Read Chokri Naga JOHN 15 Bible Online

JOHN 15 - Chokri Naga bible

JOHN 15

¹I khubübo botho-o zo, mu a PO-o kefü-o zo.

²Kehopüri ayo use zhüyi kemomi rhodü vato, uco kehopüri use zhü keyimi pü ketso süyo side püpo use zhü shuyi ketola.

³Neko tsüce mesa bate I nekoce jüpo kesü jükola.

⁴Ayo bayi mu apo nekoyo bayi. Süco pütho zono püse zhüyi yomo püboyo ba kemosa sübi, neko ayo bakemosa nese zhü yiho.

⁵I khubübo botho-o zo, neko pücoko, Pü ayo kebami mu apo püyo kebami püse zhüphi yito; kekrelamori neko asamode mhapüri thiyi hozo tila.

⁶Mhace thümapü ayo bamo lize, süco dathü kevao revi tayo tibi tato; side mipo püpü methü vayo, püto medi vato.

⁷Mhace neko ayo bayi mu ajüko neko lü bayi lize, neko mha nenüko choyite; süko thipü neko tsü süto.

⁸Hibi tilü a Popo zale thiyi to, neko se zhüshuyito, sizi de neko asajimi thi yito.

⁹Apo akhrü keta bi I sheri neko khrütayo, neko akekhrülü tayite.

¹⁰Mhace neko I nekoce khakesü jüko thiyi lize, neko akekhrülü bayito; I sheri a Po jü khapü aketsüko zü tayo tibi, mu pü kekhrülü bayo.

¹¹I hiko popü nekoce kesü akenüpo nekoyo bayi ketola, side neko kenü thitsosü ketola.

¹²Nekopo thino kesü thezho I khapü neko ketsü süo neko hunehu khrüyite, I neko khrü kevori bi.

¹³Kekhrü hioce kezho püridi, thümapü ukehü khapü püzüko tsükesü.

¹⁴Neko akhrethoko, mhace neko akepoko thi mu züyi lize.

¹⁵Thayovi I neko cüpü thekümi lezi hote, kekrelamori mithekümi niepomi kedipü thiyo sheri seyomo; vele I neko cüpü khrethoko sizito: kekrelamori I a Po celü sekeyiko khapü neko mese mengo süketala.

¹⁶Neko akedayimo, vele I neko kedayi; neko thi mekrepü nekopo nese zhüyi ketola, side neko sepo bayi ketola: neko azalü Poo ce mhakehopü cho sheri pü thipü neko tsü süto.

¹⁷Mhahiko I nekopo thino kesüko, neko hunehu khrü yite.

¹⁸Mhace cejüo neko meshu ta lize, himhüjü ameshu mera süte mu neko sheri meshu zoto.

¹⁹Mhace neko cejüo thüma lize, cejüo püthümako khrüte vele neko cejüo kemola, I cejülü neko keda yite; süla cejüo neko metsü tato.

²⁰I nekoce kepoko rükra yite, mithekümi niepomi ce zhoku tamo. Mhace uko amethi lize neko sheri methi zoto tila; mhace uko akepoko seyi lize neko kepoko sheri seyi zoto.

²¹Vele uko azalano mha hiko thipü nekoyo sü zoto, kekrelamori uko aketsü kesüo se kemola.

²²Mhace I ukoce posü molize uko kejo baho, vele tsüsa uko kejokeva basa mote.

²³Pü ango metsü ketao a Po sheri ngo metsü tazo.

²⁴Mhace mipüri thiyo kemoko I thisü molize, uko kephoma bamo; vele uko tsücehi ngo süte mu uko a Po hani kenani ngo metsüte.

²⁵Vele thajü ketho lesi thezholü thopü kemetako tsüyi ketola uko ango metsüte, kemechülü, mhapüri mozo sheri.

²⁶Vele thelü thokemelu vorito, I a Po celü chopü neko tsü süto; ketho Rüpü, a Po celü vorito, pü azhopo thisüto.

²⁷Mu neko sheri azhopo thito, kekrelamori neko theralü azü tazo tila.