Read Chokri Naga JOHN 13 Bible Online

JOHN 13 - Chokri Naga bible

JOHN 13

¹Cukevo nye mhüjüce Jisu cejülü tata keto pütü tsoba keta seba tila cejülü pümako khrü zovo thela tsozo.

²Uko theva mhaco ti keyisalü therükesu ta Iscariot Judas, Simon nu lü lüta, pü tüsü ketola.

³Jisu pü Po mhametü khapü pümelü sü keta seba, pü Jihova celü vori zo, mu Jihova celü vota keto sheri.

⁴Pü mhati keyisa tasü de püfüneko khipü kerüva, (towel) fünepü khiyi, mu püche phayi.

⁵Jü rüpü büfü pülü süyi, de püsajiko phe khrü shüdü, fünheo pü uko phe shü meso sü pü püche phapü kebao.

⁶Side pü ta Simon Peter ce pheri, ri Peter püce poti, Niepoo no aphe khrü tola?

⁷Jisu püce pokesü, I dipü thiba sheri neko tsühi seyiho, vele no hisa seyito.

⁸Peter po kesü, npo mhapü ceri aphezi khrü hole. Jisu püce posala kesü, mhace I nphe khrümo lize no ala mote (azü ta mote).

⁹Simon Peter poti, Niepoo aphe lebi mori, abe mu api sheri khrü vate.

¹⁰Jisu püce po kesü, Jürelo pü ketami sizi mori ve püphe lebisa, püpho metüko mesa bazo; mu no mesaba vele neko metüko mo.

¹¹Kekrelamori sopü pütüsü to sheri se kebala, sülü püpoti, neko metü mesa tsomo.

¹²Süla pü uko phe khrü kevasa, pü füneko khisalayi de bayi, pü ukoce poti, neko seyi tetho I nekoyo dipü thisü sheri.

¹³Neko acüpü Kemethao mu Niepoo siziyo; süsü potü süzo I süozo tila.

¹⁴Mhace I neko kemethao mu Niepoo zori neko phe khrüyo lize, neko sheri hunehu phe khrü zü zo.

¹⁵I mhathopü thapü neko meka kesüla neko sheri I thi kesü bide thiyi züzo.

¹⁶I nekoce potü süto mithekümi pü niepoo ce zhoku tamo, mori ketsü kesüo mi pü ketsü kesüo ce zhoku mo.

¹⁷Mhace neko süo seyi lize nenü yite, nekola keve zoho.

¹⁸I neko metü pobamo, I pü kedakeyio poba tizo; vele ketholesi po tsoyi ketola, pü azü tsükhri ketio püphekapü amesü: siti kepo.

¹⁹Tsühi nekoce posüte, süko thi vori keta mhüjü, nekopo I süo le ziti melüyi ketola.

²⁰I nekoce potü süto, kehopüri I ketsü kesüo zü keyimi, azüyizo; mu azü keyimi aketsü kesüo ri züyizo.

²¹Jisu mhahiko po kesüsa pürüpülü kemezhe vorita, mu posa kesü, I nekoce potü süto, neko dolü mipü atü süto.

²²Süsa methakeyiko hunehu pe de sopü poba sheri ulü tsakhu bata.

²³Püsajiko mipü süce pükhoro mengu püba, Jisu khrü kebao.

²⁴Simon Peter püketso de sopü po ba sheri pübe chopü jüpoba.

²⁵Jisu khoro mengupü kebao püce poti, Niepoo, süo sopüta?

²⁶Jisu püfü kela kesü, I tsükhri pü jülü sü kesüsa süo khapü tsü kesüo toho. Süosalü pü tsükhri pü jülü süsü (metsüsü) de khapü Iscariot Judas tsüsü, Simon nu.

²⁷Pü tsükhri metsü kesüo ti keyisa Satan pü melülü lüta. Süsa Jisu püce poti, “No thiketha-o thimha süte.”

²⁸Hicehi miz khüce kebako mipüri pü dipü cola sizi püce poba sheri se bamo.

²⁹Kekrelamori humi lüti, Judas no presabü khita tila Jisu püpo thenyela mhakhriyi nosütho siziba, side kedimikola mha khapü tsüsü keto latho ziziba.

³⁰Pü tsükhripü jüsü kesüo ti keyisa tarekri ceta vota, süce tüzü ta.

³¹Pü taketa salü Jisu ukoce poti, Tsüsa thema Nuo zapo zale thitato, mu Jihova püyo zapozale thi tato.

³²Mhace Jihova püyo zapozale thiyi ta lize, Jihova sheri zapozale thiyi tato, side zapozale sü thiyi to.

³³Natsiko, pütü dopü I neko zü bati zo tato. Neko aphuto, I Jews mikoce po kesübi, I dopüce vota to sheri neko sülü vori yiho, süla I nekoce tsühi poba.

³⁴I jükesapü khapü neko tsüsü tolizü, Neko hunehu khrüyite; I neko khrü vori tibi, neko sheri hunehu khrü yi züzo.

³⁵Sizi keyilü thümako neko asajimi leti seyito, mhace neko hunehu khrüyi lize.

³⁶Simon Peter püketso de poti, Niepoo no dipüce vota tola? Jisu püfü kela kesü, I dipüce voto sheri neko asalü vori yiho, tsücehi. Vele hisaco asa meji vorito.

³⁷Peter püce posala kesü, Niepoo dipüla I nsa meji yihole zita? I apho sheri nla khasü zoto.

³⁸Jisu püfü kela kesü, no ala npho khasü tola? I nce potü süto, thevü kekhu mhüjü no vasü aphramo tato.