Read Chokri Naga JOHN 4 Bible Online

JOHN 4 - Chokri Naga bible

JOHN 4

¹Hitüce Jisu sekeyi, Phariseeko “Jisu sajiko jülopü miketsü John ceri kroku bate” siti seba keta seyi.

²Jisu thono jülopü mitsümo vele püsajiko thozo.

³Pü Judea lü tasü Galelee lü kita.

⁴Pü ta Samaria lü vomo suta.

⁵Süsa pü ta Samaria nade pülü voyi, süo cüpü Sychar siyo, thethi süo Jacob popü pünu Joseph tsükesü kemenoce ba.

⁶Jacob jüfü süce ba. Jisu revü ho tata, süla jüfü khüyo ba; süce keba shurü (baro) ta.

⁷Thenomipü sülü jü püto vori, Jisu püce “jüpü apo krayite” zisü.

⁸Pü sajiko ta rünalü vo ketico khri tole vota sütüce.

⁹Samaria pü püce pode, dipü bide sita, no Jew mipü, apo jüpü nmekra sü no ti, I Samaria mipüpü zotila? Kekrelamori Jews miko Samaria miko züde lütilüle thi yomo.

¹⁰Jisu püfü kelade poti, No mhace Jihova khakesü se lize, sopüno nce kepo “jüpü amekra süte” ziba sheri, no püce mhacho metse, size pü kerhü jü khapü ntsü süto.

¹¹Thenopü püce poti, Kezhoo no mhapüri khipü jüthu keto bamo, sizomoli jüfü mesü (relü); dipüce no kerhü jü bata?

¹²No hapotsa Jacob ce zhokume, pü jüfü hio kha hako tsüsü, pü sheri jü hiokra mu pü nuneko sheri mu pü cüriko sheri kra?

¹³Jisu püfü kelade poti, thüma kehopüri jü hio kekrami theri sala tato.

¹⁴Vele I jü khapü tsü kesüo kra keyimi theri taho, vele khapü ketsü jüo kerhü jüfü pü thide rüla sü kechothe kerhülü vo tato.

¹⁵Thenopü püce pode, Kezhoo, jü süo khapü atsü süte, side apo theri samo ketola, hice vori jüpü mo ketola.

¹⁶Jisu püce pode, Tavo nnopu cüpü hice vorite.

¹⁷Thenopü püfü kela kesü, I anopu bamole. Jisu püce poti, No po meve shu süzo, I anopu ba mole sikesüsü.

¹⁸Kekrelamori no nnopu püngu bave, tsühi nzü kebao ri nnopu kethomo, süla no potü süzo.

¹⁹Thenopü püce poti, Kezhoo, akelüce no saju kepomi mipü te thohe.

²⁰Hapotsaneko cejütu hiolü reshü vori, neko kepono Jerusalem lü thümako kereshü kethi mesü liyo.

²¹Jisu thenopü cekepo, Thenopü, melü yite, pütü süo vori bate, neko cejütuyo ri mo mori Jerusalem lü rimo de Poo reshü tato.

²²Neko reshü keta semode reshüyo, hako sede reshüyo, kekrelamori kelakeyi sü Jews miko la.

²³Vele pütü vori bate, tsühi te, reshü ketho kethi miko ketho mu rüpü lü reshü tato; kekrelamori Poo reshü sübi timi phu tayo.

²⁴Jihova sü Rüpü zo, ketho mu rüpülü pü reshü moze su.

²⁵Thenopü püce poti, Messiah vori keto I seba, süosü Khrista, pü vori lize mha metüko pü hako ce posü tole siba.

²⁶Jisu püce poti, I nzü kerethi keba I süo zo.

²⁷Hizi keba tülü pü metha keyiko tavorita, uko vori ngo keyi pü theno mipü zü kerethi keba la uko ngota, siri mipüri no dipü phuba mori no dipü la thenopü zü kerethi ba? zimo.

²⁸Thenopü süsa pü lekhu khava de tata, pü cholü ta nadelü vota, de thümako ce posü.

²⁹Tavorite, de thümapü pete, pü I thi keva aju metüko pü ace po süte, pü Khrista ta motho?

³⁰Süsa thümako nadelü prari de ta püce vori.

³¹Sizi keba tülü pü metha keyiko püpo mhati yite, Kemethao, side poba.

³²Vele pü ukoce poti, I ketico neko se kemo püba.

³³Süla metha keyiko hunehu ce ketsode humi ketico püvo püpo tino pütsü süme?

³⁴Jisu ukoce poti, A ketico sü apo aketsü kesüo nü thiti, mu süo thitso kesüo zo.

³⁵Tekhri dasa rece vori yo siti neko poyo mome? I neko ce kepo, Tosü nmhü khrüpü pete, yiko müpü rüve züte.

³⁶Yi kerümi ri uzhokhro ngo yiyo, useko püvo kechothe kehülü kengu yito, side tsava miri mu kerü miri kezü unü tayo.

³⁷Poketa jü hio kethozo, mipü so süto, mu kekreo rü yito.

³⁸I neko ketsüpü rüyi nosü neko sosü kemora, kekremi mhatho kethi lü neko ta mhatho sülü lüzü.

³⁹Samaritan nade sülü thüma kekro theno süpü kepola pü melüyi, pü zhopo thikesü, pü I thikeva metüpü ace posü.

⁴⁰Süla Samaritan miko ta püce vori de püpo uko zü bano chota, süla pü sülü zho kena bata.

⁴¹Thüma kekro melüyi kekrelamori püjü la.

⁴²Uko thenopü ce poti, Tsühi hako ri pü melüte, nkepola zo mori hakotho püfü seyi ketala, Khrista tazo ti seyite, cejü kelakeyi yozo.

⁴³Zho kena salü pü ta Galilee lü kita.

⁴⁴Kekrelamori Jisu püju kepo, saju kepomi pütho pü rünalü thürho bamo.

⁴⁵Pü ta Galilee lü kekice Galileans miko pü züyi, pü Jerusalem lü thenyelü mhathi kesüko ngo tila, kekrelamori uko thenyelü vo tila.

⁴⁶Süla Jisu ta Galilee rüna Cana lü vori, pü jü khipü hezo thi kesülü. Capernaunlü kezhomipü nu mhathi züde thi kesürho sü.

⁴⁷Pü Jisu Judea lü tasü Galilee lü vo kezü seyi, süla ta püce vori, de püpo ta püce vono chota, pünu thi kesürho sü ketola, kekrelamori pü sata keto tace ba ketala.

⁴⁸Süla Jisu püce po kesü, neko zasi mu ungo mhathoko ngozo kemosa melü yomo,

⁴⁹Kezhoo püce pode, Kemethao, anu saketa mhüjü ta kiri zote.

⁵⁰Jisu püce pode Tavo tate, nnu rhü yito. Thümao Jisu püce kepo fü melüyi de ta vota.

⁵¹Pü ta cholü ki kezüce, pü choyi miko tavori püzü kesü, de püce po kesü, Nnu rhü yite.

⁵²Süsa pü ukoce ketsoti, pütü kedipüce pü sürho vorita sheri. Uko püce po kesü, ndo keba thünace (ba püce) kethi dite.

⁵³Süla püpo sekeyi, pütü sü mesüce Jisu püce kepo, Nnu rhü yito, zisü. Püri mu pücekro metü melüyi.

⁵⁴Mhatho hio Jisu ungo mhatho thikesü kenao, Jisu Judea lü ta Galilee lü vo kezüce.