Read Chokri Naga LUKE 6 Bible Online

LUKE 6 - Chokri Naga bible

LUKE 6

¹Sabbath vakena-o nha püsajiko zü sako yilü vo, püsajiko sako rütita uko belü süyide.

²Phariseemipü ukoce poti, neko dipü thide Sabbath zhonha thezhokemo thi ya?

³Jisu ukofü kelekesü, neko mha hibiti phrimo zome, David meri ketace, püzü ketako zü dithi.

⁴Pü kerüshücelü kelüce: mengo keti tsükrida khipüti mu pü püzü ketako pori ti;

⁵Pü ukoce posa kesü, Themanu-o Sabbath pi sheri Niepo zo.

⁶Sabbath kekrepünha pü kereshücelü lü mi methaba, sülü mipü pübo uzaco lasa ketapü ba.

⁷Lesikeseko mu Phariseeko pü peba, Sabbath nha pü mithi kesürho sü tome mo sheri; sülü uko pü mejo keto ngoyi ketola.

⁸Vele pü uko lüdoko seba, süla pübo lasa ketao ce poti, tasü midolü thasüte, siri uko dolü tasü thayi.

⁹Süsa Jisu ukoce poti, I nekoce mhapü ketsoto, Sabbath nha mhakeve kethi thezho me, mhakesu kethi thezho? Thüma kelasü tome, mi dokhri ti?

¹⁰Pü uko pe metu vosü, side thümao ce poti, nbo meto süte, pübo metosü ri pübo keveco bita.

¹¹Uko lükekripü ukotho kerethide Jisu yo kedipü thisüto sheri mebu bata.

¹²Pü ta cejütuyo vode kechothi bata, tüzüzho metü sülü bata.

¹³Tüso vori cu pü sajiko cüsü, mikerikena kedapü püsaji thiyi, mu süko thopü apostels zisü.

¹⁴Simon, püzathopü Peter thi kesüo, Andrew pü sazüo, James mu John ni, Philip mu Bartholomew.

¹⁵Mathew mu Thomas, James Alphaeus nu, Simon cüpü Zealots siyo.

¹⁶Judas, James sazüo, Judas Iscariot pütüpü zhu kevao.

¹⁷Pü cejü kethezholü kiri mu püsajiko risa, thüma kekro Judea metülü mu Jerusalem lü sheri, jükezhokhükolü Tyre, Sidon lüko voride püfü reni mu ukethiko thikesürho ketola vori.

¹⁸Therükesu rüpüko po ukebü ketako, süko thikesürho sü.

¹⁹Makro tavo pü jüsünyüta, kekrelamori mhakeve püyo prade süko metü thi kesürho sü ketola.

²⁰Pümhü khrüpü methakeyiko pede poti, “neko mhakediko thejo kepütho, kekrelamori Jihova (tüyo) kede neko zhüzo tila.

²¹Neko tsühi merikebako tsühi krakebako thejo kepütho, kekrelamori neko nüyi (nyüta) ketola.

²²Mi neko ngometsüyo tiko thejo kepütho, side mi krolü neko hu kevako, neko meshü, nza cüpü thüma kesuthomithi, kekrelamori thümanuo la.

²³Neko sünha neko rechuyite, de prürehü süte, hihe, nekozhokhro tüyo vephizo ketola; uko potsaneko sheri sübiti thipü saju kepokoyo süzotila.

²⁴Vele neko mhakeneko kesukerho, neko lü kelu ngoyi ketala

²⁵Neko chu kebako kesukerho, neko merita ketola, neko tsühi nyü kebako kesu kerho, kekrelamori nekokra mu thekrithita ketola.

²⁶Neko mi metü nechu (pomeve) kebako kesukerho, kekrelamori upotsaneko sheri kecejü saju kepoko yo sübiti thizo tila.

²⁷Vele I neko reni kebakoce kepo, nengomumiko khrüyite, neko metsü ketakoyo mhakeve thisüte.

²⁸Neko reshu ketimiko yo jo (reliphrü) pü tsüte; neko krünyü (ne meshu) ketimila kechothite.

²⁹Nejo püco vü (kekhu) sülize, kekreco kerüpü tsüsa süte; n bola pükhiyi talize nbola (meso-o) ri pü putsü sa süte.

³⁰N ce mhacho keba metü khapü tsü süte, mu nzhü püyi ketakoce cho sala hite.

³¹Miponekoyo dipü thisüze nenüyo sheri neri miyo sübi thisüte.

³²Mi nekekhrüko lebi khrüyo lize, dipü kemeza ngoyita? Kephomako sheri siziti thiyo tila.

³³No mhakeve thipü mi mhakeve thipü n ketsüko lebi tsüyo lize, dipü kemezangoyi ta? Kephomamiko sheri sübi keti thiyo tila.

³⁴No mhangoyi ketokoce mhangoyi keto kemerila mhapü mi thepo ti lebi lize, dipü kemeza ngoyita, kekrelamori kephomiko sheri mhapü mithepo süde mhangoyi keto meri yozo.

³⁵Vele n ngomumiko khrüyite, mhakeve thi pü sükoyo süte, mhapü süko tsüte, mhapüri sükoyo meri hite; n zhokhro zhoshuzoto, mu neko kerekrüthoo nune thiyito, kekrelamori pü thüma kesuko yo sheri sizi yo.

³⁶Neko süla mingomezhe zote, neko pori mingo mezheyo tila.

³⁷Mi mejo hite, size mi neko mejo taho; milümesu hite silize mi nelü mesuho; mikejo va mitsüte, silize nekejo va süto.

³⁸Mhakha mi tsüte, size mhakha netsüto; medetsüsüto, nü ketü süto, kena (kenü) süto, tsole (chule) ketakori lapü n khoroyo süpü ntsüto. Kekrelamori no dipü bide thisü sheri sübi tüti thipü ntsü süto.”

³⁹Pü jüve pü ukoce poti, mhücemipü mhücemi chothayi veme? Uni kenani retu tekhülü lüta motome?

⁴⁰Misajimi pü niepoo ce zhokumo, vele vetsütso ketimi pü kemethami bizo.

⁴¹No dipüla kerho nsazüo mhülü kebao peba, n mhülü kerho kebao pe mera mo deno,

⁴²Mori dipübide no n sazüo ce poyiveta, a sazüo apo kerho n mhülü kebao pü vate siziyi veta, nmhülü kerho kebao khiva meramono? No kethera ketao, kerho n mhülü khiva merate, size no kerho ngometseyito mu nsazüo mhülü kerho kebao khivato.

⁴³Kekrelamori sükeve püse kesuzhüta yomo; mori sükesu püse kevezhü yomo.

⁴⁴Kekrelamori husho süyo khubü sezhü yomo.

⁴⁵Thümakevemi pü melü lü mhakeve kengu pü metatila mhakeve khiprari yo; mu thüma kesumi mhakesu pumelülü kebala mhakesu khiprariyo. Pü melülü mhakekro kengupü metatila süko utalü püprari yo.

⁴⁶Neko dipüla akhipü, “Niepoo, Niepoo” siziba; akepoko thisü mode?

⁴⁷Kehopü sheri ace kevorimi, akepoko reniyi mu süko thimu züyi lize, I thapü neko meka süto pü kedipü bitosheri.

⁴⁸Thüma süo pücekhü chürelütsü tsüroyo umeshu yide pücethiyi, jüde süri süova, siri ce süo renamota, süo tsüroyo düyi ketala.

⁴⁹Vele reniyo, thiyomo lize thümasüo puce thipü nyolulü shukesü cepübizo, jüde vori ce süo va, metha ce süo retuta, ce süo kashuta.