Read Chokri Naga JOHN 20 Bible Online

JOHN 20 - Chokri Naga bible

JOHN 20

¹Deobado sülü tüsozho thera nha, Mary Magdalene keshu rena tüzü kebalü ta mhakhre lüvo, ketsü phüketu keva ngoyi mhakhreyo.

²Süsa thenopü ta Simon Peter mu püsajio Jisu kekhrüo nice vori, de unice poti, Uko Niepoo mhakhrelü khipü tate, mu hako semote, püpü dipüce vota sheri.

³Peter mu püsajio ni süla ta mhakhrelü vo.

⁴Uni kenani ta kemetha vo, mu püsajio Peter mhüjü tavota, de ta mhakhrelü ra vota.

⁵Pü talü mhakhre lü pesüri, linen füko sülü ngo, siri pü ta ulü lümolu.

⁶Süsa Simon Peter püsalü vori, de ta mhakhrelü lü, linen fünheko keba ngo.

⁷Mu fükeni pü püpi kepha riba, vele linen füko zü bamo, pütho pülebi kezhi püba.

⁸Süsa püsajio sheri ta mhakhrelü lüri, pü ta mhakhrece vori ra vele, mu pü talü ngoyi de melüta.

⁹Sütüce uko ketholesilü thopü kemetako melü molu tila, pü sa kevasa rhüla süta keto.

¹⁰Süsa pü sajini ta sala utho ucelü vota.

¹¹Vele Mary süce tha de kraba, pü krakezhü mhakhrelü nekü kipe.

¹²Tüyo choyimi kena bade ngo, mipü püphece mu kekreo püpico, Jisu pü khrü kesü thilü.

¹³Uni püce poti, thenopü no dipüla kratha? Thenopü poti, Hihe, mi a Niepoo khipü tatele, püvo dipüce süva sheri I semo tele.

¹⁴Thenopü süko po kevasalü regü püsaco pesü, ri Jisu süce tha de ngoyi, vele Jisu tho ziti semo.

¹⁵Jisu püce poti, Thenopü, no dito kraba? No sopü phu züta? Thenopü püpü tizhe kefüo le ziti lüba, süla püce poti, Kezhoo, no pü püvo dipüce süva sheri ace po süte, I pü püyi ta tomo.

¹⁶Jisu pücüsü, “Mary.” Thenopü regü püpesü, de püce poti, (Rabboni) Kezhoo, (Kemethao).

¹⁷Jisu püce poti, “Ani hite, I tüyo a Po ce kho molu, vele ta a sazüjürako ce vode ukoce po süte, I ta a Po, neko Po, mu a Rüo mu neko Rüo ce khota züho.”

¹⁸Mary Magdalene tavo ukoce posü, pü Niepoo ngo ti mu püce po kesü kori.

¹⁹Sünha theva (deoba zho thera nha) metha keyiko tavo kengu püba, Jews miko mpe tila. Jisu talüri de uko dolü thayi, de ukoce poti, thelü kemenü po neko yo ba keyi thite.

²⁰Pü süko po kesüsa, pübe mu pütsü (rezakuko) pü uko mekasü. Süsa methakeyiko unü vorita, uko Niepoo ngo kesüla.

²¹Jisu ukoce posa kesü, Thelü kemenü po nekoyo ba yite; a Po aketsü kesübi I sheri neko ketsü süzüho.

²²Pü süposü de püsüshü hapü uko yosü, Neko Kemesa Rüpü khiyi te.

²³Neko somi kephoma vasü sheri sümi kephoma va süte, mu sopü kephoma vamo ta sheri süko kephoma vayi motato.

²⁴Vele Thomas cüpü Didymus li ketao metha keyiko mikerikena dolü mipü, pü süce bamo, Jisu kevorice.

²⁵Methakeyiko püce poti, hako Niepoo ngole. Vele pü ukoce poti, amhü khipü pübelü gojal kevükuko ngo mu abepü süko jüsü, süsa abe pü pütsülü rengukulü kerhüsü kemothe I melüho.

²⁶Tüsozho tütha sa methakeyiko celü kezüba, mu Thomas sheri sülü uko züba, Sülü Jisu ta lüri, cekhako kha meta, vele pü talü uko dolü thayi, de poti, Thelü kemenü po nekoyo ba keyi thite.

²⁷Pü Thomas cepoti, nbecüne khipü abelü thekuko pete, side nbe khipü atsü kerhü süte (rezakulü); side nkemelü kedi thita hite, vele melü yi zote.

²⁸Thomas püce poti, “A Niepoo mu a Rüo.”

²⁹Jisu püce poti, Thomas no kengola melüte, vele ngomo zori melü keyiko thejo kepütho.

³⁰Zasi kekro sheri Jisu pü methakeyiko mhüjülü thisü, süko thopü lesilü sümo.

³¹Vele hiko tho kesü, Jisu hi Khrista zo ti nekopo melüyi ketola, Jihova Nu zo; melü keyila neko kerhü ngoyito püzalü.