

¹⁰Zebedee nuni James mu John niri sülüta Simon züta; Jisu Simon cepoti, mpepahite, hisaco nothüma ketümi thitato.

¹¹Uko runi cejükesolü vorita, uko mhametü khavade püsa mejita.

¹²Pü nadepülü kebace thümapü mpa kethipo püchu pü ba Jisu ngosü pü nekütsü puce umezhemelota, mhace no nmedo lize, no athimeve süyive.

¹³Pübechopü pü nisü, de poti, I thisüto, no mesa tate, sizisü metha mpa (lepra) kethi dita püyo.

¹⁴Püpo süopü mipüceri pohino sisü; vele no tavo thevoo mhüngo thisüte, mu mesaketa Moses zholü popü kemetako thivate, uko mhüjülü zhopo khakesü.

¹⁵Vele pü kemele ukhü metülü vo keye süta; makro tavo püfürenita, uko kethathiko thi kesürho sü ketola.

¹⁶Pü thüma therüta rayhokolü vode kechothi ta.

¹⁷Pünhapü pü mimetha bari, Phariseemiko, mu lesi kesethoko süce ba, Galilee rünakolü vori ba, Judea lüri, mu Jerusalem lüri, Niepoo keku ukothikesürho sü ketola ba.

¹⁸Thüma lasaketapü püziyo püpü vori, pü züvo puce süketo chophu, pükhapü pü mhüjülüsü ketola.

¹⁹Uko pü zülüsü keto chophu medita, kekrelamori thümakrori ketala, uko cetuyo kuta, cetu cepha sü püzilü pü püki Jisu mhüjülü süsü.

²⁰Pü uko kemelü ngo kesüce “Thümao, n kephomako vasüteho,” ze posü.

²¹Lesikeseko mu Phariseemiko kepode thüma hio sopüle zi-eno Niepoo kemeshu po bata? Sopüno kephoma vayi veta, Jihova lebisa?

²²Jisu uko lüdo sesü de kelakesü, neko melülü dipü lüba?

²³Dipüo poreyi kuta? Nkephomava ntsüvaho siti me? Mori tasüte de chotayi tate, süni dipüo poreyi ku?

²⁴Vele nekopo seketola Thümanuo cejülü keku kephoma va keyi ba (side pü lasao ce poti) I nce posüho, tasüte, nzi püyi de ta ncelü votate.

²⁵Rekri thümako mhüjülü pü tasüta, püzü kezüthilü, ta pücelü vota; zapozale Jihova thide.

²⁶Thümametü ungo thita, Jihova zapozale pota, meprüti thümako yo vota, tha uko mha ketekhri tipü ngosüte.

²⁷Mha hiko thi kevasa pü tavozü ri thümapü Levi letipü khazhonu khrü bade ngoyi, püce poti, “no asameji yite”

²⁸Pü mhametü khavade püsameji ta.

²⁹Levi pücelü thehüpü kezhopü kesüsü, kezhomi kekro mu thüma kekrekori vori uko kezü ba,

³⁰Vele Phariseemiko mu lesikeseko panyode pü sajiko poti, neko dipüla malimiko mu kephomamiko zü mhati mhakra baya?

³¹Jisu uko fü kelakesü, “kesürhomiko daru kesemiko zü mhapüri kethidi, vele süko kethimiko lazo.

³²I kemeziko cü ketola vorimo, vele kephomamiko po thelü redeyi ketola zo.”

³³Uko puce poti, dipla John sajiko tsükenu mevoya, mu kechothiyo; sübi Phariseemiko sheri siziyo; vele neko ti mu kra bazo?

³⁴Pü ukoce poti, neko zhosao celü mevo ba tome, zhosao ukozü kebace?

³⁵Vele tüsozhoko vorito, zhosao züta ketasa, (uko celü bamo ketasa) süsa tüso sünhako uko mevo tato.

³⁶Pü uko ce kejüvede poti, mipüri fükra pü fü kesa mefü yomo, sizilize fü kesaori kroku tato, fü kesao fü kevüo zü kekre mu kemhakebi motayo tila.

³⁷Mipüri hezo kesa khapü vaheri (botol) kevülü süyomo, sizilize hezo kesao vahe kevüo püphro vayo, hezo kelata mu vahe (botol) meka vato.

³⁸Hezo kesa khapü vahe kesalü süyo, sizitisa kenani mekrü yito.

³⁹Hezo kevükramezüyi ketasa mipüri hezo kesa menyü yomo, pü kelüce hezo süketa (kevüo) kevetho (veku) le zi bayo.