Read Chokri Naga JOHN 5 Bible Online

JOHN 5 - Chokri Naga bible

JOHN 5

¹Hisalü Jews miko thenyepü ba, Jisu ta sülü vo.

²Jerusalem lü Teko kharü ce rüzapü ba, Hebrew jülü süo cüpü Beth-zatha liyo, süo kü püngu ba.

³Hilü thüma sürhomo ketami kekro bayo, mhücemi, pheyhomi, lahemi, uko jü rephü kesüri meri bayo.

⁴Kekrelamori tüyo choyimi pütü huce kiri de jü kebu süyo tila, jü melü kesürice kehopüri ta sülü lü kerami kethi kehopü thiba zo sheri sürho tayo tila.

⁵Thümapü sülü sürho mode tütse sümeri tütha zü tata.

⁶Jisu sülü vori de pü tütse kekro sülü züzü keta ngoyi, de püce po kesü, no sürho ta nyü bame?

⁷Sürho kemo thümao püce poti, Kezhoo, mipüri jü rephü kesürice apü jülü kesü ba mole, vele I talü ketoce kekremi amhüjü lü tata yole.

⁸Jisu püce pode, Tasüte de nzi khipü tatate.

⁹Sizisü metha thümao sürho yita, püzi khipü tata; tüsozho sünha Sabbath.

¹⁰Jews miko thüma thi kesürho kesüo ce poti, Tha Sabbath, no nzi khipü tatihi uzhomo.

¹¹Pü uko fü kelade po kesü, Thümao athi kesürho kesüo ace poti Nzi khipü tatate zisü.

¹²Süsa uko pü ketsode, Thüma süo sopüta, npo nzi khipü tata no kesüosü?

¹³Sopü püthi kesürho sü sheri pü seyi mota, kekrelamori Jisu thüma krolü ta vo ketala.

¹⁴Kenuco Jisu tavo kereshücelü püngoyi, de püce po kesü, no sürho taile, kephoma thi sahite, sizi kemo sasü hice suku ti vori ta mo ketola.

¹⁵Thümao tata, de pü Jisu le ti pü mice posü, püthi kesürho kesüo.

¹⁶Süla Jews miko Jisu meshu ta, de pü dokhri va keto rhüta, kekrelamori pü Sabbath zhonha mhathoko thi kesüla.

¹⁷Vele Jisu po kesü, Apo tsüri mhatho thizo kebabi, I sheri mhatho thi bayo.

¹⁸Süla Jews miko pü dokhri va keto rhüku sata, pü Sabbath zho varhü ti lebimo vele Jihova pü pü Po le zi ketala, pü khipü Jihova zü ketü le zi keta.

¹⁹Jisu uko fü kela de po kesü, I nekoce potü süto, Nuo pütho zono mhathi keyi di, vele Poo mhatho ngoba ketila pü thi kebabi Nuo sheri sübi thiba.

²⁰Kekrelamori Poo Nuo kekhrüla mhatho metüpü pümengo süyo, mu pü mhatho hice zhoku ti sheri pü mengo süto mu neko ngo thi tato.

²¹Kekrelamori Poo kesami phü merhülasü, mu süko thi merhü süyo, sübide Nuo sheri pü medomi phü merhü süto.

²²Kekrelamori Poo mipüri mejo yomo, vele sheco metü khapü Nuo melü süte.

²³Thüma metü Nuo rhoti mesü, uko Poo rhoyo tibi. Sopüno Nuo rhomo sheri pü ketsü kesü Poo ri rho yomo.

²⁴I nekoce potü süto, sopüno ajü reniyi de aketsü kesüo melüyi sheri kerhü ngo yito, kemejolü vota moli pü kesao cupü kerhülü vo tayo.

²⁵I nekoce potü süto, pütü süo vori tazü, tsühi tazo, kesamiko Jihova Nu fü se tato, püfü keseko rhü yito.

²⁶Kekrelamori Poo kerhü püzüta, süla pü kerhü khapü Nuo tsüsü,

²⁷Sheco keku khapü pü tsüsü, kekrelamori pü thüma Nuo tila.

²⁸Mhahikola nengo hite, kesamiko mhakhrelü püfü se keto tüpü vorizü.

²⁹Uko tasürito, mhakeve thi ketami rhülasü kerhülü votato, mu mhakesu kethi miko rhülasü mejo kevalü vo tato.

³⁰I atho ala mhapüri thi keyidi, I sekeyi la sheco thiyo, mu asheco kethozo (mezizo), kekrelamori I atho amedo phu yomo, vele a ketsü kesü Poo medo phuyo.

³¹Mhace atho azhopo thiyo lize azhopo kethomo.

³²Mipüba azhopo kethi, pü zhopo ketho zole ti I seba.

³³Neko John ketsüsü, mu pü zhopo kethozo.

³⁴Vele akehüju thüma celü vorimo, vele I hiko po kesü nekopo kelakeyi ngoyi ketola.

³⁵Püsü to keba kevepü, mu neko dopüla pü kevelü neko nüta nyü süzo.

³⁶Vele I John ceri zhoku tipü zhopo ba, kekrelamori Poo mhatho khapü amelü kesüko I thitso sü mozesu, mhatho süko azhopo thiyo, Poo aketsü süzole ti.

³⁷Poo sheri pü aketsü kesü zhopo thiyo. Neko mhapüceri püfü semo, mori pühü sheri ngo mozo.

³⁸Püjüko nekoyo bamo, kekrelamori neko pü ketsü kesüo melü yi kemola.

³⁹Lesilü thopü kemetako phri süte, kekrelamori sükolü kechothe kerhü bale melüba, sükolü aju thopü kemeta ngo yito.

⁴⁰Kerhü ngoyi ketola neko ace vori mute.

⁴¹I thüma celü therho ngoyimo.

⁴²Vele I neko seba, nekoyo Jihova kekhrü bamo.

⁴³I a Po zalü vori, neko azüyi mote; mhace kekremipü pütho püzalü vori lize neko pü zü yito.

⁴⁴Neko kedipü bide melü yita, neko hunehu celü therho phuyo, Jihova celü lebi therho phu yomo?

⁴⁵Poo mhüjülü I neko mejo keto lühite, mipü neko mejo keto püba, süo Moses neko melü ketao.

⁴⁶Neko pü melü ketosa asheri melü tevele, kekrelamori pü aju thopü meta.

⁴⁷Vele neko pütho kesüko melüyomo lize dipü bide neko ajüko melüyi veta?