Read Chokri Naga LUKE 7 Bible Online

LUKE 7 - Chokri Naga bible

LUKE 7

¹Pü mhahiko potso kevasa, thüma krode koce, püta Capernaun lülüta.

²Krapikezho thekümipü, pü khrüphi yori mhathi tade satanu züta.

³Pü Jisu vori kezü sesüde Jews mehimi ketsüpü Jisu cesü, püpo tavo pü theküo thikesürho süno chota.

⁴Uko ta Jisu ce voride püpo tavo büno rüdata, poti pü vosheri kezüzo ketithüma püle sizita.

⁵Pü hashuye kekhrümi mu pü synagogue sheri thisü.

⁶Süla Jisu ukozü tavota, pü tavo ce süozü kemecu bakemolü tsoyi, krapi kezhoo püzümiko ketsüpü püce süde “no kemezhehite, I npo ace khrikhro lü kesümi mole, Ino”,

⁷Mori Ita nce vorei kesümi mole, vele no jüpü posü lize, athekü-o sürhoyito.

⁸Kekrelamori I sheri kekukhrotayo, akhrosheri thipahemiko ba, I püpo tavote, sizi süze pü tavotayi; mu kekrepüce, tavorite zisüsüze, pü tavoriyo; mu athekü mice n mhahio thisüte sizi süze pü thisüyo.

⁹Pü süko po kesüce Jisu püngo thita, de regüpra pükhüko pesüde, püsameji ketakoce poti, I nekoce posüto, I thüma ukemelü kene hibiti ngomo, Isreal lü zosheri bamo.

¹⁰Uko ketsü kesüko ta sala ce sülü vota, tavo theküo mhathi kebao sürho bade ngoyi ta.

¹¹Tüso süsanha, püta nade Nain lüvo, pü sajiko mu thüma kekrosheri.

¹²Pü nade kharü meno vori kezüce, hihe! Kesa mopü püde vorizü ngoyi, thenosamepü mipü nu pule; thümakekro püsamejita.

¹³Niepoo süo ngosü de püphimezheta, de püce poti, “krahite”

¹⁴Pütho phe mopüra püsü, mu kesao pü ketako thakemekre bata, pü poti, “kresa-o, I ncepoyo, tasürite.”

¹⁵Kesao tasüri bayi, de mhapo shüdü ta, pü thimerhüpü püzu tsüsü.

¹⁶Kemeprü thema metüyo bata; Jihova chu zapozale thita. Uko dolü, mu Jihova pü thümako meho süte.

¹⁷Theju hio se Judea cejü metülü vota, mu pükhü kemetuko metülü ri vota.

¹⁸Mha hiko metü John sajiko pü John ceposü.

¹⁹John pü sajimi kena ketsüpü Jisu cesüde pü ketso, no vori ketoo me? Mano hakopo kekrepü fü bata?

²⁰Ketsü kesüni püce voride uni poti, John Baptist no hani ketsüsüle, no vorito ketao me? Mode hakopü kekre pü fü bata?

²¹Hitücehi pü kethimi kekrothi kesürho sü, thathi ketako, therükesu ukebü ketako, mu mhücemi kekro mhüthipü mhangosü.

²²Jisu süla unicepoti, neni tavote, de John ceposüte, mhücemi mhangoyi bate, pheyhomi chotayi bate, lepra kethiko thi menüsüte, nizhümi mhafü seyibate, kesasmiko thimerhüyi bate, jüyikeve popü kediko cesü bate.

²³A yo kejothikemomi thejo kepütho.

²⁴John sajiko ta ketasa Jisu John zhopo thipü thümakoce kesü, “dipüla neko ta nhatsalü vo dipü peya? Tekhrapo hü melü keba pe toli züme?

²⁵Vele neko tapra dipü peya? Thümapü füne kemenü khiketa püme? Hihe, keretso pü keta thümako kedemi celü bayoho.

²⁶Vele neko tavo kedipü pe ketola vo? Saju kepomi me? Ile, I nekoce kepo, saju kepomi ceri kezükeye.

²⁷Thüma hio thezho lesilü thopü kemetao Hihe, I n mhüjülü saju kepomi, a choyikethi, ketsüsüto, pü n choko thi kerede süto.

²⁸I nekoce kepo, thenomi po menu kesüko dolü John ce saju kepo kezho basamo, vele Jihova kedebalü kenithoo sheri püce zhoku.”

²⁹Thümako metü, püfü sesü, malimiko sheri, Jihova po meveta, uko John Baptist zalü jülopüyi.

³⁰Vele Phariseemiko mu thezhokeseko Jihova medolü vori muta, John Baptist zalü ri jülo püyi mota.

³¹Niepoo poti. Tsüdo nuko pü kedipü zü kemede süta? Dipü bile zide poyi veta?

³²Süko natsimiko dukalü bade, hunehu cü de poti, hako leli khusü neko mese, nekonasü mote; hako thekri thisü vele neko krasü mote.

³³John Baptist voriti tsükhri timo, mori hezori kramo; neko püpü therü kesu püzüta sizite.

³⁴Thüma nuo tavori mhati mhakra; Hi he, mhati kenyüo mu hezo krakenyü-o, malimi, kephomamiko, khriethoo sizite.

³⁵Vele, mhaselü kemezi mesesüte, pü nune metükola.

³⁶Phariseemipü Jisu po pücelü mhatino pücüsü, pü tavo de bayi sülü mhati ketola.

³⁷Thenomipü, kephomapü, nade sülü, Jisu Pharisee celü keba sesü. Tirü Alabastar büpü, mharükethenyüpü püvori.

³⁸Püphece usaco kratha, pümhüjü popü püphe vade püpitha khi shüsü, de püphe mebosü, süsa tirü süo pü kenhüsü.

³⁹Pharisee pücü kesüo süo ngosü de pülülü ti, mhace thüma hio saju kepomi lize theno hipü sopü mu dibiti nopü sheli seti mesü, püjü kethao; pü kephoma püpü,

⁴⁰Jisu süo kelakesülü poti, Simon, I n ce mhapü po süto, pü poti, kemethao, posüte.

⁴¹Mhapü mithepo ketimipü, püpo kepümi mikena ba, mipü presa krapengu mu kekreo hepüngu de püpo püba.

⁴²Unikenani mhapüri pü püpo shuyi hota, pü süla unipo metü vasüva, uni sopü pü khrü (unü) kutata aceposüte.

⁴³Simon püfü kelakesü, akelüce püpo pü mekrokeba-o totho (vamekro kesüo). Pü ce posala kesü, no sheco thimeve shusüzo.

⁴⁴Pü regüsü thenopü ceco peyi de poti, Simon, theno hipü no ngoba ile? I ncelü kelürice no jüpü a phekhrümo, vele thenopü pümhüjü pü aphekhrüsü, mu püpithapü kezhü mesosü.

⁴⁵No amebo sümo, vele I lüri mu metha (culü) aphe mebo zoba, relümo zo,

⁴⁶No tirü pü apitha kenhümo, vele theno hipü tirü pü aphe kenhüsü.

⁴⁷Süla I nce posüto, pü kephoma krophi zori vapütsüsüte, kekrelamori pü kekhrü neshu tila, vele kedopü kekhrü kebako kedopü lebi va kesüzo.

⁴⁸Pü thenopü ce pokesü, n kephomako vapü ntsü süte ho.

⁴⁹Püzü mhati kebako utho ulü lüti, thüma hio mikephoma va keti hio sopüle zi bata?

⁵⁰Pü thenopü ce po kesü, n kemelü la nkela süteho, nnüde tavo tate, site.