Read Chokri Naga JOHN 18 Bible Online

JOHN 18 - Chokri Naga bible

JOHN 18

¹Jisu jü hiko po kesüsalü püsajiko züde rütsi Kidron lü tizhepülü lüta mu pü sajiko sheri.

²Judas, pütü kesüo sheri thethi süo seba, kekrelamori Jisu tsükenu püsajiko zü sülü voyo tila.

³Judas sübide thüma kropü, kezho miko, thevo kezhoko, mu Pharisee miko züyi, de metobü, metosü, mu rineko khi vori.

⁴Jisu mha süko metü püyo thisü keto seba tila, ta ukoce vode neko sopü phuzü? zisü.

⁵Uko püfü kela kesü, hako Nazarethmi Jisu phu züle. Jisu ukoce poti, I thüma süo le zisü. Judas pütü kesüo ri süce tha uko züde.

⁶I thüma süo le zisü metha uko tsüsata, de retu cejü tsüta.

⁷Süsa pü uko ketsode, Neko sopü phu züla? Uko posala kesü, Jisu Nazarethmi phu züle.

⁸Jisu posalasü, I nekoce posü mome, I thüma süo zole, mhace neko aphu ta lize neko atü yite.

⁹Popü kemetako thitso sü ketola, pü po kesü, uko no khapü aketsüko I mipü sheri medi vamo.

¹⁰Simon Peter süsa zecho khipü thevo kezhoo cetao ni metava, uzaco ni. Thekü süo za Malchus.

¹¹Süsa Jisu Peter cepoti, Zecho khapü pübülü süvate, a Po tehepü aketsü I krazü mome

¹²Süsa kro süo kefüo, Jewsmi kezhoko, Jisu tüpü phayita.

¹³Uko pü tüpü Anna, Caiphas ni celü vota, pü tütse sülü thevo kezhoo thi kebala.

¹⁴Caiphas no hitülü Jews miko zü kerethi tilü poti, mipüpo thüma kola sava mo keshü posü.

¹⁵Simon Peter püsa mejivo, mu methakeyi kekreko ri, thevo kezhoo metha keyio seba pü Jisu zü thevo kezhoo celü vo.

¹⁶Vele Peter chozuco cekhace tha. Pü sajiko thevo kezhoo sekeba la tapra thenopü cekha fü kebao ce Peter zü celü lüri.

¹⁷Süsa thenopü cekha fü kethao Peter ce “No sheri püsajimi püzo mome? Pü poti, I no mole.”

¹⁸Choyi miko mu kezhoko süce tha, megikrapü methi mevü kebala; tüsülü uko me megu kebala: mu Peter uko dolü tha, pü sheri me megu ba.

¹⁹Thevo kezhoo Jisu ce pü sajiko ketso ba, mu pü kemetha jüko.

²⁰Jisu püfü kelakesü, I cejüo ce mhotsu posüzo, I synagogue kolü methasü, kereshüce kolü, sükolü Jews miko vori bazo, mu I kemekhrülü mhapomo.

²¹No dipüla aketsoba, afü keseko ketsote, I ukoce dipü posü sheri; Hihe, uko akepoko seba tila.

²²Pü jüpo kesü salü kezhoko mipü beziphrepü püvü, no sübi de thevo kezhoo ce jüpo tome?

²³Jisu püfü kelakesü, I mhapo kekri süze no kesü zhopo thisüri ve, vele mhace sizi mo lize no dipüla avüba?

²⁴Hisalü Anna pütüphapü thevo kezho Caiphas ce süva.

²⁵Simon Peter süce tha de me meguba. Süla uko püce poti, No sheri püsajiko mipü zo mome? Pü süo kela kesü, I mole.

²⁶Thevo kezho theküo, Peter zechopü püni zathü kevao, pücekromi tila, Peter ce poti, tizhelü no püzü keta I nngo mome?

²⁷Süsari Peter püse mole pota, sizisü metha thevü füta.

²⁸Süsa Caiphas celü Jisu zü thene keticelü vota, süce keshu renazo tila uko sheco celü lü molu; molize ce süo thimerhova ketola; vele uko cukevo nye mhati to kebala.

²⁹Pilate-e chozu prari ukoce, de poti, neko kedipü pü thüma hio mejoba?

³⁰Uko püfü kela de po kesü, mhace thüma hio thüma kesumi mo tisa hako püzü nce voriho.

³¹Süsa Pilate-e ukoce poti, neko püzüvo neko zholü püshe ketite. Jews miko püce poti, hako zholü mi dokhri keti bamo.

³²Jisu popü kemeta thitsoyi ketola, pükepo, pü dipü sü thito sheri po meta tila.

³³Süsa Pilate-e ta sala sheco balü lü, Jisu cüsü, de püce poti, no Jews miko kedeo me?

³⁴Jisu püfü kela kesü, süsü ntho nkepo zome, mori kekremiko aju nce kepo me?

³⁵Pilate-e püfü kela kesü, I Jews mipüme? Nshuye mu thevo kezhoko, nzü ace vori, no dipü thi süta?

³⁶Jisu pola kesü, A kede kethino cejü hilü mo; mhace cejü hilü zhü lize asajiko mizü kezheto, atüpü Jews miko belü sümo ketola: vele tsühi, akede hice zhümo.

³⁷Pilate-e püce poti, süsa No kedemi me? Jisu poti, No apü kedemi le zisüte. Thüla hiola amenu vori, püco hiola I cejülü vori; apo ketho zhopo thisü ketola. Kehopüri ketholü ketami afü reniyo.

³⁸Pilate-e püce poti, Ketho sü dipü? Pü süo po kevasa ta Jews miko ce ceta prata, de ukoce poti, I püyo mha kesu püri ngo yimo.

³⁹Vele neko thezho püba, neko cukevo nyelü mipü kela süyo, apo Jews miko kedeo kelasü va toma?

⁴⁰Uko metü serekrü de poti, thüma hio mo vele Barabbas te. Barabbas lize mizhü süketimipü.